ມະຫະກຳສີມືຫັດຖະກຳລາວ ຈະຊ່ວຍສ້າງໂອກາດໃຫ້ຜູ້ຜະລິດ

471

ມະຫະກຳສີມືຫັດຖະກຳລາວ ຄັ້ງທີ 18 ຈະສ້າງໂອກາດອັນດີໃຫ້ກັບຜູ້ຜະລິດໄດ້ແລກປ່ຽນບົດຮຽນນຳກັນໃນການຍົກລະດັບຄຸນນະພາບຜະລິດຕະພັນ ລວມທັງສາມາດຫາຄູ່ຮ່ວມທຸລະກິດຕື່ມອີກ ເພາະມີຮ້ານຂາຍເຄື່ອງຫັດຖະກຳທົ່ວປະເທດ ເຂົ້າຮ່ວມ 200 ກວ່າຮ້ານ.

ມະຫະກຳສີມືຫັດຖະກຳລາວ ຄັ້ງທີ 18 ໄດ້ເປີດຂຶ້ນຢ່າງເປັນທາງການ ໃນວັນທີ 29 ຕຸລາ 2019 ທີ່ສູນການຄ້າ ລາວ – ໄອເຕັກ ( ຕຶກເກົ່າ ) ໂດຍເປັນກຽດເຂົ້າຮ່ວມຕັດແຖບຜ້າເປີດງານໂດຍ ທ່ານ ນາງ ນາລີ ສີສຸລິດ  ທີ່ປຶກສາກິດຕິມະສັກ ສະມາຄົມຫັດຖະກຳລາວ ( ສຫລ ), ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກຳ ແລະ ການຄ້າ; ມີບັນດາທ່ານຮອງລັດຖະມົນຕີ, ປະທານ ສຫລ, ຊາວຄ້າຂາຍ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ຫານຊະນະ ສີສານ ປະທານສະມາຄົມຫັດຖະກຳລາວ ກ່າວວ່າ: ເພື່ອສືບຕໍ່ສ້າງໂອກາດໃຫ້ແກ່ຊາວຊ່າງຫັດຖະກຳລາວ ທີ່ຢູ່ທ້ອງຖິ່ນຕ່າງໆໃນທົ່ວປະເທດໄດ້ນຳເອົາສິນຄ້າຂອງຕົນມາວາງສະແດງ ແລະ ຈຳໜ່າຍຂາຍ ສ້າງລາຍຮັບໃຫ້ກັບຕົນເອງ ພ້ອມທັງເປັນການສ້າງໂອກາດໃຫ້ຊາວຊ່າງຫັດຖະກຳໄດ້ພົບປະກັນ, ແລກປ່ຽນບົດຮຽນກ່ຽວກັບການຜະລິດເຄື່ອງຫັດຖະກຳນຳກັນ, ຈຸດໃດຈະຕ້ອງແກ້ໄຂ, ສິ່ງໃດຈະຕ້ອງໄດ້ພັດທະນາຕື່ມ ຫຼື ຕໍ່ຍອດອອກໄປ, ພວກເຮົາສະມາຄົມຫັດຖະກຳມີຄວາມຕັ້ງໜ້າສົ່ງເສີມສີມືແຮງງານຊາວຊ່າງຫັດຖະກຳໄປພ້ອມໆກັບເຄື່ອງຫັດຖະກຳທີ່ຜະລິດອອກມາແລ້ວຈະຕ້ອງມີບ່ອນຂາຍ, ຈະຕ້ອງມີຜູ້ຊື້, ການສົ່ງເສີມຜະລິດຕະພັນຫັດຖະກຳໃຫ້ຕິດພັນກັບການທ່ອງທ່ຽວ, ການຜະລິດຈຶ່ງຈະໝັ້ນຄົງ. ພ້ອມນັ້ນ, ໃນງານຄັ້ງນີ້ພວກເຮົາຍັງໄດ້ສ້າງໂອກາດໃຫ້ຊາວຊ່າງຫັດຖະກຳມາຊອກຫາລູກຄ້າ ແລະ ຫາຄູ່ທຸລະກິດນຳອີກດ້ວຍ.

