ພາກລັດ – ເອກະຊົນຫາລືສ້າງໂອກາດລົງທຶນດ້ານພື້ນຖານໂຄງລ່າງ

275

ກົມແຜນການ ແລະ ການຮ່ວມມື, ກະຊວງອຸດສາຫະກຳ ແລະ ການຄ້າ ( ອຄ ) ຈັດກອງປະຊຸມຂະແໜງການຄ້າ ແລະ ເອກະຊົນ ຄັ້ງທີ 15 ຂຶ້ນ ເພື່ອຮ່ວມປຶກສາຫາລືບັນດາຜົນກະທົບຂອງໂຄງການຂະໜາດ   ໃຫຍ່ໃນການພັດທະນາພື້ນຖານໂຄງລ່າງຊ່ວຍໃຫ້ລັດຖະບານສາມາດດຶງດູດການລົງທຶນ ແລະ ເຮັດໃຫ້ພາກທຸລະກິດທັງພາຍໃນ ແລະ ຕ່າງປະເທດ ສາມາດດໍາເນີນທຸລະກິດໄດ້ຢ່າງຄ່ອງຕົວ.

ກອງປະຊຸມດັ່ງກ່າວຈັດຂຶ້ນໃນວັນທີ 29 ຕຸລາ 2019 ທີ່ໂຮງແຮມແລນມາກ ໂດຍການເປັນປະທານຂອງ ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງ ອຄ, ມີເອກອັກຄະລັດຖະທູດສະຫະພາບເອີຣົບ ປະຈໍາ ສປປ ລາວ, ທ່ານເອກອັກຄະລັດຖະທູດ ອົສຕຣາລີ ປະຈໍາລາວ ພ້ອມດ້ວຍເຈົ້າໜ້າທີ່ພາກລັດ, ອົງການຈັດຕັ້ງສາກົນ ແລະ ພາກທຸລະກິດເຂົ້າຮ່ວມ.

ທ່ານ ນາງ ເຂັມມະນີ ພົນເສນາ ກ່າວວ່າ: ພວກເຮົາຈະສຸມໃສ່ປຶກສາຫາລືກ່ຽວກັບການລົງທຶນລະບົບພື້ນຖານໂຄງລ່າງ ເພື່ອໃຫ້ສາມາດດຶງດູດເອົາການລົງທຶນ, ສ້າງສະພາບແວດລ້ອມ ສາມາດເປີດກວ້າງກາລະໂອກາດນໍາຜົນປະໂຫຍດມາໃຫ້ພາກເອກະຊົນ ລວມທັງຊຸກຍູ້ໃຫ້ບັນດາຂະແໜງການອຸດສາຫະກຳໃໝ່ໄດ້ເກີດຂຶ້ນ ເຊິ່ງເປັນການຊ່ວຍເຫຼືອທີ່ສໍາຄັນໃນການຫັນປ່ຽນລະບົບໂຄງສ້າງ ແລະ ການສົ່ງອອກໃຫ້ມີຄວາມຫຼາກຫຼາຍຂຶ້ນ.

ທ່ານກ່າວຕື່ມອີກວ່າ: ທີ່ປະຊຸມໄດ້ມີການສົນທະນາມາດຕະການປັບປຸງທີ່ສໍາຄັນເປັນພື້ນຖານ ເພື່ອຮັບປະກັນການຂະຫຍາຍຕົວຂອງການລົງທຶນໃນພື້ນຖານໂຄງລ່າງຄົມມະນາຄົມ ບົນພື້ນຖານເສດຖະກິດແຫ່ງຊາດທີ່ມີຄວາມຫຼາກຫຼາຍ.

ທ່ານ ມອມເບີດ ຮ໋ອບ ນັກເສດຖະສາດອາວຸໂສດ້ານການຄ້າ ຫ້ອງການທະນາຄານໂລກ ປະຈໍາ ສປປ ລາວ ກ່າວວ່າ: ສໍາລັບຜົນປະໂຫຍດສູງສຸດທີ່ຈະໄດ້ຮັບຈາກໂຄງການເສັ້ນທາງລົດໄຟ ລາວ – ຈີນ ແມ່ນຈະມີຜົນປະໂຫຍດຕໍ່ພາກທຸລະກິດລາວ ໂດຍສະເພາະການຜະລິດກະສິກໍາທີ່ຈະມີທ່າແຮງ, ດຶງດູດການລົງທຶນເພີ່ມຂຶ້ນ, ມີກິດຈະກໍາຫຼາກຫຼາຍປິ່ນອ້ອມ. ພ້ອມດຽວກັນ, ກໍຫຼຸດຜ່ອນຕົ້ນທຶນໃນການຂົນສົ່ງ, ຫຼຸດຜ່ອນພັນທະຕ່າງໆ. ສໍາລັບພາກການຂົນສົ່ງຈະຕ້ອງມີການຍົກລະດັບການບໍລິການສາງຄ່ຽນຖ່າຍສິນຄ້າ ໂດຍສະເພາະຢູ່ທ່ານາແລ້ງ ໃນນະຄອນຫຼວງວຽງຈັນ ໃຫ້ມີການບໍລິການທີ່ສະດວກ ແລະ ໄວຂຶ້ນ.

ໃນກອງປະຊຸມຜູ້ເຂົ້າຮ່ວມໄດ້ມີການປຶກສາຫາລື ກ່ຽວກັບ ຄວາມຄືບໜ້າການແກ້ໄຂບັນຫາສະເພາະທີ່ຕິດພັນກັບແຜນການສ້າງສະພາບແວດລ້ອມທາງດ້ານທຸລະກິດທີ່ເອື້ອອໍານວຍຂອງລັດຖະບານ. ພ້ອມດຽວກັນ, ກໍໄດ້ຮັບຟັງຜົນສໍາເລັດການແກ້ໄຂບັນຫາທຸລະກິດໃນໄລຍະຜ່ານມາ, ຄວາມຄືບໜ້າການຈັດຕັ້ງປະຕິບັດຄໍາສັ່ງເລກທີ 02/ນຍ.

[ ຂ່າວ: ພຸດຕີ້; ຮູບ: ສອນໄຊ ]

ທີ່ມາ: ໜັງສືພິມ ເສດຖະກິດ-ການຄ້າ