ມອບ – ຮັບລົດໄຟຟ້າ ລັດວິສາຫະກິດໄຟຟ້າລາວ ກັບ ບໍລິສັດ ອີວີ ລາວ ຈຳກັດ

395

ໃນຕອນບ່າຍຂອງວັນທີ 28 ຕຸລາ 2019 ຜ່ານມາ ໄດ້ມີພິທີມອບ – ຮັບລົດທີ່ນຳໃຊ້ລະບົບສາກໄຟຟ້າ 1 ຄັນ ເພື່ອນຳໃຊ້ໃນໂຄງການທົດລອງລະບົບສາກໄຟຟ້າສຳລັບລົດ EV ເຊິ່ງລັດວິສາຫະກິດໄຟຟ້າລາວ ແລະ ບໍລິສັດ EV ລາວ ຈຳກັດ ໄດ້ມີການລົງນາມໃນບົດບັນທຶກຄວາມເຂົ້າໃຈຮ່ວມກັນໃນວັນທີ 2 ເມສາ 2019 ເພື່ອສຶກສາ ຄວາມເປັນໄປໄດ້ ແລະ ດຳເນີນໂຄງການທົດລອງນຳໃຊ້ລົດ ແລະ ລະບົບສາກໄຟຟ້າໃຫ້ລົດ EV ໃນຂອບເຂດນະຄອນຫຼວງວຽງຈັນ.

ທ່ານ ບຸນອູ້ມ ສີວັນເພັງ ຜູ້ອຳນວຍການໃຫຍ່ ລັດວິສາຫະກິດໄຟຟ້າລາວ ໄດ້ກ່າວບາງຕອນສໍາຄັນວ່າ: ອີງໃສ່ນະໂຍບາຍຂອງລັດວິສາຫະກິດໄຟຟ້າລາວ ໃນປັດຈຸບັນທີ່ໄດ້ມີການສົ່ງເສີມໃຫ້ເລີ່ມມີການນຳໃຊ້ລົດ EV ຢູ່ໃນ ສປປ ລາວ ຕາມທິດທາງຂອງພັກ ແລະ ລັດຖະບານ ເຊິ່ງພວກເຮົາກໍເຫັນວ່າມີຄວາມຈຳເປັນ ຈຶ່ງໄດ້ໃຫ້ການສະໜັບສະໜູນເພື່ອໃຫ້ສາມາດສຳເລັດບົດສຶກສາ ( FS ) ແລະ ນຳສະເໜີຂໍທິດຊີ້ນຳຈາກລັດຖະບານ.

ເຖິງຢ່າງໃດກໍຕາມ, ໂຄງການດັ່ງກ່າວຈະສຳເລັດກໍຕໍ່ເມື່ອໄດ້ຮັບການຮ່ວມມື ແລະ ສະໜັບສະໜູນຈາກຫຼາຍພາກສ່ວນ ເປັນຕົ້ນແມ່ນ: ກະຊວງໂຍທາທິການ ແລະ ຂົນສົ່ງ, ກະຊວງການເງິນ, ກະຊວງພະລັງງານ ແລະ ບໍ່ແຮ່ ແລະ ກະຊວງອື່ນໆທີ່ກ່ຽວຂ້ອງ.

ພິທີມອບ – ຮັບດັ່ງກ່າວໄດ້ຈັດຂຶ້ນທີ່ສຳນັກງານໃຫຍ່ລັດວິສາຫະກິດໄຟຟ້າລາວ, ໃຫ້ກຽດເຂົ້າຮ່ວມຂອງ ທ່ານ ສັນຍາ ສົມວິຈິດ ຮອງຫົວໜ້າກົມນະໂຍບາຍ ແລະ ແຜນພະລັງງານ ກະຊວງພະລັງງານ ແລະ ບໍ່ແຮ່, ທ່ານ ບຸນອູ້ມ ສີວັນເພັງ ຜູ້ອຳນວຍການໃຫຍ່ລັດວິສາຫະກິດໄຟຟ້າລາວ, ທ່ານ ບຸນເລີດ ຫຼວງປະເສີດ ປະທານ ບໍລິສັດ EV ລາວ ຈຳກັດ. ພ້ອມນັ້ນ, ກໍຍັງມີຜູ້ຕາງໜ້າຈາກກະຊວງທີ່ກ່ຽວຂ້ອງ.

[ ຂ່າວ: ສົມສະຫວິນ, ຮູບ: EDL ]

ທີ່ມາ: ໜັງສືພິມ ເສດຖະກິດ-ການຄ້າ