ອຸຕຸເຕືອນ! ພາຍຸດີເປຣເຊິນ ຈະພັດເຂົ້າພາກກາງ ແລະ ພາກໃຕ້

376

ກົມອຸຕຸນິຍົມ ແລະ ອຸທົກກະສາດ ໄດ້ອອກແຈ້ງເຕືອນບັນດາແຂວງພາກກາງ ແລະ ພາກໃຕ້ ໃນໄລຍະວັນທີ 29 ຫາ 31 ຕຸລາ 2019 ໃຫ້ມີສະຕິລະມັດລະວັງຕໍ່ສະພາບຝົນຕົກ ຟ້າຮ້ອງ ຟ້າເຫຼື້ອມ ແລະ ມີລົມພັດແຮງ ຈາກອິດທິພົນຂອງພາຍຸດີເປຣເຊິນ.

ກົມອຸຕຸນິຍົມ ແລະ ອຸທົກກະສາດ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ອອກແຈ້ງເຕືອນໄພພາຍຸດີເປຣເຊິນ ສະບັບເລກທີ1524/ກອຕທ ລົງວັນທີ 29 ຕຸລາ 2019 ເນື່ອງຈາກຄວາມກົດດັນສູງຂອງອາກາດເຢັນຈາກປະເທດຈີນ ໄດ້ເພີ່ມກໍາລັງແຮງຂຶ້ນແຜ່ລົງມາປົກຄຸມຢູ່ທົ່ວທຸກພາກຂອງປະເທດລາວ ດ້ວຍກຳລັງແຮງປານກາງ, ສົມທົບກັບພາຍຸດີເປຣເຊິນທີ່ກໍ່ຕົວຢູ່ທະເລຈີນໃຕ້ ມີຈຸດໃຈກາງຢູ່ເສັ້ນຂະໜານທີ່ 11.7 ອົງສາເໜືອ ແລະ ເສັ້ນແວງທີ 115.4 ອົງສາຕາເວັນອອກ ກຳລັງເຄື່ອນທີ່ໄປທາງທິດຕາເວັນຕົກດ້ວຍຄວາມໄວ 15 ກິໂລແມັດຕໍ່ຊົ່ວໂມງ ຄາດວ່າພາຍຸຫົວນີ້ຜ່ານພາກໃຕ້ຂອງ ສສ ຫວຽດນາມ ໃນຕອນກາງຄືນຂອງວັນທີ 29 ຕຸລານີ້, ວົງລັດສະໝີຈະກວມເອົາບັນດາແຂວງພາກກາງ ແລະ ພາກໃຕ້ ຂອງປະເທດລາວ ໃນໄລຍະວັນທີ 30 ຫາ 31 ຕຸລາ 2019 ເຊິ່ງຈະເຮັດໃຫ້ມີຝົນຕົກ ຟ້າຮ້ອງ ຟ້າເຫຼື້ອມໃນລະດັບປານກາງ ພ້ອມມີລົມພັດຢູ່ບາງທ້ອງຖິ່ນບັນດາແຂວງບໍລິຄໍາໄຊ, ຄຳມ່ວນ, ສະຫວັນນະເຂດ, ສາລະວັນ, ຈຳປາສັກ, ເຊກອງ ແລະ ອັດຕະປື.

ກົມອຸຕຸນິຍົມ ແລະ ອຸທົກກະສາດ ຍັງແຈ້ງເຕືອນເຖິງອຳນາດການປົກຄອງ ແລະ ປະຊາຊົນບັນດາເຜົ່າທີ່ອາໄສຢູ່ບັນດາເຂດແຂວງດັ່ງກ່າວ ໃຫ້ມີສະຕິລະມັດລະວັງຕໍ່ສະພາບຝົນຕົກ ຟ້າຮ້ອງ ຟ້າເຫຼື້ອມ ແລະ ມີລົມພັດແຮງທີ່ອາດຈະເກີດຂຶ້ນ ແລະ ໃຫ້ຕິດຕາມຂ່າວພະຍາກອນອາກາດໃນໄລຍະ 1 ຫາ 2 ວັນຕໍ່ໜ້ານີ້.

ທີ່ມາ: ໜັງສືພິມ ເສດຖະກິດ-ການຄ້າ