ທ່ານໃຫ້ຮູ້ຕື່ມອີກວ່າ: ສຳລັບງານມະຫະກຳສີມືຫັດຖະກຳລາວໃນປີນີ້ ມີບັນດາຮ້ານຂາຍເຄື່ອງຫັດຖະກຳ ປະມານ 200 ກວ່າຮ້ານເຂົ້າຮ່ວມ ທີ່ມາຈາກທົ່ວປະເທດ ເຊິ່ງສ່ວນໃຫຍ່ຈະເປັນເຄື່ອງຫັດຖະກຳຜ້າໄໝ, ຜ້າຝ້າຍພື້ນເມືອງ, ເຄື່ອງເງິນ – ວັດຖຸມີຄ່າ, ເຄື່ອງທອງເຫຼືອງ, ເຄື່ອງປັ້ນດິນເຜົາ, ຈັກສານໄມ້ປ່ອງ, ຫວາຍ ແລະ ເຄື່ອງຊົນເຜົ່າຕ່າງໆ. ນອກນີ້, ພາຍໃນງານວາງສະແດງຍັງມີການສາທິດການຜະລິດສິນຄ້າຫັດຖະກຳລາວດ້ວຍມື, ເດີນແບບຊຸດຊົນເຜົ່າ, ການສາທິດຮີດຄອງປະເພນີຂອງຊົນເຜົ່າໄທດຳ – ໄທແດງແບບບູຮານ ແລະ ຊົນເຜົ່າກຶມມຸ, ການສະແດງລະຄອນເວທີຫັດຖະກຳຕິດພັນກັບການທ່ອງທ່ຽວ, ສະແດງກາຍະສິນ, ຟ້ອນລາຍງ້າວ, ຂັບງື່ມ, ມວຍລາຍລາວ ແລະ ກິດຈະກຳສະແດງສິລະປະຂອງຫຼານນ້ອຍເຍົາວະຊົນຈາກໂຮງຮຽນແຫ່ງຕ່າງໆ, ພ້ອມມີການສໍາມະນາໃນຫົວຂໍ້ຕ່າງໆແຕ່ລະວັນ ແລະ ມີກິດຈະກຳອື່ນໆເຂົ້າຊົມໂດຍບໍ່ເສຍຄ່າ.

ທ່ານ ນາງ ຈັນທະຈອນ ວົງໄຊ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ ກ່າວວ່າ: ການຈັດງານມະຫະກຳສີມືຫັດຖະກຳນີ້ ກໍຖືວ່າເປັນປີທີ 18 ແລະ ໄດ້ກາຍເປັນບຸນປະເພນີຂອງຊາວຊ່າງຫັດຖະກຳໄປແລ້ວ. ສະນັ້ນ, ຄິດວ່າສະມາຄົມຫັດຖະກຳຖືເປັນສະມາຄົມໜຶ່ງທີ່ໝັ້ນຄົງ ແລະ ເຄື່ອນໄຫວມາໄດ້ເຖິງ 21 ປີ ໃນການທຸ່ມເທເຫື່ອແຮງ ແລະ ສະຕິປັນຍາເຂົ້າໃນການບໍລິຫານສະມາຄົມ, ອະນຸຮັກ ແລະ ສົ່ງເສີມພູມປັນຍາທາງດ້ານຫັດຖະກຳ ເຊິ່ງມັນສະແດງໃຫ້ເຫັນເຖິງການມີສ່ວນຮ່ວມໃນການສ້າງວຽກເຮັດງານທຳໃນຂົງເຂດຊົນນະບົດ, ສ້າງລາຍຮັບກັບຊຸມຊົນ, ສະໜັບສະໜູນນະໂຍບາຍຂອງພັກ ແລະ ລັດຖະບານໃນການແກ້ໄຂຄວາມທຸກຍາກໃຫ້ຫຼຸດລົງເທື່ອລະກ້າວ.

[ ຂ່າວ: ສັນຕິ;ຮູບ: ສອນໄຊ ]

ທີ່ມາ: ໜັງສືພິມ ເສດຖະກິດ-ການຄ້າ