ຕ້ອງການໃຊ້ລົດຕູ້ໃນນະຄອນຫຼວງວຽງຈັນ ເອີ້ນໃຊ້ບໍລິການຜ່ານ ແອັບໂລກ້າ

289

ສະມາຄົມລົດຕູ້ນະຄອນຫຼວງວຽງຈັນ ຈັບມື ບໍລິສັດ ບີສຈິຕອລ ຈໍາກັດ ( ໂລກ້າ ) ໃຫ້ບໍລິການລົດຕູ້ຮັບສົ່ງທົ່ວນະຄອນຫຼວງວຽງຈັນ ໂດຍເອີ້ນບໍລິການຜ່ານແອັບພລິເຄຊັນ ( ໂລກ້າ ) ເທິງມືຖື, ປັດຈຸບັນມີລົດຕູ້ໃຫ້ບໍລິການ 30 ຄັນ ແລະ ຈະເພີ່ມເປັນ 240 ຄັນ.

ພິທີເຊັນສັນຍາຮ່ວມມືດັ່ງກ່າວ ຈັດຂຶ້ນໃນວັນທີ 28 ຕຸລາ 2019 ທີ່ສະພາການຄ້າ ແລະ ອຸດສາຫະກໍາແຫ່ງຊາດລາວ ( ສຄອຊ ) ລະຫວ່າງ ທ່ານ     ສຸລິໂຍ ວົງດາລາ ຜູ້ກໍ່ຕັ້ງ LOCA ແລະ ຜູ້ບໍລິຫານຝ່າຍເຕັກໂນໂລຊີຂອງ ບໍລິສັດ ບີສຈິຕອລ ຈໍາກັດ ກັບ ທ່ານ ບຸນຄໍ້າ ລາດຊະວົງ ປະທານສະມາຄົມລົດຕູ້ນະຄອນຫຼວງວຽງຈັນ, ເຊິ່ງແຂກຈາກພາກສ່ວນຕ່າງໆເຂົ້າຮ່ວມເປັນສັກຂີພິຍານ.

ທ່ານ ສຸລິໂຍ ວົງດາລາ ກ່າວວ່າ: ໂລກ້າ ແມ່ນບໍລິການເອີ້ນລົດຮັບສົ່ງຜ່ານແອັບພລິເຄຊັນ ດັ່ງນັ້ນການຈັບມືກັບສະມາຄົມລົດຕູ້ນະຄອນຫຼວງວຽງຈັນ ຈະເປັນການຫັນບໍລິການລົດຕູ້ໃນລາວໃຫ້ເປັນທັນສະໄໝ ເພີ່ມຄວາມສະດວກສະບາຍ ແລະ ມີຄວາມໂປ່ງໃສດ້ານລາຄາ.

ບາດກ້າວສໍາຄັນດັ່ງກ່າວເລີ່ມຕົ້ນຂຶ້ນຈາກການເຊັນສັນຍາຮ່ວມມືລະຫວ່າງ ໂລກ້າ ( LOCA ) ເຊິ່ງເປັນບໍລິການເອີ້ນລົດຮັບສົ່ງໂດຍສານຜ່ານແອັບພລິເຄຊັນເທິງມືຖື ( ດໍາເນີນການພາຍໃຕ້ ບໍລິສັດ ບີສຈິຕອລ ຈໍາກັດ ) ແລະ ສະມາຄົມລົດຕູ້ນະຄອນຫຼວງວຽງຈັນ.

