ເມືອງທ່າແຕງ ວາງຄາດໝາຍສູ້ຊົນຟື້ນຟູ ແລະ ສົ່ງເສີມການຜະລິດພືດລະດູແລ້ງ

375

ໃນຕອນເຊົ້າ ວັນທີ 21 ຕຸລາ 2019ນີ້, ຢູ່ທີ່ຫ້ອງການກະສີກຳ ແລະ ປ່າໄມ້ເມືອງທ່າແຕງ ແຂວງເຊກອງ ໄດ້ຈັດກອງປະຊຸມປຶກສາຫາລື ແລະ ວາງຄາດໝາຍສູ້ຊົນຟື້ນຟູ ແລະ ສົ່ງເສີມຂະບວນການຜະລິດກະສິກຳລະດູແລ້ງພາຍຫຼັງໄພພິບັດນໍ້າຖ້ວມໃນໄລຍະຜ່ານມາ. ໂດຍມີທ່ານ ບຸນສວນ ບຸດບຸນມາ ຄະນະປະຈໍາພັກເມືອງ ປະທານກວດກາພັກ-ລັດເມືອງ ທ່າແຕງ, ມີຫົວໜ້າ,ຮອງຫ້ອງການ ,ພະນັກງານລັດຖະກອນ ພ້ອມດ້ວຍແຂກຖືກເຊີນເຂົ້າຮ່ວມ.

ທ່ານ ນາງ ບົວບານ ໄຊຍະສານ ຮອງຫົວໜ້າໜ່ວຍງານປູກຝັງ ແລະ ລ້ຽງສັດ ຫ້ອງການກະສິກຳ ແລະ ປ່າໄມ້ເມືອງທ່າແຕງ ກ່າວວ່າ: ເພື່ອຟື້ນຟູ ແລະ ສົ່ງເສີມຂະບວນການຜະລິດກະສິກຳການປູກພືດລະດູແລ້ງໃຫ້ຄືນສູ່ສະພາບປົກກະຕິພາຍຫຼັງທີ່ຖືກຜົນກະທົບ-ເສຍຫາຍຈາກໄພພິບັດນໍ້າຖ້ວມໃນໄລຍະທ້າຍເດືອນ ກັນຍາ ຜ່ານມາຫ້ອງການກະສິກຳ ແລະ ປ່າໄມ້ໄດ້ມີຄວາມພະຍາຍາມວາງຄາດໝາຍສູ້ຊົນເພື່ອຍູ້ແຮງຂະບວນການຜະລິດການປູກພືດລະດູແລ້ງເປັນຕົ້ນຜະລິດເຂົ້ານາແຊງໃຫ້ໄດ້ 80 ເຮັກຕາຂຶ້ນໄປ,ຜົນຜະລິດໃຫ້ໄດ້ທັງໝົດ 400 ໂຕນ.

ພາບປະກອບຂ່າວ

ຜະລິດພືດຜັກເປັນສະບຽງອາຫານສຳຮອງໃຫ້ໄດ້ 1,131 ເຮັກຕາ.ຜົນຜະລິດໃຫ້ໄດ້ 8,143.2 ໂຕນ,ຜະລິດທາດຊີ້ນປະເພດ ປາ ແລະ ໄຂ່ໃຫ້ໄດ້ 1,005 ໂຕນຂຶ້ນໄປ,ຜະລິດພືດກະສິກຳເປັນສິນຄ້າປະເພດ ຜັກກລໍາປີ,ຜັກກາດຫໍ່,ສາລີອາຫານສັດ,ສະເຫີ່ວ,ຖົ່ວດິນໃຫ້ໄດ້ 585,4 ເຮັກຕາ,ຜົນຜະລິດໃຫ້ໄດ້ 5,268.6 ໂຕນ ແລະ ສັດລ້ຽງບໍລິໂພກພາຍໃນເຊັ່ນ: ງົວ,ຄວາຍ,ໝູ,ແບ້,ສັດປີກ ແລະ ປາໃຫ້ໄດ້ 34,629 ໂຕນ ຂຶ້ນໄປ ແລະ ນໍາເຂົ້າໃຫ້ໜ້ອຍກ່ວາ 15,067 ໂຕ. ໃນຂະນະທີ່ຄະບວນການຜະລິດພືດລະດູແລ້ງໃນປີຜ່ານມາມີທ່າກ້າວ ແລະ ຂະຫຍາຍຕົວດີພໍສົມຄວນໂດຍຜະລິດເຂົ້ານາແຊງໄດ້ 42,30 ເຮັກຕາ,ຜົນຜະລິດໄດ້ 2011,5 ໂຕນ.ຜະລິດສະບຽງອາຫານສຳຮອງໄດ້ 686,1 ເຮັກຕາ.ຜົນຜະລິດໄດ້ 4,827 ກ່ວາໂຕນ ແລະຜະລິດພືດເປັນສິນຄ້າໄດ້ 440,7 ເຮັກຕາ,ຜົນຜະລິດໄດ້ 8,898 ກວ່າໂຕນ.

ພາບປະກອບຂ່າວ

ຮອງຫົວໜ້າໜ່ວຍງານປູກຝັງ ຫ້ອງການກະສິກຳ ແລະ ປ່າໄມ້ເມືອງທ່າແຕງກ່າວຢືນຢັນວ່າ: ເພື່ອເຮັດໃຫ້ຂະບວນການຜະລິດລະດູແລ້ງບັນລຸຕາມຄາດໝາຍທີ່ວາງໄວ້ນັ້ນ ປັດຈຸບັນໄດ້ກຽມຄວາມພ້ອມໂດຍກຳນົດບຸກຄະລາກອນ ແລະ ແບ່ງງານ,ແບ່ງຄວາມຮັບຜິດຊອບຢ່າງຂາດຕົວ,ພ້ອມທັງກຳນົດໄລຍະເວລາໃນການຈັດຕັ້ງປະຕິບັດ ແລະ ຈຸດເປົ້າໝາຍຜະລິດເຂົ້ານາແຊງ 13 ບ້ານ ແລະ ປູກພືດ 47 ບ້ານໃນທົ່ວເມືອງ.

ໂດຍ: ລັດຕະນາ ຄຳສົມພູ