ລາຄາເຂົ້າຍັງສູງ ເຖິງມີເຂົ້າໃໝ່ອອກສູ່ທ້ອງຕະຫຼາດ

309

ລາຄາເຂົ້າສານໃນທ້ອງຕະຫຼາດ ທີ່ຫຼາຍຝ່າຍຕ່າງຄາດການວ່າລາຄາ ຈະປັບຫຼຸດລົງເລີ່ມແຕ່ເດືອນຕຸລາເມື່ອເຂົ້ານາປີປະຊາຊົນອອກຈໍລະຈອນໃນທ້ອງຕະຫຼາດ ແຕ່ຈາກການລົງຕິດຕາມໃນທ້ອງຕະຫຼາດພົບວ່າລາຄາຍັງຄົງທີ່.

ເຂົ້າສານທີ່ຂາຍໃນທ້ອງຕະຫຼາດປັດຈຸບັນຢູ່ທີ່ 120.000 ກີບຕໍ່ໝື່ນ ເປັນສະຕິຖິທີ່ສູງຖ້າທຽບໃສ່ໄລຍະດຽວກັນຂອງປີຜ່ານມາຢູ່ທີ່ 80 ພັນກີບຕໍ່ໝື່ນ ຄາດວ່າທ່າອ່ຽງລາຄາເຂົ້າອາດຍັງສູງຢູ່ເນື່ອງຈາກເນື້ອທີ່ນາປີຂອງປະຊາຊົນ 151.733 ເຮັກຕາຖືກນໍ້າຖ້ວມ ແລະ ການຜະລິດນາແຊງປີນີ້ຫຼາຍທ້ອງຖິ່ນອາດບໍ່ສາມາດດໍາເນີນການໄດ້ຕາມເປົ້າໝາຍຍ້ອນໄພແຫ້ງແລ້ງ.

ການເກັບກ່ຽວເຂົ້ານາປີປີນີ້, ເຖິງແມ່ນວ່າຫຼາຍຂົງເຂດລົງມືເກັບກ່ຽວສໍາເລັດຈໍານວນໜຶ່ງ ແຕ່ກໍບໍ່ໄດ້ມີຜົນຕໍ່ລາຄາເຂົ້າໃນທ້ອງຕະຫຼາດໃຫ້ຫຼຸດລົງ, ຍິ່ງໄປກວ່ານັ້ນ ແມ່ຄ້າຂາຍເຂົ້າເຜີຍ ຕົ້ນປີ 2020 ນີ້ລາຄາເຂົ້າອາດແພງຂຶ້ນອີກ.

ທ່ານ ຄໍາອາລິສອນ ເທບປັນຍາ ຫົວໜ້າຂະແໜງປູກຝັງ ພະແນກກະສິກໍາ ແລະ ປ່າໄມ້ ແຂວງວຽງຈັນ ໃຫ້ຮູ້ວ່າ: ການເກັບກ່ຽວເຂົ້ານາປີສາມາດປະຕິບັດໄດ້ແລ້ວ 21.710 ເຮັກຕາ ເທົ່າກັບ 40,06% ຂອງເນື້ອທີ່ແຜນການປູກ 54.200, ຂະນະດຽວກັນກໍເລັ່ງບົວລະບັດຮັກສາພືດລະດູຝົນທີ່ປູກໃນເນື້ອທີ່ 28.936 ເຮັກຕາ ເທົ່າກັບ 107,79% ຂອງແຜນການ 26.846 ເຮັກຕາ ພ້ອມກະກຽມໃສ່ການປູກພືດລະດູແລ້ງທີ່ຈະມາເຖິງນີ້.

ຂະນະດຽວກັນ, ຂໍ້ມູນຈາກຂະແໜງປູກຝັງ ພະແນກກະສິກໍາ ແລະ ປ່າໄມ້ ແຂວງຄໍາມ່ວນ ໃຫ້ຮູ້ວ່າ: ການເກັບກ່ຽວເຂົ້ານາປີຂອງຊາວກະສິກອນພາຍໃນແຂວງເກັບກ່ຽວໄດ້ແລ້ວ 27.713 ເຮັກຕາ ເທົ່າກັບ 41% ຂອງເນື້ອທີ່ປູກທັງໝົດ 83.523 ເຮັກຕາ, ສ່ວນການປູກພືດລະດູແລ້ງແມ່ນຍັງບໍ່ທັນໄດ້ຈັດຕັ້ງປະຕິບັດ, ປັດຈຸບັນພວມເລັ່ງເກັບກູ້ຜົນຜະລິດລະດູຝົນຢູ່.

