ພາສີ ສະຫວັນນະເຂດ – ກວາງຈິ ສືບຕໍ່ຮ່ວມມືກວດກາຈຸດດຽວ – ຄັ້ງດຽວ

307

ອາທິດຜ່ານມາ ກອງປະຊຸມພົບປະລະຫວ່າງ ກອງຄຸ້ມຄອງພາສີ VI ( ສປປ ລາວ ) ແລະ ກົມພາສີແຂວງກວາງຈິ ສສ ຫວຽດນາມ ເພື່ອຕີລາຄາກ່ຽວກັບການຈັດຕັ້ງປະຕິບັດວຽກງານກວດກາຮ່ວມກັນຈຸດດຽວ – ຄັ້ງດຽວ ( SWI/SSI ) ທີ່ດ່ານສາກົນແດນສະຫວັນ ແຂວງ ສະຫວັນນະເຂດ ແລະ ດ່ານລາວບາວ ແຂວງ ກວາງຈິ, ຝ່າຍສະຫວັນນະເຂດນຳໂດຍ ທ່ານ ສົມຈິດ ລາຊະວົງ ຮອງຫົວໜ້າກອງຄຸ້ມຄອງພາສີ VI ເປັນຫົວໜ້າຄະນະ, ຝ່າຍແຂວງ ກວາງຈິ ສສ ຫວຽດາມ ນຳໂດຍ ທ່ານ ດິງ ຫງັອກແທງ ຮອງຫົວໜ້າກົມພາສີແຂວງ ກວາງຈິ ເປັນຫົວໜ້າຄະນະ.

ໃນກອງປະຊຸມຄັ້ງນີ້ທັງສອງຝ່າຍໄດ້ພ້ອມກັນທົບທວນຄືນການຈັດຕັ້ງປະຕິບັດວຽກງານຂອງພາສີໃນການກວດກາຈຸດດຽວ – ຄັ້ງດຽວ ທີ່ໄດ້ປະຕິບັດຮ່ວມກັນໃນໄລຍະຜ່ານມາ. ພ້ອມນັ້ນ, ກໍໄດ້ທົບທວນຄືນການຈັດຕັ້ງປະຕິບັດເນື້ອໃນບົດບັນທຶກລະຫວ່າງພາສີສອງຝ່າຍທີ່ໄດ້ຈັດຂຶ້ນທີ່ແຂວງກວາງຈິ ໃນປີ 2018 ຜ່ານມາ ກໍເຫັນວ່າມີຜົນສຳເລັດໃນຫຼາຍດ້ານ ໂດຍສະເພາະນັບແຕ່ລັດຖະບານຂອງສອງຝ່າຍເຫັນດີເປັນເອກະພາບໃນການຜັນຂະຫຍາຍການຈັດຕັ້ງປະຕິບັດກົນໄກການກວດກາຮ່ວມກັນຈຸດດຽວ – ຄັ້ງດຽວ ( SWI/SSI ) ທີ່ດ່ານສາກົນແດນສະຫວັນ ແຂວງສະຫວັນນະເຂດ ແລະ ດ່ານລາວບາວ ແຂວງກວາງຈິ, ການນຳທັງສອງຝ່າຍໄດ້ເອົາໃຈໃສ່ຊີ້ນຳດ່ານພາສີທີ່ຂຶ້ນກັບຄວາມຮັບຜິດຊອບຂອງຕົນຢ່າງເປັນປົກກະຕິ ໃນການຈັດຕັ້ງຜັນຂະຫຍາຍການປະຕິບັດບາດກ້າວທີ 4 ຂອງກົນໄກ ( SWI/SSI ) ທີ່ໄດ້ລົງນາມຮ່ວມກັນລະຫວ່າງ ກະຊວງການເງິນ ສປປ ລາວ ແລະ ກະຊວງການເງິນ ສສ ຫວຽດນາມ ຄັ້ງວັນທີ 27/10/2014 ທີ່ແຂວງວິງຝຸກ ສສ ຫວຽດນາມ ກ່ຽວກັບສິນຄ້າ, ເຄື່ອງສິນຄ້າສົ່ງອອກ – ນຳເຂົ້າ ແລະ ພາຫະນະ. ສອງຝ່າຍຕັດສິນໃຈສືບຕໍ່ຍູ້ແຮງເພື່ອຫັນວຽກງານພາສີເປັນທັນສະໄໝ, ຈັດວາງບຸກຄະລາກອນທີ່ປະຕິບັດໜ້າທີ່ຢູ່ດ່ານສາກົນຂອງສອງແຂວງໃຫ້ມີຄວາມຮູ້ – ຄວາມສາມາດທາງດ້ານວິຊາສະເພາະ, ພາສາຕ່າງປະເທດ ແລະ ພາສາຂອງສອງຝ່າຍ ພ້ອມທັງບັນຫາອື່ນໆ.

ຈາກນັ້ນ, ສອງຝ່າຍໄດ້ເປັນເອກະພາບກັນສືບຕໍ່ຈັດຕັ້ງຜັນຂະຫຍາຍຜົນສຳເລັດ ແລະ ປັບປຸງແກ້ໄຂບັນຫາທີ່ຄົງຄ້າງຫຼາຍດ້ານຕື່ມອີກ.

ໂອກາດດັ່ງກ່າວທັງສອງຝ່າຍກໍໄດ້ລົງນາມໃສ່ບົດບັນທຶກຊ່ວຍຈຳ ( MOU ) ເຊິ່ງຈັດຂຶ້ນທີ່ແຂວງ ສະຫວັນນະເຂດ ເພື່ອເປັນບ່ອນອີງໃນການຈັດຕັ້ງປະຕິບັດ ແລະ ການຮ່ວມມືຂອງທັງສອງຝ່າຍ.

ທີ່ມາ: ໜັງສືພິມ ເສດຖະກິດ-ການຄ້າ