ລາຄາຄໍາປັບຂຶ້ນ 60 ພັນກີບ

281

ລາຄາຄໍາໄດ້ສົ່ງສັນຍານປັບຕົວສູງຂຶ້ນຢ່າງຕໍ່ເນື່ອງ ຫຼັງຈາກທີ່ໄດ້ຮັບແຮງໜູນຈາກເສດຖະກິດໂລກ ໂດຍສະເພາະແມ່ນແຮງກະທົບຈາກຜົນການເຈລະຈາຖອນອອກຈາກສະຫະພາບເອີຣົບ ຂອງອັງກິດ ແລະ ຄວາມຄືບໜ້າການເຈລະຈາການຄ້າຈີນ – ສະຫະລັດ ສົ່ງຜົນໃຫ້ລາຄາຄໍາປັບຕົວຂຶ້ນສູງ ສະເພາະຕະຫຼາດພາຍໃນກາງເດືອນນີ້ ໄດ້ປັບຂຶ້ນເຖິງ 2,8 ແສນກີບຕໍ່ບາດ ແລະ ມາໃນອາທິດສຸດທ້າຍຂອງເດືອນກໍປັບຂຶ້ນ 60 ພັນກີບຕໍ່ບາດ.

ລາຄາຄໍາເປີດຕະຫຼາດໃນຕົ້ນອາທິດນີ້ ທີ່ປະກາດຂາຍໃນວັນທີ 28 ຕຸລາ 2019 ແມ່ນ 6.789.000 ກີບຕໍ່ບາດ ເຫັນວ່າເພີ່ມຂຶ້ນ 60 ພັນກີບຕໍ່ບາດ ຖ້າທຽບໃສ່ຕາຕະລາງປະກາດຂາຍຄໍາ ໃນວັນທີ 21 ຕຸລາ 2019 ທີ່ປະກາດຂາຍ 6.729 ລ້ານກີບຕໍ່ບາດ.

ສ່ວນລາຄາຄໍາຕະຫຼາດໂລກ ວັນທີ 28 ຕຸລາ 2019 ເຄື່ອນໄຫວໃນລະດັບ 1.505 ໂດລາສະຫະລັດຕໍ່ອອນ ເພີ່ມຂຶ້ນຈາກອາທິດກ່ອນ 15 ໂດລາສະຫະລັດຕໍ່ອອນ ຫຼັງຈາກປິດຕະຫຼາດໃນວັນທີ 25 ຕຸລາ 2019 ເພີ່ມຂຶ້ນໃນລະດັບ 1.505,3 ໂດລາສະຫະລັດຕໍ່ອອນ ແລະ ຖ້າທຽບໃສ່ວັນທີ 21 ຕຸລາ 2019 ຢູ່ທີ່ລາຄາ 1.490 ໂດລາສະຫະລັດຕໍ່ອອນ ເນື່ອງຈາກໄດ້ຮັບແຮງໜູນການເຂົ້າຊື້ຄໍາສິນຊັບປອດໄພ ຫຼັງສະຫະລັດເປີດເຜີຍຂໍ້ມູນເສດຖະກິດທີ່ອ່ອນແອຕໍ່ເນື່ອງ.

[ ຂ່າວ: ພຸດຕີ້ ]

ທີ່ມາ: ໜັງສືພິມ ເສດຖະກິດ-ການຄ້າ