ທ່ານ ລັດຕະນະ ໄຊສົມບັດ ຫົວໜ້າຂະແໜງປູກຝັງ ພະແນກກະສິກໍາ ແລະ ປ່າໄມ້ ແຂວງສະຫວັນນະເຂດ ໃຫ້ຮູ້ວ່າ: ຕົວເລກການເກັບກ່ຽວເຂົ້ານາປີຕັ້ງແຕ່ທ້າຍເດືອນກັນຍາເຖິງປັດຈຸບັນ ສໍາເລັດແລ້ວ 42.492 ເຮັກຕາ ເທົ່າກັບ 26,4% ຂອງເນື້ອທີ່ປູກ 201.621 ເຮັກຕາ ແຕ່ໃນນີ້ເນື້ອທີ່ສາມາດເກັບກ່ຽວໄດ້ຫຼັງຖືກນໍ້າຖ້ວມມີພຽງ 161.087 ເຮັກຕາ ເທົ່ານັ້ນ.

ຄຽງຄູ່ກັນນັ້ນ, ທ່ານ ສີທົນ ນັນທະລາດ ຫົວໜ້າພະແນກອຸດສາຫະກຳ ແລະ ການຄ້າ ແຂວງສະຫວັນນະເຂດ ໃຫ້ຮູ້ວ່າ: ລາຄາເຂົ້າສານໃນແຂວງສະຫວັນນະເຂດ ປັດຈຸບັນຢູ່ທີ່ 9 ພັນກີບຕໍ່ກິໂລ ແຕ່ຖ້າທຽບໃສ່ໄລຍະດຽວກັນຂອງປີຜ່ານມາ ຈະຢູ່ໃນລະດັບ 7 ພັນກີບຕໍ່ກິໂລ. ຕໍ່ສະພາບການດັ່ງກ່າວອາດເນື່ອງມາຈາກໄພພິບັດນໍ້າຖ້ວມທີ່ສ້າງຄວາມເສຍຫາຍໃຫ້ກັບເນື້ອທີ່ນາຈໍານວນຫຼາຍ ເຊິ່ງຄາດວ່າມັນຈະສົ່ງຜົນຕໍ່ລາຄາສິນຄ້າຊະນິດອື່ນອີກ.

ສະເພາະນະຄອນຫຼວງວຽງຈັນ ຈາກການໃຫ້ສໍາພາດແມ່ຄ້າຂາຍເຂົ້າສານ ບ້ານສົມຫວັງໃຕ້ ເມືອງຫາດຊາຍຟອງ ນະຄອນຫຼວງວຽງຈັນ ໃຫ້ຮູ້ວ່າ: ໃນໄລຍະເດືອນຕຸລານີ້ ຖືເປັນໄລຍະການເກັບກ່ຽວເຂົ້າຂອງຊາວນາ ຫຼັງຈາກເກັບກ່ຽວແລ້ວຈະມີການຂາຍອອກເພື່ອໃຊ້ໜີ້ຕົ້ນທຶນການຜະລິດຕ່າງໆ ເຮັດໃຫ້ລາຄາເຂົ້າໄລຍະນີ້ຈະຖືກລົງ ແຕ່ກົງກັນຂ້າມຕົກມາປີນີ້ລາຄາເຂົ້າບາງປະເພດຍັງແພງຢູ່ແຕ່ບາງປະເພດກໍຫຼຸດລົງເລັກໜ້ອຍ ເມື່ອທຽບກັບເດືອນກັນຍາທີ່ຜ່ານມາ ແຕ່ຖ້າທຽບໃສ່ໄລຍະດຽວກັນຂອງປີຜ່ານມາ ເຫັນໄດ້ວ່າລາຄາເຂົ້າແພງຂຶ້ນຫຼາຍຈາກ 80 ພັນກີບຕໍ່ໝື່ນ, ປີນີ້ 100.000 ກີບຕໍ່ໝື່ນຂຶ້ນໄປ ແລະ ຄາດວ່າອີກ 2 ຫາ 3 ເດືອນຕໍ່ໜ້າກໍຄືຕົ້ນປີ 2020 ລາຄາເຂົ້າອາດແພງຂຶ້ນອີກ ເນື່ອງຈາກປີນີ້ຊາວກະສິກອນປະສົບກັບໄພທໍາມະຊາດທັງແຫ້ງແລ້ງ ແລະ ຖືກນ້ຳຖ້ວມ.

ສໍາລັບຕົວເລກຄວາມເສຍຫາເນື້ອທີ່ນາປີ 2019 ທີ່ຖືກຜົນກະທົບຈາກໄພພິບັດແມ່ນ 151.733 ເຮັກຕາ ເຊິ່ງກະທົບຕໍ່ຄາດໝາຍຜະລິດເຂົ້າທີ່ລັດຖະບານຮັບຮອງ 4,4 ລ້ານໂຕນ.

( ຂ່າວ: ພຸດຕີ້ – ເອຢິບ )