ມອບ – ຮັບໜ້າທີ່ເລຂາທິການສະພາປະຊາຊົນແຂວງຫົວພັນ

286

ໂດຍປະຕິບັດຕາມມະຕິຂອງກອງປະຊຸມສະໄໝວິສາມັນ ຂອງສະພາປະຊາຊົນແຂວງ ແລະ ຂໍ້ຕົກລົງຂອງທ່ານເຈົ້າແຂວງ ວ່າດ້ວຍການຍົກຍ້າຍ ແລະ ແຕ່ງຕັ້ງບຸກຄະລາກອນຂອງສະພາປະຊາຊົນແຂວງຫົວພັນ. ຫຼ້າສຸດ, ໃນວັນທີ 21 ຕຸລາ 2019 ຜ່ານມາ ສະພາປະຊາຊົນແຂວງຫົວພັນ ໄດ້ຈັດພິທີມອບ – ຮັບໜ້າທີ່ເລຂາທິການສະພາປະຊາຊົນແຂວງຫົວພັນ ລະຫວ່າງ ທ່ານ ນາງ ສວຍເພັດ ທອງສົມບັດ ເລຂາທິການສະພາປະຊາຊົນແຂວງຫົວພັນ ຜູ້ເກົ່າ ແລະ ທ່ານ ສົມສັກ ດອນຈານິດ ສະມາຊິກສະພາປະຊາຊົນແຂວງ, ຮອງຫົວໜ້າພະແນກກວດກາລັດແຂວງຫົວພັນ ເປັນເລຂາທິການສະພາປະຊາຊົນແຂວງ ຜູ້ໃໝ່.

ໃຫ້ກຽດເຂົ້າຮ່ວມຂອງ ທ່ານ ຄຳວອນ ບຸນທະວົງ ປະທານສະພາປະຊາຊົນແຂວງ, ທ່ານ ນາງ ແພງ ກັນຍາພິມ ຮອງເຈົ້າ       ແຂວງຫົວພັນ, ມີຄະນະປະຈຳສະພາປະຊາຊົນແຂວງ, ສະມາຊິກສະພາປະຊາຊົນແຂວງ, ຜູ້ຕາງໜ້າຈາກພາກສ່ວນທີ່ກ່ຽວຂ້ອງ, ຕະຫຼອດຮອດພະນັກງານ – ລັດຖະກອນເຂົ້າຮ່ວມ.

ໃນພິທີ ທ່ານ ນາງ ສວຍເພັດ ທອງສົມບັດ ໄດ້ລາຍງານກ່ຽວກັບສະພາບການເຄື່ອນໄຫວການຈັດຕັ້ງປະຕິບັດໜ້າທີ່ວຽກງານເລຂາທິການຢູ່ສະພາປະຊາຊົນແຂວງ ຕະຫຼອດໄລຍະຜ່ານມາ ແລະ ໜ້າວຽກທີ່ຈະຕ້ອງສືບຕໍ່ແກ້ໄຂໃນຕໍ່ໜ້າ.

ໂອກາດນີ້, ທ່ານ ນາງ ແພງ ກັນຍາພິມ ໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ໝາກຜົນທີ່ເລຂາທິການສະພາປະຊາຊົນແຂວງ ສາມາດຍາດມາໄດ້ໃນໄລຍະທີ່ຜ່ານມາ. ພ້ອມດຽວກັນນີ້, ທ່ານຍັງໄດ້ຊີ້ນຳໃຫ້ເລຂາທິການສະພາປະຊາຊົນແຂວງຜູ້ໃໝ່ ໃຫ້ເອົາໃຈໃສ່ ແລະ ເພີ່ມທະວີ ຄວາມຮັບຜິດຊອບຕໍ່ໜ້າທີ່ວຽກງານຂອງຕົນໃນການຊີ້ນຳ – ນໍາພາ ແລະ ເປັນເສນາທິການໃຫ້ແກ່ອົງການປົກຄອງແຂວງ ຫົວພັນ ແລະ ສະພາປະຊາຊົນແຂວງໃນການປະຕິບັດໜ້າທີ່ຕາມພາລະບົດບາດ, ສິດ ແລະ ໜ້າທີ່ຂອງຕົນ.

ຈາກນັ້ນ, ທ່ານ ສົມສັກ ດອນຈານິດ ກ່າວສະແດງ ຄວາມຮູ້ບຸນຄຸນມາຍັງຄະນະປະຈຳພັກແຂວງ ທີ່ໄດ້ໃຫ້ຄວາມໄວ້ເນື້ອເຊື່ອໃຈ ແລະ ໄດ້ມອບໝາຍໜ້າທີ່ສຳຄັນນີ້, ຈະສືບຕໍ່ຮັກສາມູນເຊື້ອອັນດີງາມ ແລະ ຈະສຸມສະຕິປັນຍາເພື່ອຕອບສະໜອງກັບຄວາມຮຽກຮ້ອງຕ້ອງການໃນໜ້າທີ່ວຽກງານໃນຕໍ່ໜ້າໃຫ້ດີຂຶ້ນ.

[ ຂ່າວ: ສົມສະຫວິນ, ຮູບ: ແຂວງຫົວພັນ ]

ທີ່ມາ: ໜັງສືພິມ ເສດຖະກິດ-ການຄ້າ