ອັດຕະປື ອະນຸມັດເນື້ອທີ່ດິນ 50 ເຮັກຕາ ໃຫ້ເອກະຊົນສຳປະທານລ້ຽງສັດເປັນສິນຄ້າ

410

ອັດຕະປື ໄດ້ຈັດພິທີເຊັນສັນຍາ ການສຳປະທານເນື້ອທີ່ດິນ 50 ເຮັກຕາ ຢູ່ເຂດ ບ້ານ ສົມບູນ ເມືອງ ພູວົງ ແຂວງ ອັດຕະປື ໃຫ້ກັບບໍລິສັດ ແກ້ວມະນີ ພັດທະນາກະສິກຳ ການຄ້າຂາເຂົ້າ-ຂາອອກຈໍາກັດຜູ້ດຽວ ເພື່ອການລົງທຶນລ້ຽງສັດປະເພດ ຄວາຍ, ງົວ, ແບ້, ໄກ່ດໍາ ແລະ ລ້ຽງປາສະຫວາຍ ເປັນສິນຄ້າຂາຍພາຍໃນ ແລະ ສົ່ງອອກຕ່າງປະເທດ.

ພິທີດັ່ງກ່າວໄດ້ຈັດຂຶ້ນໃນວັນທີ 23 ຕຸລາ 2019 ຜ່ານມາ ຢູ່ທີ່ພະແນກແຜນການ-ການລົງທຶນແຂວງອັດຕະປື. ເຂົ້າຮ່ວມລົງນາມເຊັນສັນຍາດັ່ງກ່າວ ລະຫວ່າງ ທ່ານ ສຸລິຈັນ ພອນແກ້ວ ຫົວໜ້າພະແນກການ-ການລົງທຶນແຂວງ ຕາງໜ້າໃຫ້ອົງການປົກຄອງ ແຂວງ ອັດຕະປື ກັບ ທ່ານ ວັນຈ້ອງຕຸ້ຍ ຜູ້ອໍານວຍການ ບໍລິສັດ ແກ້ວມະນີ ພັດທະນາກະສິກຳ ການຄ້າຂາເຂົ້າ-ຂາອອກຈໍາກັດຜູ້ດຽວ, ເປັນກຽດເຂົ້າຮ່ວມເປັນສັນຂີພິຍານໃນຄັ້ງນີ້ ມີ ທ່ານ ສຸກສະໄໝ ຈັນທະມາດ ຮອງເຈົ້າແຂວງໆອັດຕະປື ມີບັນດາຄະນະນໍາຂອງແຂວງ, ເມືອງພູວົງ, ບໍລິສັດສໍາປະທານ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໂຄງການດັ່ງກ່າວ ມີໄລຍະສໍາປະທານ 25 ປີ, ມີມູນຄ່າການລົງທຶນທັງໝົດ 16 ຕື້ກວ່າກີບ. ທັງນີ້, ກໍ່ເພື່ອເປັນການສົ່ງເສີມ, ການລົງທຶນພາຍໃນ ທັງເປັນການປະກອບສ່ວນໃຫ້ເສດຖະກິດຂອງແຂວງຂະຫຍາຍຕົວ ເຮັດງານທຳມີຄວາມໝັ້ນຄົງ ໃຫ້ແກ່ປະຊາຊົນໃນທ້ອງຖິ່ນມີການພັດທະນາດີຂຶ້ນ.

ທີ່ມາ: Attapeu Media