ໂຄລາວມອບເຄື່ອງຊ່ວຍເຫຼືອ ສພອ 300 ກວ່າລ້ານກີບ

494

ວັນທີ 16 ຕຸລາ 2019 ບໍລິສັດ ໂຄລາວ ດີວີລົບພິງ ໄດ້ຈັດພິທີມອບ – ຮັບເຄື່ອງອຸປະກອນຊ່ວຍເຫຼືອໃຫ້ແກ່ ສະຖາບັນພັດທະນາອາຊີວະສຶກສາ ( ສພອ ) ຂຶ້ນທີ່ສະຖາບັນພັດທະນາອາຊີວະສຶກສາ ໂດຍການເຂົ້າຮ່ວມຂອງ ທ່ານ ເອກກະໄຊ ໄຊຍະວົງ ຜູ້ອຳນວຍການຝ່າຍຂາຍ ບໍລິສັດ   ໂຄລາວ ດີວີລົບພິງ, ທ່ານ ວຽງ  ພູມີໄຊ ຜູ້ອຳນວຍການສະຖາບັນພັດທະນາອາຊີວະສຶກສາ ພ້ອມດ້ວຍບັນດາພະນັກງານຈາກ ບໍລິສັດ ໂຄລາວ ແລະ ນ້ອງນັກສຶກສາທັງຫຼາຍເຂົ້າຮ່ວມ.

ໂອກາດນີ້, ທ່ານ ເອກກະໄຊ ໄຊຍະວົງ ໄດ້ກ່າວວ່າ: ອຸປະກອນການສິດສອນແມ່ນມີ ຄວາມສຳຄັນຫຼາຍໃນຂະບວນການສິດສອນ ເພື່ອໃຫ້ການ  ຮຽນ – ການສອນໃນ ສພອ ມີ ຄວາມສະດວກກວ່າເກົ່າ ໂດຍສະເພາະແມ່ນປະກອບສ່ວນເຂົ້າໃນວຽກງານການສຶກສາ ແລະ ຮັບໃຊ້ການເຄື່ອນໄຫວວຽກງານສະຖາບັນພັດທະນາອາຊີວະສຶກສາ ໃນການພັດທະນາຊັບພະຍາກອນມະນຸດໃຫ້ມີຄຸນນະພາບຍິ່ງຂຶ້ນ.

ການມອບເຄື່ອງຊ່ວຍເຫຼືອຄັ້ງນີ້ແມ່ນເປັນຄັ້ງທີ 2 ທີ່ ບໍລິສັດ ໂຄລາວ ດີວີລົບພິງ ຊ່ວຍເຫຼືອແກ່ ສພອ ເຊິ່ງອຸປະກອນຊ່ວຍເຫຼືອໃນຄັ້ງນີ້ ປະກອບມີ: ລົດຕູ້ ຮຸນໄດ 12 ບ່ອນນັ່ງ ລຸ້ນ H – 1 ຈຳນວນ 1 ຄັນ ມູນຄ່າ 305 ລ້ານກີບ; ເຄື່ອງຄອມພິວເຕີ ໂນ໊ດບຸ໊ກ ASUS Core i3 9 ຈຳນວນ 1 ຊຸດ ມູນຄ່າ 9 ລ້ານກີບ; ລົດຈັກມືສອງ + ຂາຕັ້ງ + ເຄື່ອງມື ຈຳນວນ 2 ຊຸດ, ລິບແປງລົດ 1 ຊຸດ, ຕູ້ໃສ່ກຸນແຈ 1 ຊຸດ ແລະ ຊຸດກຸນແຈ ຈຳນວນ 1 ຊຸດ ລວມມູນຄ່າ 10 ລ້ານກີບ ເຊິ່ງລວມມູນຄ່າທັງໝົດ 324 ລ້ານກີບ.

ທ່ານ ພູວຽງ ພູມີໄລ ໄດ້ສະແດງຄວາມຂອບໃຈມາຍັງ ບໍລິສັດ ໂຄລາວ ດີວີລົບພິງ ທີ່ໄດ້ມອບເຄື່ອງຊ່ວຍເຫຼືອ ເພື່ອຊຸກຍູ້ຕໍ່ຫຼັກສູດການສິດສອນຂອງສະຖາບັນ ເຊິ່ງເປັນເຄື່ອງອຸປະກອນທີ່ມີຄວາມສຳຄັນ ແລະ ຈຳເປັນທີ່ສຸດໃນການກໍ່ສ້າງຊັບພະຍາກອນມະນຸດ, ທັງເປັນການຜັນຂະຫຍາຍເນື້ອໃນທິດທາງຂອງກະຊວງສຶກສາທິການ ແລະ ກີລາ ໃນການຮ່ວມມືກັບຖານການຜະລິດ. ນອກນັ້ນ, ທ່ານຍັງສະແດງຄວາມຮູ້ບຸນຄຸນມາຍັງ ບໍລິສັດ ໂຄລາວ ແລະ ຈະນຳເອົາເຄື່ອງອຸປະກອນຊ່ວຍເຫຼືອໃນຄັ້ງນີ້ນຳໄປໃຊ້ໃນການສິດສອນ ແລະ ສ້າງຄູ – ອາຈານໃນຂະແໜງການອາຊີວະສຶກສາໃຫ້ເກີດຜົນປະໂຫຍດຫຼາຍທີ່ສຸດ.

ຂ່າວ: ກາວຊົ່ງ; ຮູບ: ວິລະສັກ

ທີ່ມາ: ໜັງສືພິມ ເສດຖະກິດ-ການຄ້າ