ລາຍການໃໝ່ໂທລະພາບນະຄອນຫຼວງ ຈະເລີ່ມທົດລອງອອກອາກາດທ້າຍປີນີ້

288

ບໍລິສັດ ສາມເອັສພັດທະນາ ຈໍາກັດຜູ້ດຽວ ຈັບມືກັບກອງວິຊາການວິທະຍຸ – ໂທລະພາບນະຄອນຫຼວງວຽງຈັນ ເພື່ອຮ່ວມກັນຜະລິດລາຍການສະໜອງຂໍ້ມູນ – ຂ່າວສານບ້ານເມືອງທີ່ເກີດຂຶ້ນໃນ 9 ຕົວເມືອງຂອງນະຄອນຫຼວງ ໃຫ້ທຸກຄົນໄດ້ຮູ້ກ່ອນໃຜ. ດ້ານປະທານບໍລິສັດເປີດເຜີຍວ່າ: ເຖິງວ່າທ່າອ່ຽງຂອງສື່ຈະຢູ່ໃນໄລຍະຂາລົງກໍຕາມ ແຕ່ການມີແຜນຍຸດທະສາດທີ່ດີຈະເຮັດໃຫ້ເຮົາສາມາດກ້າວຂ້າມ ແລະ ເຕີບໂຕຢ່າງໝັ້ນຄົງ.

ທ່ານ ພອນປະເສີດ ອິນທະສອນ ປະທານ ບໍລິສັດ ສາມເອັສພັດທະນາ ຈໍາກັດຜູ້ດຽວ ກ່າວວ່າ: ຕົນເອງມີຄວາມສົນໃຈໃນຂະແໜງສື່ມວນຊົນຈຶ່ງຢາກພັດທະນາວົງການນີ້ໃຫ້ສາມາດທຽບເທົ່າກັບພາກພື້ນ ແລະ ສາກົນ ໂດຍສະເພາະແມ່ນການສະໜອງຂໍ້ມູນ – ຂ່າວສານທີ່ໜ້າສົນໃຈໃຫ້ສັງຄົມໄດ້ຮັບຮູ້ຢ່າງທັນການ. ໃນເບື້ອງຕົ້ນພວກເຮົາຈະເນັ້ນໃສ່ການຜະລິດໂຄສະນາ, ຜະລິດລາຍການ SME, ຂ່າວດ່ວນ ແລະ ເຫດການຕ່າງໆທີ່ເກີດຂຶ້ນຢູ່ໃນ 9 ຕົວເມືອງຂອງນະຄອນຫຼວງ.

ທ່ານ ສົມປະສົງ ສົມພັກດີ ຜູ້ອໍານວຍການສະຖານີວິທະຍຸ – ໂທລະພາບ ນະຄອນຫຼວງວຽງຈັນ ກ່າວວ່າ: ປັດຈຸບັນການກໍ່ສ້າງ ແລະ ຕິດຕັ້ງອຸປະກອນຕ່າງໆໄດ້ສໍາເລັດໂດຍພື້ນຖານ ເມື່ອວັນທີ 15 ສິງຫາ 2019 ພວກເຮົາໄດ້ເຊັນສັນຍາເຊົ່າດາວທຽມກັບ ບໍລິສັດ ດາວທຽມລາວເອເຊຍ – ປາຊີຟິກ ຈໍາກັດ ແລະ ມາເຖິງວັນທີ 23 ສິງຫາ 2019 ຈຶ່ງໄດ້ເປີດຊ່ອງໂທລະພາບດັ່ງກ່າວເປັນຊ່ອງ 9 ໂດຍຄູ່ຮ່ວມພັດທະນານັ້ນກໍຄື ບໍລິສັດ ສາມເອັສ ເປັນຜູ້ທີ່ມີເງື່ອນໄຂທີ່ໄດ້ກະກຽມທາງດ້ານເຄື່ອງມື, ບຸກຄະລາກອນ, ພາຫະນະ ແລະ ອື່ນໆ ຄາດວ່າຈະໄດ້ທົດລອງອອກອາກາດໃນທ້າຍປີນີ້.

ພິທີເຊັນສັນຍາດັ່ງກ່າວ ຈັດຂຶ້ນໃນວັນທີ 28 ຕຸລາ 2019 ທີ່ສະຖານີດັ່ງກ່າວ ລະຫວ່າງ ທ່ານ ພອນປະເສີດ ອິນທະສອນ ປະທານ ບໍລິສັດ ສາມເອັສພັດທະນາ ຈໍາກັດຜູ້ດຽວ ກັບ ທ່ານ ສົມປະສົງ ສົມພັກດີ ຜູ້ອໍານວຍການສະຖານີວິທະຍຸ – ໂທລະພາບນະຄອນຫຼວງວຽງຈັນ ໃຫ້ກຽດເຂົ້າຮ່ວມຂອງ ທ່ານ ນາງ ວິໄລວອນ ຈັນທະລາຕີ ຫົວໜ້າພະແນກ ຖວທ ນະຄອນຫຼວງວຽງຈັນ ພ້ອມດ້ວຍແຂກ  ຖືກເຊີນເຂົ້າຮ່ວມ.

[ ຂ່າວ: ສົມສະຫວິນ, ບໍລິສັດ ສາມເອັສ ]

ທີ່ມາ: ໜັງສືພິມ ເສດຖະກິດ-ການຄ້າ