ລາວ ທ໊ອບທີ ເອັກໂປ ຈະຍູ້ຂະແໜງອະສັງຫາລິມະຊັບເຕີບໂຕຫຼາຍຂຶ້ນ

359

ງານວາງສະແດງສິນຄ້າ LAO TOP 3 EXPO 2020 ຈະກັບມາອີກຄັ້ງເປັນປີທີ 4 ເພື່ອສະໜັບສະໜູນການເຕີບໂຕທາງດ້ານອາຄານ, ວັດສະດຸກໍ່ສ້າງ, ໂຄງສ້າງພື້ນຖານ, ອາຫານ, ເຄື່ອງດື່ມ ແລະ ສິ່ງອໍານວຍຄວາມສະດວກໃນການບໍລິການ ທີ່ຈະຈັດຂຶ້ນທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ ເລີ່ມວັນທີ 11 – 13 ມິຖຸນາ 2020.

ພິທີຖະແຫຼງຂ່າວໄດ້ຈັດຂຶ້ນໃນວັນທີ 25 ຕຸລາ 2019 ທີ່ໂຮງແຮມເບສເວສເທີ້ນວຽງຈັນ ນະຄອນຫຼວງວຽງຈັນ ໂດຍມີ ທ່ານ ພອນໄຊ ສຸດທິພົງ ປະທານສະມາຄົມສະຖາປະນິກ ແລະ ວິສະວະກອນກໍ່ສ້າງລາວ ( ສສວ ), ທ່ານ    ປະກາສິດ ຈັນທະປັນຍາປະທານສະມາຄົມໂຮງແຮມ ແລະ ຮ້ານອາຫານລາວ ( ສຮຮລ ) ແລະ ທ່ານ ພູໄຊ ເທບພະວົງ ເລຂາທິການສະພາການຄ້າ ແລະ ອຸດສາຫະກໍາແຫ່ງຊາດລາວ ( ສຄອຊ ) ແລະ ພ້ອມດ້ວຍແຂກທີ່ຖືກເຊີນເຊົ້າຮ່ວມ.

ທ່ານ ພອນໄຊ ສຸດທິພົງ ກ່າວວ່າ: ງານວາງສະແດງລະດັບສາກົນໃນຄັ້ງນີ້ ແມ່ນຈະຖືກຈັດໃຫ້ດີກວ່າງານທີ່ຜ່ານມາ ຄາດວ່າຈະສາມາດດຶງດູດໄດ້ຫຼາຍກວ່າ 200 ບໍລິສັດຈາກພາຍໃນ ແລະ ຕ່າງປະເທດ ພ້ອມທັງຍີ່ຫໍ້ຊັ້ນນໍາຈາກປະເທດຕ່າງໆ ເຊັ່ນ: ຈີນ, ອິນເດຍ, ອິຕາລີ, ມາເລເຊຍ, ໄທ ແລະ ສິງກະໂປ ເຊິ່ງຄາດວ່າຈະເຂົ້າຮ່ວມເປັນກຸ່ມຂອງແຕ່ລະປະເທດ. ງານ LAO TOP 3 EXPO ຈະເປັນເວທີ ແລະ ສື່ກາງຂອງການສະແດງໃຫ້ແກ່ບໍລິສັດ, ຍີ່ຫໍ້ ແລະ ຜູ້ຊໍານານຈາກອຸດສາຫະກໍາທີ່ໄດ້ກ່າວມານັ້ນ ເພື່ອພັດທະນາ ແລະ ຂະຫຍາຍເຄືອຂ່າຍທຸລະກິດຂອງພວກເຂົາຢູ່ໃນ ສປປ ລາວ.

ທ່ານ ປະກາສິດ ຈັນທະປັນຍາ ກ່າວວ່າ: ສຳລັບສະມາຄົມໂຮງແຮມ ແລະ ຮ້ານອາຫານລາວ ແມ່ນຈະມີກິດຈະກຳຈັດການແຂ່ງຂັນຕົກແຕ່ງສິ່ງອໍານວຍຄວາມສະດວກໃນການບໍລິການ ແລະ ການປຸງແຕ່ງອາຫານ 2020 ຈະມີການມອບລາງວັນໃຫ້ແກ່ຜູ້ທີ່ມີຄວາມສາມາດ, ທັກສະ ແລະ ການຈັດສະແດງທາງດ້ານອຸດສາຫະກໍາໂຮງແຮມ, ຮ້ານອາຫານ ແລະ ກາເຟທີ່ດີທີ່ສຸດ ເຊິ່ງເນັ້ນໃສ່ການສະແດງຄວາມເປັນລາວໃນຈຸດໝາຍຂອງການປຸງແຕ່ງອາຫານ, ການແຂ່ງຂັນແມ່ນລວມເປັນໝວດໝູ່ ເຊັ່ນ: ການປຸງແຕ່ງອາຫານ, ການແຕ່ງເຄື່ອງດື່ມ, ການປຸງແຕ່ງ ແລະ ຕົກແຕ່ງໜ້າເຄັກ, ການແກະສະຫຼັກໝາກໄມ້ ແລະ ຜັກ, ການຈັດໂຕະ, ການຕົກແຕ່ງຕຽງນອນ ແລະ ການສະແດງການປຸງແຕ່ງອາຫານ ( ປະກອບດ້ວຍການແຂ່ງຂັນປຸງແຕ່ງອາຫານຮ້ອນ ).

ນອກນັ້ນ, ພາຍໃນງານຍັງຈະໄດ້ຈັດງານ LAO ENERGY 2020 ງານວາງສະແດງສິນຄ້າລະດັບສາກົນທາງດ້ານພະລັງງານສະໄໝໃໝ່, ການສົ່ງຜ່ານ, ການແຈກຢາຍ ແລະ ວິສະວະກໍາໄຟຟ້າ; ງານ LIVAR 2020 ເປັນງານວາງສະແດງສິນຄ້າລະດັບສາກົນທາງດ້ານລະບົບການລະບາຍອາກາດ, ເຄື່ອງປັບອາກາດ ແລະ ເຄື່ອງຜະລິດຄວາມເຢັນ ແລະ ງານ LAOCAFE 2020 ເປັນງານວາງສະແດງສິນຄ້າລະດັບສາກົນທາງດ້ານກາເຟ, ອຸປະກອນ ແລະ ຜູ້ສະໜອງເຄື່ອງໃຊ້ໃນຮ້ານອາຫານ ເຊິ່ງຈັດໂດຍ ກຸ່ມບໍລິສັດ ເອເອັມບີ ທາສັສ ອີເວັ້ນ ໜຶ່ງໃນຜູ້ຈັດງານທີ່ໃຫຍ່ທີ່ສຸດໃນຂົງເຂດ.

( ຂ່າວ: ສົມລົດ; ຮູບ: ນັນທະເສນ )

ທີ່ມາ: ໜັງສືພິມ ເສດຖະກິດ-ການຄ້າ