ການເຊັນສັນຍາໃນຄັ້ງນີ້ມີເປົ້າໝາຍເພື່ອເຮັດໃຫ້ການບໍລິການລົດຕູ້ມີຄວາມທັນຍຸກທັນສະໄໝຫຼາຍຂຶ້ນ ຄຽງຄູ່ກັບການຫັນເປັນດິຈິຕອລ ພ້ອມທັງເຮັດໃຫ້ການບໍລິການມີ ຄວາມສະດວກສະບາຍ, ມີລາຄາທີ່ຊັດເຈນ ແລະ ເຮັດໃຫ້ຜູ້ຂັບລົດຕູ້ບໍລິການມີລາຍໄດ້ເພີ່ມ. ພ້ອມດຽວກັນນີ້, ໃນຝ່າຍຂອງ LOCA ການຮ່ວມມືໃນຄັ້ງນີ້ເປັນການຂະຫຍາຍບໍລິການໃຫ້ມີຄວາມຫຼາກຫຼາຍຂຶ້ນ ເຊິ່ງຫຼັງຈາກທີ່ເຊັນສັນຍາແລ້ວຈະມີການເພີ່ມບໍລິການຈອງລົດຕູ້ເຂົ້າມາ ແລະ ເບື້ອງຕົ້ນຈະມີລົດຕູ້ຮອງຮັບການໃຫ້ບໍລິການລູກຄ້າ ປະມານ 30 ຄັນ ແລະ ພາຍໃນ 1 ເດືອນຈະເພີ່ມຂຶ້ນເປັນ 240 ຄັນ ໃນອະນາຄົດ.

ໃນປັດຈຸບັນປະເພດລົດທີ່ສາມາດເອີ້ນໃຊ້ໄດ້ຜ່ານແອັບພລິເຄຊັນໂລກ້າ ສ່ວນໃຫຍ່ເປັນລົດເກັ໋ງ ມີທັງໝົດ 300 ຄັນ ທີ່ລົງທະບຽນເປັນຜູ້ຂັບ ແລະ ໃນອະນາຄົດອັນໃກ້ກໍຈະເພີ່ມບໍລິການໃໝ່ເຂົ້າມາອີກ ເຊັ່ນ LOCA Bike ເຊິ່ງເປັນບໍລິການລົດຈັກຮັບສົ່ງໂດຍສານ ແລະ ບໍລິການຈອງລົດຕູ້ທີ່ມີການເຊັນສັນຍາຮ່ວມມືກັນ.

ນອກຈາກນີ້, ໃນອະນາຄົດ ໂລກ້າ ຍັງມີແຜນຈະຂະຫຍາຍພື້ນທີ່ບໍລິການໃຫ້ ກວ້າງຂຶ້ນຈາກປັດຈຸບັນທີ່ໃຫ້ບໍລິການພຽງແຕ່ພື້ນທີ່ຕົວເມືອງນະຄອນຫຼວງວຽງຈັນ.

ສ່ວນລາຄາໃນເບື້ອງຕົ້ນ ແພັກເກັດທີ 1 ໃຫ້ບໍລິການລົດຕູ້ຜ່ານໂລກ້າ 3 ຊົ່ວໂມງ ຄິດໄລ່ 280.000 ກີບ ຂົນສົ່ງໄດ້ 8 ຄົນໄລຍະທາງ 80 ກິໂລແມັດ.

ທ່ານ ບຸນຄໍ້າ ລາດຊະວົງ ກ່າວວ່າ: ການຮ່ວມມືຄັ້ງນີ້ເພື່ອແກ້ໄຂບັນຫາຄວາມຫຍຸ້ງຍາກໃນການຈອງລົດ ເພື່ອເພີ່ມໂອກາດໃນການເພີ່ມຖ້ຽວໃຫ້ບໍລິການຂອງສະມາຊິກລົດຕູ້ ແລະ ເປັນການນໍາໃຊ້ເຕັກໂນໂລຊີທັນສະໄໝເຂົ້າມາຊ່ວຍໃນການບໍລິການຂອງສະມາຄົມລົດຕູ້.

[ ຂ່າວ: ພຸດຕີ້; ຮູບ: ສອນໄຊ ]

ທີ່ມາ: ໜັງສືພິມ ເສດຖະກິດ-ການຄ້າ