ທຳລາຍນ້ຳມັນເຄື່ອງປອມ ມູນຄ່າ 150 ລ້ານກວ່າກີບ

391

ກະຊວງອຸດສາຫະກຳ ແລະ ການຄ້າ ຮ່ວມກັບພາກສ່ວນກ່ຽວຂ້ອງ ທຳລາຍນ້ຳມັນເຄື່ອງປອມແປງຍີ່ຫໍ້ຮອນດ້າ ລຸ້ນ 4T, ມີ 6 ພັນກວ່າຕຸກ, ມູນຄ່າ 150 ລ້ານກວ່າກີບ ທີ່ຢຶດໄດ້ຢູ່ບັນດາຮ້ານໃນນະຄອນຫຼວງວຽງຈັນ.

ພິທີທຳລາຍສິນຄ້າປອມແປງດັ່ງກ່າວ ໄດ້ມີຂຶ້ນໃນວັນທີ 25 ຕຸລາ 2019 ໂດຍການເຂົ້າຮ່ວມຂອງ ທ່ານ ສູນທອນ ຈັນທິລາດ ຮອງຫົວໜ້າກົມການຄ້າພາຍໃນ  ກະຊວງອຸດສາຫະກຳ ແລະ ການຄ້າ ( ອຄ ); ມີບັນດາທ່ານຈາກຕາງໜ້າກົມຊັບສິນທາງປັນຍາ, ກະຊວງວິທະຍາສາດ ແລະ ເຕັກໂນໂລຊີ; ກົມພາສີ ກະຊວງການເງິນ ແລະ ພາກສ່ວນກ່ຽວຂ້ອງເຂົ້າຮ່ວມ.

ທ່ານ ສູນທອນ ຈັນທິລາດ ກ່າວວ່າ: ໂດຍປະຕິບັດຕາມກົດໝາຍປົກປ້ອງຜູ້ຊົມໃຊ້ ສະບັບເລກທີ 02/ພສຊ ລົງວັນທີ 30 ມິຖຸນາ 2010 ແລະ ດຳລັດວ່າດ້ວຍການກວດກາການຄ້າ ສະບັບເລກທີ  508/ລບ ລົງວັນທີ 4 ທັນວາ 2012 ກະຊວງ ອຄ ໄດ້ມອບໃຫ້ກົມການຄ້າພາຍໃນ ປະຕິບັດວຽກງານກວດກາການຄ້າພາຍໃນ ແຕ່ງຕັ້ງເຈົ້າໜ້າທີ່ລົງກວດກາເປົ້າໝາຍຈຳໜ່າຍສິນຄ້າປອມແປງຮຽບແບບເຄື່ອງໝາຍການຄ້າຍີ່ຫໍ້ຮອນດ້າ ຢູ່ໃນນະຄອນຫຼວງວຽງຈັນ ພາຍຫຼັງມີການແຈ້ງເບາະແສ ແລະ ຜ່ານການກວດກາຕົວຈິງ ສາມາດຢຶດສິນຄ້າປະເພດນ້ຳມັນເຄື່ອງທີ່ມີເຄື່ອງໝາຍການຄ້າຍີ່ຫໍ້ຮອນດ້າ ທີ່ປອມແປງຮຽນແບບເຄື່ອງໝາຍຂອງ ບໍລິສັດ ຮອນດ້າ ແລະ ບໍ່ໄດ້ຮັບອະນຸຍາດ ຫຼື ບໍ່ໄດ້ຮັບລິຂະສິດຈາກພາກສ່ວນທີ່ກ່ຽວຂ້ອງຢ່າງຖືກຕ້ອງ ເຊິ່ງເປັນການລະເມີດກົດໝາຍວ່າດ້ວຍຊັບສິນທາງປັນຍາ     ( ສະບັບປັບປຸງ ) ສະບັບເລກທີ 38/ສພຊ ລົງວັນທີ 15 ພະຈິກ 2017 ແລະ ຂໍ້ຕົກລົງວ່າດ້ວຍການປະຕິບັດວຽກງານກວດກາການຄ້າ ສະບັບເລກທີ 1499/ອຄ.ກຄພນ ລົງວັນທີ 8 ກັນຍາ 2017 ນໍ້າມັນເຄື່ອງປອມແປງຮຽນແບບທີ່ຢຶດມາ ແລະ ທຳລາຍໃນຄັ້ງນີ້ ມີ: ນໍ້າມັນເຄື່ອງລຸ້ນ 4T ຝາສີແດງ 1 ລິດ, ນໍ້າມັນເຄື່ອງລຸ້ນ 4T ຝາສີແດງ 0,7 ລິດ, ນໍ້າມັນເຄື່ອງລຸ້ນ 4T ຝາສີປອນ 0,7 ລິດ, ນໍ້າມັນເຄື່ອງ ລຸ້ນ 4T ຝາສີຟ້າ 0,8 ລິດ ລວມທັງໝົດ 6.490 ຕຸກ, ປະລິມານ 4.699 ລິດ, ຄິດເປັນມູນຄ່າ 154.368.000 ກີບ.

ການທຳລາຍໃນຄັ້ງນີ້ແມ່ນໄດ້ໃຊ້ວິທີການເທປົນໃສ່ກັບນ້ຳມັນດຳຂອງ ໂຮງງານກັ່ນນ້ຳມັນໃຈຍະຫວາດ ເພື່ອນຳໄປກັ່ນຕອງຄືນໃໝ່ ເຊິ່ງການທຳລາຍວິທີນີ້ກໍເພື່ອເປັນການຮັກສາສິ່ງແວດລ້ອມ.

ທ່ານໃຫ້ຮູ້ຕື່ມອີກວ່າ: ຫາກພົບເຫັນສິນຄ້າປອມແປງສາມາດແຈ້ງມາຍັງສາຍດ່ວນ 1510 ສາຍດ່ວນປົກປ້ອງຜູ້ຊົມໃຊ້ ແລະ ເນັ້ນໃຫ້ເຈົ້າໜ້າທີ່ທີ່ກ່ຽວຂ້ອງ ໂດຍສະເພາະເຈົ້າໜ້າທີ່ປະຈຳດ່ານ ກໍໃຫ້ມີ ຄວາມເຂັ້ມງວດສະກັດກັ້ນແຕ່ຕົ້ນທາງ ບໍ່ໃຫ້ຜູ້ສວຍໂອກາດລັກນຳເຂົ້າມາຈຳໜ່າຍພາຍໃນ.

ສ່ວນຮ້ານທີ່ຈຳສິນຄ້າດັ່ງຈຳໜ່າຍກໍໄດ້ມີການປັບໃໝ ພ້ອມເຮັດບົດບັນທຶກຕາມລະບຽບກົດໝາຍ.

ທີ່ມາ: ໜັງສືພິມ ເສດຖະກິດ-ການຄ້າ