ໄຟໄໝ້ເຮືອນປະຊາຊົນ ເມືອງຫົວເມືອງ ຄາດເສຍຫາຍ 2 ຕື້ກວ່າກີບ

259

ເວລາ 17:00 ໂມງ ຂອງວັນທີ 22 ຕຸລາ ເກີດເຫດໄຟໄໝ້ເຮືອນປະຊາຊົນບ້ານສົ້ນຂົວ ເມືອງຫົວເມືອງ ແຂວງຫົວພັນ, ບ້ານດັ່ງກ່າວ ມີ 178 ຫຼັງຄາເຮືອນ, ມີພົນລະເມືອງທັງໝົດ 951 ຄົນ ຍິງ 458 ຄົນ, ມີເຮືອນທີ່ຖືກຜົນກະທົບຈາກອັນຄີໄພໃນຄັ້ງນີ້ ຈໍານວນ 30 ຫຼັງຄາເຮືອນ. ໃນນີ້, ໄໝ້ໝົດກ້ຽງ 23 ຫຼັງ ແລະ 7 ຫຼັງ ແມ່ນໄໝ້ເສຍຫາຍ 30%, ຄາດຄະເນຜົນເສຍຫາຍທັງໝົດປະມານ 2 ຕື້ກວ່າກີບ, ສາເຫດທີ່ພາໃຫ້ເກີດອັກຄີໄພໃນຄັ້ງນີ້ຍັງບໍສາມາດລະບຸໄດ້ຊັດເຈນເທືຶ່ອ, ຕາມການບອກເລົ່າຂອງປະຊາຊົນຜູ້ຢູ່ໃນເຫດການວ່າ: ໄດ້ຍິນສຽງແຕກດັງຂຶ້ນຢູ່ເຮືອນ ທ້າວ ສົມດີ ແລ້ວກໍເກີດມີແປວໄຟລຸກຂຶ້ນແຜ່ລາມໄປຢ່າງໄວວາ ເພາະໂຄງສ້າງຂອງແຕ່ລະເຮືອນເປັນເຮືອນຮ້ານບ້ານເສົາດັ້ງເດີມທີ່ປຸກສ້າງດ້ວຍໄມ້ 100% ແລະ ຕັ້ງຢູ່ແອອັດ.

ຕໍ່ກັບເຫດການດັ່ງກ່າວ ວັນທີ 23 ຕຸລານີ້ ທ່ານ ພູໂຊນ ທໍາມະວິໄຊ ຮອງເຈົ້າແຂວງຫົວພັນ ໄດ້ລົງຕິດຕາມສະພາບການ ພ້ອມທັງນໍາເອົາເງິນຈໍານວນໜຶ່ງມອບໃຫ້ຈໍານວນຄອບຄົວທີ່ໄດ້ຮັບຜົນກະທົບຈາກເຫດການດັ່ງກ່າວຕື່ມອີກ.

ໃນປັດຈຸບັນນີ້ພາກສ່ວນທີ່ກ່ຽວຂ້ອງຂັ້ນແຂວງ, ເມືອງ ແລະ ພາກສ່ວນຕ່າງໆ ພວມເລັ່ງໃຫ້ການຊ່ວຍເຫຼືອແກ່ຄອບຄົວຜູ້ທີ່ໄດ້ຮັບຜົນກະທົບ ພ້ອມທັງຈັດແຈງທີ່ພັກເຊົາຊົ່ວຄາວ ແລະ ໄດ້ນໍາເອົາສັງກະສີ, ເຄື່ອງນຸ່ງຮົ່ມ, ເຄື່ອງໃຊ້ຊອຍປະຈໍາວັນທີ່ຈໍາເປັນຈໍານວນໜຶ່ງລົງຊ່ວຍເຫຼືອໃນເບື້ອງຕົ້ນແລ້ວ.

( ຂ່າວ: ງຸດ ວິໄລຄຳ )

ທີ່ມາ: ໜັງສືພິມ ເສດຖະກິດ-ການຄ້າ