ໂຮງຮຽນສິນໄຊ ຄວ້າລາງວັນໂຮງຮຽນນິເວດອາຊຽນ

483

ໂຮງຮຽນສິນໄຊ ໄດ້ຮັບລາງວັນ ໂຮງຮຽນນິເວດອາຊຽນ ປະຈຳປີ 2019 ຂັ້ນມັດທະຍົມ ຈາກຜົນງານສ້າງ ຄວາມເຂົ້າໃຈເລື່ອງສິ່ງແວດລ້ອມໃນທຸກຂົງເຂດການສຶກສາໃຫ້ແກ່ນັກຮຽນ ແລະ ສັງຄົມອ້ອມຂ້າງໃນຂົງເຂດ ຂັ້ນໂຮງຮຽນມັດທະຍົມ. ຂະນະທີ່ຜູ້ອຳນວຍການໂຮງຮຽນມຸ່ງໝັ້ນສືບຕໍ່ຮັກສາມູນເຊື້ອໃຫ້ດີຂຶ້ນກວ່າເກົ່າ ລວມທັງຜັນຂະຫຍາຍໄປສູ່ໂຮງຮຽນອື່ນ.

ທ່ານ ນາງ ອາລີ ພົນເສນາ ຜູ້ອຳນວຍການໂຮງຮຽນປະຖົມ ແລະ ມັດທະຍົມສົມບູນສິນໄຊ ໃຫ້ສຳພາດວ່າ: ໂຮງຮຽນສິນໄຊ ເປັນໂຮງຮຽນພາກເອກະຊົນແຫ່ງໜຶ່ງທີ່ໄດ້ປະຕິບັດການຮຽນ – ການສອນຕາມ 5 ຫຼັກມູນການສຶກສາຂອງກະຊວງສຶກສາທິການ ແລະ ກີລາ ຄຽງຄູ່ກັບການເອົາໃຈໃສ່ຮັກສາສິ່ງແວດລ້ອມ ແລະ ໄດ້ຮັບທຸງໄຊ ປະເພດທີ 1 ເປັນໂຮງຮຽນຂຽວສະອາດ ແລະ ມີຄຸນນະພາບຕາມມາດຖານ ຂອງພະແນກສຶກສາທິການ ແລະ ກີລາ. ຫຼັງຈາກນັ້ນ, ທາງໂຮງຮຽນໄດ້ສືບຕໍ່ປູກຈິດສຳນຶກໃຫ້ນັກຮຽນຮູ້ກ່ຽວກັບຄວາມຂຽວສະອາດ ແລະ ຮັກສາສິ່ງແວດລ້ອມ ຈົນມາຮອດປັດຈຸບັນນີ້ທາງໂຮງຮຽນພວກເຮົາໄດ້ຖືກຄັດເລືອກເປັນໂຮງຮຽນຊັ້ນມັດທະຍົມ ເຂົ້າຮ່ວມການແຂ່ງຂັນໃນລະດັບພາກພື້ນອາຊຽນ.

ສຳລັບກິດຈະກຳທີ່ທາງໂຮງຮຽນນຳໄປແຂ່ງຂັນຄັ້ງນີ້ ປະກອບມີ: ວິທີເຮັດຝຸ່ນຊີວະພາບ ໂດຍການນຳເອົາສິ່ງເສດເຫຼືອຈາກອາຫານ ແລະ ພືດຜັກ ມາໝັກເຂົ້າກັນແລ້ວມາປະສົມກັບນ້ຳທຳມະດາເພື່ອນຳໄປຫົດຕົ້ນໄມ້, ດອກໄມ້ຕ່າງໆ ແລະ ເອົາໄປໃຊ້ດັບກິ່ນໃນຫ້ອງນ້ຳ ຫຼື ຫ້ອງອື່ນໆ ພ້ອມທັງເຜີຍແຜ່ໃຫ້ນັກຮຽນໄປນຳໃຊ້ຢູ່ໃນຄອບຄົວຕື່ມອີກຖືວ່າໄດ້ຮັບຜົນດີຫຼາຍ. ນອກຈາກນີ້, ທາງໂຮງຮຽນຍັງມີສວນສຶກສາຢູ່ໂຮງຮຽນ ເພື່ອສາທິດໃຫ້ນັກຮຽນໄດ້ຮຽນຮູ້ກ່ຽວກັບການປູກພືດຜັກ, ປູກເຂົ້າ ແລະ ປູກຕົ້ນໄມ້ອື່ນໆ ຈຳນວນ 100 ກວ່າຊະນິດ ເພື່ອໃຫ້ນັກຮຽນໄດ້ຮູ້ວິທີປູກ ແລະ ຮູ້ຈັກຄຸນຄ່າໃນການຜະລິດ ແລະ ວິທີປູກຝັງ. ພ້ອມກັນນີ້, ທາງໂຮງຮຽນຍັງໄດ້ນຳພານັກຮຽນປູກຕົ້ນໄມ້ສະໝຸນໄພທີ່ເປັນຢາຫຼາຍຊະນິດ ເພື່ອໃຫ້ນັກຮຽນໄດ້ສຶກສາຮຽນຮູ້ເຖິງສັບພະຄຸນຕ່າງໆຂອງສະໝຸນໄພທຸກຊະນິດ ເພື່ອໄປນຳໃຊ້ໃນຊີວິດປະຈຳວັນ.

