9 ເດືອນ ແຂວງເຊກອງເກັບຄ່າທໍານຽມທາງໄດ້ເກືອບ 70%

318

ໃນ 9 ເດືອນຜ່ານມາ ການເກັບລາຍຮັບຄ່າທໍານຽມທາງ ປະຈໍາປີ 2019 ຢູ່ແຂວງເຊກອງ ປະຕິບັດໄດ້ແລ້ວເກືອບ 70% ຈາກຕົວເລກແຜນໝົດປີທີ່ໄດ້ຮັບມອບໝາຍຈາກກະຊວງການເງິນ ກໍຄືກົມສ່ວຍສາອາກອນ ຈໍານວນ 564 ລ້ານກວ່າກີບ.

ທ່ານ ສົມບູນ ພັນຈັນ ຮອງຫົວໜ້າສ່ວຍສາອາກອນປະຈໍາແຂວງເຊກອງ ໃຫ້ສໍາພາດຫວ່າງບໍ່ດົນນີ້ວ່າ: ການເກັບລາຍຮັບຄ່າທໍານຽມທາງເປັນລາຍຮັບທີ່ສໍາຄັນໜຶ່ງຂອງງົບປະມານ ໂດຍຕາມສະຖິຕິການມາຂຶ້ນທະບຽນຍານພາຫະນະທົ່ວແຂວງທີ່ພະແນກໂຍທາທິການ ແລະ ຂົນສົ່ງ ປະຈໍາແຂວງເຊກອງ ມີຈໍານວນພາຫະນະທັງໝົດ 10.326 ຄັນ. ໃນນີ້, ລົດຈັກຄວາມແຮງ 110 CC – 200 CC ຈໍານວນ 8.568 ຄັນ; ລົດຕູ້ – ລົດຈິບຄວາມແຮງ 1.000 CC – 4.000 CC ຈໍານວນ 1.654 ຄັນ; ລົດບັນທຸກຂົນສົ່ງສິນຄ້າຄວາມແຮງ 2.500 CC – 5.000 CC ຈໍານວນ 452 ຄັນ ແລະ ລົດໂດຍສານຄວາມແຮງ 2.500 CC – 5.000 CC ຈໍານວນ 65 ຄັນ ຖ້າຫາກວ່າຈໍານວນພາຫະນະທີ່ຂຶ້ນທະບຽນມາເສຍຄ່າທໍານຽມທາງປະຈໍາປີຄາດໝົດປີ 2019 ຈະສ້າງລາຍຮັບໃຫ້ແກ່ຂະແໜງສ່ວຍສາອາກອນແຂວງຢ່າງຕໍ່າ 600 ລ້ານກີບ.

ສະນັ້ນ, ເພື່ອເປັນການປະຕິບັດຕາມລັດຖະບັນຍັດຂອງປະທານປະເທດ ສະບັບເລກທີ 001/ປປທ ລົງວັນທີ 20 ກັນຍາ 2017 ວ່າດ້ວຍຄ່າທໍານຽມທາງ; ບົດແນະນໍາຂອງກະຊວງການເງິນ ສະບັບເລກທີ 3445/ກງ ລົງວັນທີ 10 ຕຸລາ 2017 ແລະ ນິຕິກໍອື່ນໆ, ໃນໄລຍະຜ່ານມາ ຂະແໜງສ່ວຍສາອາກອນປະຈໍາແຂວງເຊກອງ ໄດ້ປະສານສົມທົບກັບພາກສ່ວນກ່ຽວຂ້ອງ ໂດຍສະເພາະແມ່ນເຈົ້າໜ້າທີ່ຕໍາຫຼວດຈະລາຈອນ ແລະ ທະນາຄານການຄ້າຕ່າງປະເທດລາວມະຫາຊົນ ສາຂາເຊກອງ ໄດ້ລົງເຄື່ອນໄຫວເປີດຂະບວນການຊຸກຍູ້ການເສຍຄ່າທໍານຽມທາງຜ່ານລະບົບທະນາຄານໃນຂອບເຂດທົ່ວແຂວງທັງໝົດ 6 ຄັ້ງ ລວມມີ 9 ຈຸດ. ທັງນີ້, ກໍເພື່ອເປັນການປຸກລະດົມ, ກະຕຸກຊຸກຍູ້ ແລະ ອໍານວຍຄວາມສະດວກໃຫ້ແກ່ອົງການຈັດຕັ້ງພັກ – ລັດ, ບັນດາຫົວໜ່ວຍທຸລະກິດ ແລະ ປະຊາຊົນບັນດາເຜົ່າໄດ້ມາເສຍຄ່າທໍານຽມທາງ ປະຈໍາປີ 2019 ໃຫ້ເປັນຂະບວນຟົດຟື້ນ. ຜ່ານການປະຕິບັດເຫັນວ່າ ມາຮອດປັດຈຸບັນແຂວງເຊກອງ ສາມາດເກັບລາຍຮັບຈາກຄ່າທໍານຽມທາງໄດ້ທັງໝົດ 369,93 ລ້ານກີບ ທຽບໃສ່ແຜນປະຕິບັດໄດ້ 69,31%.

ຂ່າວ: ສັນຍາ

ທີ່ມາ: ໜັງສືພິມ ເສດຖະກິດ-ການຄ້າ