ຍົກລະດັບຄວາມຮູ້ໃຫ້ກຸ່ມປູກຜັກປອດສານພິດບ້ານໂພນສິມ

357

ໃນທ້າຍອາທິດທີ່ຜ່ານມາ, ສູນກາງສະຫະພັນກຳມະບານລາວ ຮ່ວມກັບ ສະຫະພັນກຳມະບານແຂວງສະຫວັນນະເຂດ ໄດ້ມີການຈັດຝຶກອົບຮົມການຂະຫຍາຍແນວພັນພືດ ໃຫ້ແກ່ກຸ່ມປູກຜັກປອດສານພິດບ້ານໂພນສິມ ຂຶ້ນຢ່າງເປັນທາງການທີ່ສະພາບ້ານດັ່ງກ່າວ ໂດຍການເຂົ້າຮ່ວມຂອງທ່ານນາງ ພົມມາ ທອງເພັງ ຮອງປະທານ ຄະນະບໍລິຫານງານສະຫະພັນກຳມະບານແຂວງ, ມີ ທ່ານ ບຸນທັນ ໄຊຍະວົງ ຮອງຫົວໜ້າພະແນກປົກປ້ອງແຮງງານສູນກາງສະຫະພັນກຳມະບານລາວ,ມີ ທ່ານ ປອ ໂຄສະດາ ວົງຊະນະ ຄະນະກະເສດສາດມະຫາວິທະຍາໄລແຫ່ງຊາດ, ມີຜູ້ຕາງໜ້າຈາກອົງການ 3 ຝ່າຍຂັ້ນແຂວງ ຕະຫຼອດຮອດປະຊາຊົນກຸ່ມປູກຜັກປອດສານພິດບ້ານໂພນສິມເຂົ້າຮ່ວມ ຈຳນວນ 40 ທ່ານ, ຍິງ 22 ທ່ານ.

ໃນຊຸດຝຶກອົບຮົມຄັ້ງນີ້ ທ່ານ ປອ ໂຄສະດາ ວົງຊະນະ ກໍ່ໄດ້ຍົກໃຫ້ເຫັນເຖິງ ຫຼັກການຄັດເລືອກ ແລະ ຂະຫຍາຍແນວພັນ, ພືດທີ່ຂະຫຍາຍດ້ວຍເພດທີ່ບໍ່ຕ້ອງການແສງ ແລະ ພືດທີ່ຕ້ອງການແສງ, ການກະກຽມແນວພັນ, ສະຖານທີ່ປູກ, ການບົວລະບັດຮັກສາພໍ່ພັນແມ່ພັນ, ການຮັກສາເມັດພັນ, ການກ້າແກ່ນ, ແກ່ນພືດແບບແຫ້ງ, ແກ່ນພືດແບບປຽກ ແລະ ອື່ນໆ

ຊຶ່ງໄດ້ຮັບຄວາມສົນອົກສົນໃຈຈາກຜູ້ເຂົ້າຮ່ວມ ສະເໜີຖາມ-ຕອບ ຢ່າງເປັນຂະບວນຟົດຟື້ນ, ນອກນີ້ ປະທານກຸ່ມປູກຜັກປອດສານພິດຍັງໄດ້ນຳພາ ຄະນະ ແລະ ຄູຝຶກລົງເບິ່ງສະຖານທີ່ປູກພຶດຕົວຈິງ ເພື່ອໃຫ້ຄູຝຶກສາທິດວິທີການ ແລະ ແນະນຳຢ່າງລະອຽດ ໃນການຂະຫຍາຍແນວພັນພືດໃຫ້ແກ່ກຸ່ມປູກຜັກຂອງຕົນໃຫ້ໄດ້ຮັບຮູ້ຢ່າງທົ່ວເຖິງ ເພື່ອເປັນແນວທາງໃນການຂະຫຍາຍແນວພັນພືດດ້ວຍຕົນເອງໃນອານາຄົດ.

ຂ່າວ – ພາບ : ວັນນະເລດ ມະນີວົງ