ເຊີນຮ່ວມທຳບູຸນ ປະຕິສັງຂອນ ພຣະພຸດທະຮູບໃຫຍ່ເມືອງເກົ່າ ສຸວັນນະໂຄມຄຳ

434

ເມືອງຕົ້ນເຜິ້ງ ແຂວງບໍ່ແກ້ວ ກະກຽມພິທີບູຣະນະ ປະຕິສັງຂອນ ພຣະເຈົ້າອົງຫຼວງ ພຣະພຸດທະຮູບໃຫຍ່ເມືອງເກົ່າ ສຸວັນນະໂຄມຄຳ ໃຫ້ກັບຄືນມາງົດງາມເຫຼືອງເຫຼືອມດັ່ງຄືອະດີດ.

ໃນວັນທີ 2 ພະຈິກ 2019 ຜ່ານມາ ປະຊາຊົນບ້ານຮົ່ມເຢັນ, ບ້ານດອນທາດ, ບ້ານດອນສະຫວັນ, ຫ້ອງການຖະແຫຼງຂ່າວ ແລະ ຫ້ອງການທີ່ກ່ຽວຂ້ອງ ຂອງເມືອງຕົ້ນເຜິ້ງ ແຂວງບໍ່ແກ້ວ ພ້ອມກັນຈັດສະຖານທີ່ກະກຽມປະກອບພິທີທາງສາສະໜາ ເພື່ອບູຣະນະ – ປະຕິສັງຂອນ ສ້າງວິຫານ ເພື່ອກວມພຣະເຈົ້າໃຫຍ່ອົງຫຼວງ ເມືອງເກົ່າສຸວັນນະໂຄມຄໍາ, ເຊິ່ງຈະມີການນໍາຂອງແຂວງ – ເມືອງ , ພະແນກການອ້ອມຂ້າງແຂວງ, ບັນດາຫ້ອງການພ້ອມຂ້າງເມືອງ ແລະ ປະຊາຊົນຊາວເມືອງຕົ້ນເຜິ້ງ ກໍ່ຄືແຂວງບໍ່ແກ້ວເຂົ້າຮ່ວມ.

ສະນັ້ນ ທາງອົງການປົກຄອງເມືອງຕົ້ນເຜິ້ງ, ອຳນາດການປົກຄອງບ້ານ ແລະ ພໍ່ແມ່ປະຊາຊົນທັງ 3 ບ້ານກຸ່ມດອນທາດ ຄື: ບ້ານຮົ່ມເຢັນ, ບ້ານດອນທາດ, ບ້ານດອນສະຫວັນ ຂໍແຈ້ງຂ່າວບຸນມາຍັງ ພຸດທະສາສະນິກະຊົນ ແລະ ຜູ້ທີ່ມີຈິດໃຈເຫຼື້ອມໃສສັດທາຢາກຮ່ວມກິນຮ່ວມທານທົ່ວໄປ ທັງພາຍໃນ ແລະ ຕ່າງປະເທດ ເຊີນຮ່ວມທໍາບຸນປະກອບວັດຖຸປັດໄຈເພື່ອບູຣະນະ – ປະຕິສັງຂອນ, ສ້າງວິຫານ ພຣະເຈົ້າໃຫຍ່ອົງຫລວງເມືອງເກົ່າສຸວັນນະໂຄມຄໍາ.

ເຊິ່ງເປັນພຣະປະຕິມາກອນອົງເກົ່າແກ່ ແລະ ເປັນມິ່ງຂວັນຂອງຊາວເມືອງຕົ້ນເຜິ້ງ ກໍ່ຄືຊາວແຂວງບໍ່ແກ້ວ ໃນງານປະກອບພິທີທາງສາສະໜາ ເພື່ອກະກຽມບູຣະນະ – ປະຕິສັງຂອນ, ສ້າງວິຫານກວມພຣະປະຕິມາກອນອົງດັ່ງກ່າວ ເພື່ອບໍ່ໃຫ້ເພພັງເສື່ອມສະຫຼາຍໄປຕາມການເວລາ ແລະ ສະພາບແວດລ້ອມ, ທັງເປັນການພັດທະນາໃຫ້ເປັນແຫຼ່ງທ່ອງທ່ຽວທາງດ້ານວັດທະນະທໍາ ແລະ ປະຫວັດສາດ.

ພິທີດັ່ງກ່າວຈະໄດ້ຈັດຂຶ້ນ ໃນວັນທີ 3 ພະຈິກ 2019, ເວລາ 08:30 ໂມງ ເລີ່ມປະກອບພິທີທາງສາສະໜາ, ສະຖານທີ່ແຫຼ່ງປະຫວັດສາດຈຸດພຣະເຈົ້າໃຫຍ່ອົງຫຼວງເມືອງເກົ່າສຸວັນນະໂຄມຄໍາ ກຸ່ມບ້ານດອນທາດ.

Art and Culture of Laos