ນອກຈາກນີ້, ທາງໂຮງຮຽນຍັງໄດ້ສ້າງຂະບວນການແຍກຂີ້ເຫຍື້ອລະຫວ່າງສິ່ງທີ່ບໍ່ສາມາດໃຊ້ໄດ້ ແລະ ສິ່ງທີ່ສາມາດໃຊ້ໄດ້ ເຊັ່ນ: ກະຕຸກນ້ຳດື່ມເປັນຕົ້ນ ເພື່ອນຳມາຜະລິດເປັນສື່ການຮຽນ – ການສອນ, ສ່ວນໜຶ່ງໄດ້ນຳມາປະດິດເພື່ອເຂົ້າຮ່ວມການແຂ່ງຂັນ ເຊິ່ງສາມາດຍາດໄດ້ລາງວັນທີ 1 ມາແລ້ວຫຼາຍເວທີ. ນອກຈາກນີ້, ຍັງໄດ້ເກັບກະຕຸກໄປຂາຍເພື່ອສ້າງລາຍຮັບມາຊື້ອຸປະກອນຮັບໃຊ້ໃນການຮຽນ – ການສອນ ພ້ອມທັງເປັນການຮັກສະພາບແວດລ້ອມໃຫ້ສະອາດຈົບງາມອີກ.

ຍ້ອນການເຄື່ອນໄຫວດັ່ງກ່າວ ໂຮງຮຽນສິນໄຊ ຈຶ່ງໄດ້ຖືກຄັດເລືອກເປັນຕົວແທນຂອງໂຮງຮຽນພາກເອກະຊົນແຫ່ງທຳອິດໃນ ສປປ ລາວ ໄປຮັບລາງວັນ ໂຮງຮຽນນິເວດອາຊຽນ ຄັ້ງທີ 3 ຮ່ວມກັບບັນດາໂຮງຮຽນ 9 ປະເທດອາຊຽນ ໃນວັນທີ 8 ຕຸລາ ຜ່ານມາ ທີ່ສຽມລຽບ ຣາຊະອານາຈັກກຳປູເຈຍ ຖືເປັນລາງວັນໜຶ່ງທີ່ສ້າງຜົນງານ ແລະ ສ້າງ ຄວາມພາກພູມໃຈໃຫ້ກັບໂຮງຮຽນ ແລະ ເປັນການສ້າງຊື່ສຽງທາງດ້ານການຮຽນ – ການສອນມາ  ສູ່ປະເທດລາວ ກໍຄືນະຄອນຫຼວງວຽງຈັນ.

ທ່ານອຳນວຍການ ກ່າວຕື່ມວ່າ: ພາຍຫຼັງໄດ້ຮັບລາງວັນດັ່ງກ່າວແລ້ວ ທາງໂຮງຮຽນຈະໄດ້ສືບຕໍ່ຮັກສາມູນເຊື້ອ ແລະ ເສີມຂະຫບາຍໃຫ້ດີຂຶ້ນ ພ້ອມທັງສືບຕໍ່ເອົາໃຈໃສ່ຊຸກຍູ້ນຳພານັກຮຽນໃຫ້ຮູ້ຈັກຮັກສາສິ່ງແວດລ້ອມພາຍໃນບໍລິເວນໂຮງຮຽນ ແລະ ນອກສະຖານທີ່ໃຫ້ຫຼາຍຂຶ້ນກວ່າເກົ່າ ພ້ອມທັງຜັນຂະຫຍາຍໄປສູ່ໂຮງຮຽນແຫ່ງອື່ນໆນຳອີກ ເພື່ອໃຫ້ເຍົາວະຊົນລາວມີຄຸນສົມບັດທີ່ດີ, ມີຄວາມ ຮູ້ – ຄວາມສາມາດໃນການຮັກສາສິ່ງແວດລ້ອມ ກໍຄືການພັດທະນາສ້າງສາປະເທດເຮົາໃຫ້ຈະເລີນຮຸ່ງເຮືອງ.

[ ຂ່າວ: ແກ້ວ; ຮູບ: ສອນໄຊ ]

ທີ່ມາ: ໜັງສືພິມ ເສດຖະກິດ-ການຄ້າ