ອົງການກາແດງລາວ ມອບເຄື່ອງຊ່ວຍເຫຼືອຜູ້ປະສົບໄພນ້ຳຖ້ວມ 5 ບ້ານ ຢູ່ເມືອງກະລຶມ

382

ໃນລະຫວ່າງວັນທີ 16 – 20 ຕຸລາ 2019 ຜ່ານມາ, ສູນກາງອົງການກາແດງລາວ ສົມທົບກັບ ອົງການກາແດງແຂວງ ເຊກອງ ໄດ້ນໍາເຄື່ອງອຸປະໂພກ-ບໍລິໂພກຈໍານວນໜຶ່ງປະກອບມີ: ເຂົ້າສານໜຽວ, ໝີ່ສຳເລັດຮູບ, ປາກະປ໋ອງ, ເກືອ-ແປັງນົວ, ຢາປົວພະຍາດ, ນ້ຳດື່ມ ແລະ ກະຕຸກໃສ່ນ້ຳຂະໜາດ 20 ລິດ ມາມອບໃຫ້ແກ່ປະຊາຊົນ 5 ບ້ານຢູ່ເມືອງກະລຶມ.

ໃນນັ້ນມອບໃຫ້ ບ້ານແຈຼະ 97 ຄອບຄົວ, ບ້ານໂລ້ຍ 94 ຄອບຄົວ, ບ້ານຈີງ 47 ຄອບຄົວ, ບ້ານສອງຄອນ 83 ຄອບຄົວ ແລະ ບ້ານຫານອງ 43 ຄອບຄົວ. ເຊິ່ງກ່າວມອບໂດຍ ທ່ານ ສິງ ເມໂນລາດ ຮອງປະທານອົງການກາແດງລາວ, ມີທ່ານ ໄພວັນ ສຸກກະເສີມ ຕ່າງໜ້າຈາກອົງການກາແດງແຂວງເຊກອງ, ທ່ານ ເພັດດາວົງ ບຸນມີສະຫວັດ ຮອງຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ຄະນະກຳມະການໄພພິບັດຂັ້ນແຂວງ, ທ່ານ ວັນໄຊ ຈັນທະຍັບ ຫົວໜ້າການແຮງງານ ແລະ ສະຫວັດດີການ-ສັງຄົມ ຄະນະກຳມະການໄພພິບັດຂັ້ນເມືອງ ພ້ອມຄະນະ ແລະ ພໍ່ແມ່ປະຊາຊົນພາຍໃນບ້ານດັ່ງກ່າວເຂົ້າຮ່ວມ.

ທ່ານ ສິງ ເມໂນລາດ ໄດ້ກ່າວວ່າ: ຈຸດປະສົງໃນການລົງມາມອບເຄື່ອງໃນຄັ້ງນີ້ ກໍເພື່ອຊ່ວຍເຫຼືອບັນເທົາທຸກ ແລະ ຄວາມມີນ້ຳໃຈທາງດ້ານມະນຸດສະທຳຕໍ່ເພື່ອນມະນຸດດ້ວຍກັນ ເຄື່ອງຈຳນວນນີ້ແມ່ນໄດ້ມາຈາກການຊ່ວຍເຫຼືອຂອງສັງຄົມທັງພາຍໃນ ແລະ ຕ່າງປະເທດ ເພື່ອບັນເທົາທຸກໃຫ້ແກ່ພໍ່ແມ່ປະຊາຊົນຊາວເມືອງກະລຶມ ຄອບຄົວທີ່ທຸກຍາກຂາດເຂີນ, ຄອບຄົວທີ່ໄດ້ຮັບຜົນກະທົບຕ່າງໆທີ່ເກີດຈາກໄພທຳມະຊາດ ເພື່ອປົກປັກຮັກສາສຸຂະພາບຂັ້ນພື້ນຖານ ແລະ ຟື້ນຟູຊີວິດການເປັນຢູ່ຂອງພໍ່ແມ່ປະຊາຊົນໃຫ້ດີຂຶ້ນເທື່ອລະກ້າວ ນອກຈາກນີ້, ຍັງໄດ້ຕິດຕັ້ງເຄື່ອງຜະລິດນ້ຳຊະນິດ AP700 ຊົ່ວຄາວຢູ່ທີ່ບ້ານແຈຼະ ແລະ ບ້ານຫານອງ.

ໂອກາດນີ້ ອຳນາດການປົກຄອງບ້ານດັ່ງກ່າວ ກໍໄດ້ສະແດງຄວາມຂອບໃຈຢ່າງສູງໃນການເປັນຫ່ວງເປັນໄຍຂອງພັກລັດ ກໍຄືອົງການກາແດງລາວ, ອົງການກາແດງສະວິດສ໌ ທີ່ໄດ້ນໍາເອົາເຄື່ອງຊ່ວຍເຫຼືອໃນຄັ້ງນີ້ ມາມອບໃຫ້ປະຊາຊົນຢູ່ເຂດຫ່າງໄກຊອກຫຼີກ ເພື່ອເປັນການບັນເທົາທຸກ ແລະ ແກ້ໄຂຊີວິດການເປັນຢູ່ດີຂຶ້ນເທື່ອລະກ້າວ.

ທີ່ມາ: ຂ່າວເມືອງກະລືມ