ກອງປະຊຸມສາມັນຄົບຄະນະບໍລິຫານງານ ສຊປລ ຄັ້ງທີ 5 ສະໄໝທີ VII ຫາລື 4 ບັນຫາຕົ້ນຕໍ

335

ກອງປະຊຸມສາມັນຄົບຄະນະບໍລິຫານງານສູນກາງຊາວໜຸ່ມປະຊາຊົນ ປະຕິວັດລາວ (ຄສຊປລ ) ຄັ້ງທີ 5 ສະໄໝທີ VII ໄດ້ໄຂຂຶ້ນໃນວັນທີ 28 ຕຸລາ 2019 ທີ່ສູນກາງຊາວໜຸ່ມ ປະຊາຊົນ ປະຕິວັດລາວ ( ສຊປລ ) ໂດຍເຂົ້າຮ່ວມຂອງ ທ່ານ ອາລຸນໄຊ ສູນນະລາດ ເລຂາຄະນະບໍລິຫານງານ ສູນກາງຊາວໜຸ່ມປະຊາຊົນ ປະຕິວັດລາວ ພ້ອມດ້ວຍຜູ້ຕາງໜ້າຈາກສູນກາງ ແນວລາວສ້າງຊາດ ແລະ ສະພາແຫ່ງຊາດ, ບັນດາເລຂາຊາວໜຸ່ມຂອງແຕ່ລະແຂວງໃນຂອບເຂດທົ່ວປະເທດ ແລະ ອ້າຍເອື້ອຍນ້ອງຊາວໜຸ່ມທັງຫຼາຍເຂົ້າຮ່ວມ.

ໂອກາດນີ້, ທ່ານ ອາລຸນໄຊ ສູນນະລາດ ໄດ້ກ່າວວ່າ: ກອງປະຊຸມສາມັນຄົບຄະນະບໍລິຫານງານ ສຊປ ໃນຄັ້ງນີ້ ແມ່ນມີຄວາມໝາຍສຳຄັນທີ່ສຸດ ເຊິ່ງເປັນກອງປະຊຸມເພື່ອກຳນົດທິດທາງ ແລະ ການຈັດກອງປະຊຸມໃຫຍ່ຄະນະບໍລິຫານງານຊາວໜຸ່ມທົ່ວປະເທດ, ເປັນຂີດໝາຍສຳຄັນຂອງຊາວໜຸ່ມ ໂດຍກອງປະຊຸມຄັ້ງນີ້ແມ່ນເພື່ອສະຫຼຸບຕີລາຄາ ແລະ ປຶກສາຫາລືຫຼາຍບັນຫາສຳຄັນຂອງຄະນະຊາວໜຸ່ມ ເປັນເວລາ 3 ວັນ, ເລີ່ມຈາກວັນທີ 28 ຫາ 30 ຕຸລາ 2019 ເພື່ອລົງເລິກໃນການຄົ້ນຄວ້າ 4 ບັນຫາໃຫຍ່ ຄື:

1 ທົບທວນ ແລະ ຕີລາຄືນກ່ຽວກັບການຈັດຕັ້ງປະຕິບັດມະຕິກອງປະຊຸມສາມັນຄົບຄະນະບໍລິຫານງານ ສຊປລ ຄັ້ງທີ 4 ແລະ ວາງທິດທາງແຜນການເພື່ອກຽມສູ່ກອງປະຊຸມໃຫຍ່ຜູ້ແທນຊາວໜຸ່ມທົ່ວປະເທດ, ເຊື່ອມຊຶມ 2 ນິຕິກຳທີ່ສຳຄັນ ອັນເປັນຂີດໝາຍສຳຄັນຂອງການຈັດຕັ້ງຊາວໜຸ່ມໃນການແນະນຳສຶກສາອົບຮົມຊາວໜຸ່ມໃນສະໄໝໃໝ່ທີ່ ສຊປລ ໄດ້ກະກຽມມາແຕ່ສະໄໝທີ I ຈົນເຖິງສະໄໝທີ VII ພ້ອມດ້ວຍເອກະສານຊົມເຊີຍຍ້ອງຍໍຊາວໜຸ່ມ – ເຍົາວະຊົນ ໃນຂອບເຂດທົ່ວປະເທດ ເພື່ອເປັນບ່ອນອີງໃນການຍ້ອງຍໍຕໍ່ບຸກຄົນ ແລະ ການຈັດຕັ້ງຊາວໜຸ່ມ, ຄົ້ນຄວ້າ ແລະ ຮັບຮອງແຜນດຳເນີນງານກອງປະຊຸມໃຫຍ່ຜູ້ແທນຊາວໜຸ່ມທົ່ວປະເທດ ຄັ້ງທີ VIII ແລະ ແຕ່ງຕັ້ງຄະນະຮັບຜິດຊອບ ແລະ ຄົ້ນຄວ້າຮັບຮອງເອົາບັນດາສະຫາຍຄະນະບໍລິຫານງານ ສຊປລ ໃນສະໄໝທີ VII ທີ່ວ່າງລົງຕາມກົດໝາຍ ແລະ ລະບຽບຊາວໜຸ່ມ.

2 ຜ່ານບົດສໍາຫຼວດການນຳພາລວມຂອງ ຄະນະບໍລິຫານງານ ສຊປລ ສະໄໝທີ VII.

3 ທາບທາມກົດໝາຍສະບັບໃໝ່ ວ່າດ້ວຍຊາວໜຸ່ມລາວ ເພື່ອກຽມເຂົ້າສູ່ກອງປະຊຸມສະໄໝສາມັນ ເທື່ອທີ IX ຂອງສະພາແຫ່ງຊາດ ຊຸດທີ VIII.

4 ເພື່ອເຕົ້າໂຮມບັນດາແກນນຳຊາວໜຸ່ມ ໂດຍສະເພາະແມ່ນບັນດາສະຫາຍທີ່ມີການປັບປຸງໃໝ່.

ນອກນັ້ນ, ທ່ານຍັງຮຽກຮ້ອງໃຫ້ບັນດາຄະນະບໍລິຫານງານຊາວໜຸ່ມຈົ່ງພ້ອມກັນຕັ້ງໜ້າເຊີດຊູຄວາມຮັບຜິດຊອບ, ສຸມສະຕິປັນຍາເຂົ້າໃນການຄົ້ນຄວ້າ, ປະກອບຄຳເຫັນໃຫ້ລະອຽດເລິກເຊິ່ງ ມີເຫດມີຜົນ ແລະ ພາວະວິໄສ, ຫຼີກເວັ້ນການປະກອບຄຳເຫັນແບບລວມໆ ໂດຍສະເພາະແມ່ນບັນດາເນື້ອໃນກະກຽມສູ່ກອງປະຊຸມໃຫຍ່ຜູ້ແທນຊາວໜຸ່ມທົ່ວປະເທດ ຄັ້ງທີ VIII ໃຫ້ປະສົບຜົນສຳເລັດດີ ແລະ ມີເນື້ອໃນເລິກເຊິ່ງ.

( ຂ່າວ: ກາວຊົ່ງ; ຮູບ: ສອນໄຊ )

ທີ່ມາ: ໜັງສືພິມ ເສດຖະກິດ-ການຄ້າ