ພິທີຕັນ ແລະ ອ່ວຍນ້ຳ ໂຄງການກໍ່ສ້າງເຂື່ອນໄຟຟ້ານ້ຳງື່ມ 4

329

ໃນວັນທີ 15 ຕຸລາ 2019 ເວລາ 10:00 ໂມງ ໂຄງການກໍ່ສ້າງເຂື່ອນໄຟຟ້ານ້ຳງື່ມ 4 ໄດ້ຈັດພິທີຕັນ ແລະ ອ່ວຍນ້ຳເຂົ້າຄອງ ເພື່ອໃຫ້ໄດ້ທຳການກໍ່ສ້າງໂຕເຂື່ອນ.

ມີ ທ່ານ ໂກມົນຈັນ ເພັດອາສາ ຮອງຜູ້ອຳນວຍການໃຫຍ່ ລັດວິສາຫະກິດໄຟຟ້າລາວ ຮ່ວມກັບ ທ່ານ ຈີນ ເຣນເຊ່ (JIN Renzhe) ຜູ້ອຳນວຍການໃຫຍ່ ບໍລິສັດກົນຈັກຫນັກແຫ່ງຊາດຈີນ (CHMC), ພ້ອມດ້ວຍ ບໍລິສັດ Sinohydro No. 08 & 10 ບໍລິສັດຮັບເໝົາຍ່ອຍ ແລະ ຄະນະໂຄງການ ວິຊາການ ຟຟລ ເຂົ້າຮ່ວມ.

ເຊິ່ງພິທີກ່າວແມ່ນໄດ້ຈັດຂື້ນຢູ່ທີ່ ເມືອງພູກູດ ແຂວງຊຽງຂວາງ. ເຂື່ອນໄຟຟ້ານໍ້າງື່ມ 4 ເປັນໂຄງການຫນຶ່ງຂອງລັດຖະບານ ສປປລາວ ທີ່ມອບໃຫ້ ຟຟລ ເປັນຜູ້ຈັດຕັ້ງປະຕິບັດ ແລະ ຄຸ້ມຄອງ, ເຊິ່ງມາຮອດປະຈຸບັນແມ່ນໄດ້ເລີ່ມພິທີການຕັນນ້ຳເພື່ອອ່ວຍເຂົ້າຄອງໃຫ້ໄດ້ທຳການກໍ່ສ້າງໂຕເຂື່ອນຕາມແຜນການທີ່ວາງໄວ້ຢ່າງເປັນຮູບປະທຳ.

ລັກສະນະຂອງເຂື່ອນດັ່ງກ່າວ ເປັນເຂື່ອນຄອນກຣີດເສີມເຫລັກອັດແຫນ້ນ (RCC) ມີເນື້ອທີ່ອ່າງໂຕ່ງ 5,51Km² (ຫ້າຈຸດຫ້າສິບເອັກກິໂລຕາແມັດ) ຫລື ເທົ່າກັບ 551 ha ໃນລະດັບນ້ຳປົກກະຕິ 1040 masl, ສາມາດກັກເກັບນ້ຳໄດ້ 80.4 M.m³ (ແປດສິບຈຸດສີ່ລ້ານແມັດກ້ອນ).

ໂຄງການເຂື່ອນໄຟຟ້ານ້ຳງື່ມ 4 ເປັນໂຄງການຫນຶ່ງທີ່ຈະສາມາດຕອບສະຫນອງພະລັງງານໄຟຟ້າໃຫ້ພາຍໃນປະເທດ ໂດຍສະເພາະແມ່ນບັນດາແຂວງພາກເຫນືອຂອງ ສປປ ລາວ, ນອກຈາກນີ້ ຍັງຈະກາຍເປັນອ່າງໃຫຍ່ອີກຫນຶ່ງແຫ່ງ ຊິ່ງສາມາດເປັນບ່ອນຜະລິດການປະມົງ ການຄ້າຂາຍ ສາມາດພັດທະນາໃຫ້ກາຍເປັນແຫລ່ງທ່ອງທ່ຽວ.

ນອກຈາກນີ້ຍັງຈະສາມາດຍົກລະດັບຊີວິດການເປັນຢູ່ຂອງປະຊາຊົນໃນບໍລິເວນໂຄງການໃຫ້ດີຂຶ້ນກວ່າເກົ່າ ພ້ອມນີ້ໂຄງການຍັງຈະມີການຊ່ວຍເຫລືອກໍ່ສ້າງຂົວ 2 ແຫ່ງ ຕາມເສັ້ນທາງເຂົ້າທີ່ຜ່ານຕົວເຂື່ອນ ເພື່ອເປັນຂອງຂວັນໃຫ້ແກ່ແຂວງຊຽງຂວາງຕາມເປົ້າຫມາຍຂອງການພັດທະນາແຂວງຊຽງຂວາງ.