ສອງພາກສ່ວນສືບຕໍ່ຊ່ວຍເຫຼືອຜູ້ປະສົບໄພນໍ້າຖ້ວມ

282

ໃນຕອນເຊົ້າຂອງວັນທີ 15 ຕຸລາ 2019 ທີ່ສໍານັກງານນາຍົກລັດຖະມົນຕີ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ວ່າການລັດຖະມົນຕີກະຊວງແຜນການ ແລະ ການລົງທຶນ ໄດ້ຕາງໜ້າໃຫ້ລັດຖະບານ ຮັບເງິນຊ່ວຍເຫຼືອຜູ້ປະສົບໄພນໍ້າຖ້ວມ ຈາກບໍລິສັດ ສະຕາໂທລະຄົມ ( Unitel ) ຈໍານວນ 1 ຕື້ກີບ, ຈາກບໍລິສັດ ໄຟຟ້າຫົງສາ ຈໍາກັດ ຈຳນວນ 1 ລ້ານບາດ ໂດຍມີພະນັກງານທີ່ກ່ຽວຂ້ອງຂອງແຕ່ລະພາກສ່ວນເຂົ້າຮ່ວມ.

ການມອບເງິນໃນຄັ້ງນີ້, ຕາງໜ້າ ບໍລິສັດ ສະຕາໂທລະຄົມ ກ່າວມອບໂດຍ ທ່ານ ພົນຈັດຕະວາ ອຸລະຫາ ທອງວັນທາ ຮອງຜູ້ອໍານວຍການການເງິນ ບໍລິສັດ ສະຕາໂທລະຄົມ; ຕາງໜ້າ ບໍລິສັດ ໄຟຟ້າຫົງສາ ຈໍາກັດ ກ່າວມອບໂດຍ ທ່ານ ສະພາຍຸດ ທູພູນ ຜູ້ອໍານວຍການໃຫຍ່ ບໍລິສັດ ໄຟຟ້າຫົງສາ ຈໍາກັດ.

ໃນໂອກາດດັ່ງກ່າວ, ທ່ານ ສອນໄຊ ສີພັນດອນ ໄດ້ກ່າວຂອບໃຈ ແລະ ຊົມເຊີຍຕໍ່ສອງພາກສ່ວນດັ່ງກ່າວ ທີ່ໄດ້ນຳເອົາເງິນມາມອບ ເພື່ອນຳໄປຊ່ວຍເຫຼືອຜູ້ປະສົບໄພນໍ້າຖ້ວມຢູ່ທ້ອງຖິ່ນຕ່າງໆໃນປີນີ້ ເຊິ່ງຖືວ່າເປັນການປະກອບສ່ວນອັນສຳຄັນ ເຮັດໃຫ້ປະຊາຊົນຜູ້ປະສົບໄພນໍ້າຖ້ວມມີກຳລັງໃຈ, ໄດ້ຮັບການແກ້ໄຂບັນເທົາທຸກ ແລະ ປັບປຸງຊີວິດການເປັນຢູ່ຂອງເຂົາເຈົ້າໃຫ້ກັບຄືນສູ່ສະພາບປົກກະຕິໂດຍໄວ.

ຮູບ ແລະ ຂ່າວ: ກົມປະຊາສຳພັນ, ຫສນຍ

ທີ່ມາ: ໜັງສືພິມ ເສດຖະກິດ-ການຄ້າ