ຫົວພັນ ມອບ-ຮັບໜ້າທີ່ເລຂາທິການ ສະພາປະຊາຊົນແຂວງ ຄັ້ງໃໝ່

681

ໃນວັນທີ 21 ຕຸລາ 2019 ຜ່ານມານີ້ ສະພາປະຊາຊົນ ແຂວງຫົວພັນ ໄດ້ຈັດພິທີມອບ – ຮັບໜ້າທີ່ເລຂາທິການສະພາປະຊາຊົນແຂວງຫົວພັນ ລະຫວ່າງ ທ່ານ ນາງ ສວຍເພັດ ທອງສົມບັດ ກຳມະການຄະນະປະຈຳ, ເລຂາທິການສະພາປະຊາຊົນ ແຂວງຫົວພັນ ຜູ້ເກົ່າ ແລະ ທ່ານ ສົມສັກ ດອນຈານິດ ສະມາຊິກສະພາປະຊາຊົນແຂວງ ຮອງຫົວໜ້າພະແນກກວດກາລັດ ແຂວງຫົວພັນ, ເລຂາທິການສະພາປະຊາຊົນແຂວງຜູ້ໃໝ່.

ໂດຍການໃຫ້ກຽດເຂົ້າຮ່ວມຂອງທ່ານ ຄຳວອນ ບຸນທະວົງ, ຮອງເລຂາພັກແຂວງ, ປະທານສະພາປະຊາຊົນແຂວງ, ທ່ານ ນາງ ແພງ ກັນຍາພິມ ຮອງເລຂາພັກແຂວງ, ຮອງເຈົ້າແຂວງ ແຂວງຫົວພັນ, ມີຮອງປະທານ, ຄະນະປະຈຳສະພາປະຊາຊົນແຂວງ, ສະມາຊິກສະພາປະຊາຊົນແຂວງ ຜູ້ຕາງໜ້າ ຈາກພາກສ່ວນທີ່ກ່ຽວຂ້ອງ ຕະຫລອດຮອດພະນັກງານ – ລັດຖະກອນພາຍໃນສະພາເຂົ້າຮ່ວມ.

ໃນພິທີ ທ່ານ ນາງ ສວຍເພັດ ທອງສົມບັດ ໄດ້ລາຍງານກ່ຽວກັບສະພາບການເຄື່ອນໄຫວ ການຈັດຕັ້ງປະຕິບັດໜ້າທີ່ວຽກງານເລຂາທິການ ຢູ່ສະພາປະຊາຊົນແຂວງ ຕະຫລອດໄລຍະຜ່ານມາ ແລະ ໜ້າວຽກທີ່ຈະຕ້ອງສືບຕໍ່ແກ້ໄຂໃນຕໍ່ໜ້າ

ຂະນະທີ່ ທ່ານ ນາງ ແພງ ກັນຍາພິມໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ໝາກຜົນ ທີ່ເລຂາທິການ ສະພາປະຊາຊົນແຂວງ ສາມາດຍາດມາໄດ້ໃນໄລຍະທີ່ຜ່ານມາ ພ້ອມດຽວກັນນີ້ທ່ານຍັງໄດ້ຊີ້ນຳໃຫ້ ເລຂາທິການສະພາປະຊາຊົນແຂວງ ຜູ້ເກົ່າ ແລະ ຜູ້ໃຫມ່ ໃຫ້ເອົາໃຈໃສ່ ແລະ ເພີ່ມທະວີຄວາມຮັບຜິດຊອບຕໍ່ໜ້າທີ່ວຽກງານ ຂອງຕົນໃນການຊີ້ນຳ – ນໍາພາ ແລະ ເປັນເສນາທິການໃຫ້ແກ່ ອົງການປົກຄອງ ແຂວງຫົວພັນ ແລະ ສະພາປະຊາຊົນແຂວງ ໃນການປະຕິບັດໜ້າທີ່ຕາມພາລະບົດບາດ, ສິດ ແລະ ໜ້າທີ່ ຂອງຕົນ.

ຈາກນັ້ນ ທ່ານ ສົມສັກ ດອນຈານິດ ໄດ້ຂຶ້ນຮັບໜ້າທີ່ ແລະ ຮັບຄຳໂອວາດ ຊຶ່ງທ່ານ ໄດ້ສະແດງຄວາມຮູ້ບຸນຄຸນມາຍັງຄະນະປະຈຳພັກແຂວງ ທີ່ໄດ້ໃຫ້ຄວາມໄວ້ເນື້ອເຊື່ອໃຈ ແລະ ໄດ້ມອບໝາຍໜ້າທີ່ທີ່ສຳຄັນນີ້; ຈະສືບຕໍ່ຮັກສາມູນເຊື້ອອັນດີງາມ ແລະ ຈະສຸມສະຕິປັນຍາເພື່ອຕອບສະຫນອງກັບຄວາມຮຽກຮ້ອງຕ້ອງການໃນໜ້າທີ່ວຽກງານໃນຕໍ່ໜ້າໃຫ້ດີຂຶ້ນ.

ຂ່າວຈາກ: ສະພາປະຊາຊົນແຂວງຫົວພັນ