ກອງຄຸ້ມຄອງພາສີ II ເກັບລາຍຮັບໄດ້ລື່ນແຜນ

321

ການຈັດຕັ້ງປະຕິບັດເກັບລາຍຮັບເຂົ້າງົບປະມານແຫ່ງລັດປີ 2019 ຂອງກອງຄຸ້ມຄອງພາສີ II ( ແຂວງອຸດົມໄຊ – ແຂວງຜົ້ງສາລີ ) ເພີ່ມຂຶ້ນແຕ່ລະເດືອນ ສະແດງອອກໃນ 9 ເດືອນປີ 2019 ສາມາດປະຕິບັດໄດ້ 52,29 ຕື້ກວ່າກີບ ເທົ່າກັບ 116,21% ຂອງແຜນການປີ ( ລື່ນແຜນການປີ 16,21% ), ສ່ວນອີກ 3 ເດືອນຈະສູ້ຊົນເກັບລາຍຮັບໃຫ້ໄດ້ 5 ຕື້ກີບ ແລະ ຄາດຄະເນໝົດປີຈະປະຕິບັດໄດ້ 58 ຕື້ກີບ ເທົ່າກັບ 128,88% ຂອງແຜນການປີ.

ທ່ານ ບຸນເພັງ ສຸພັດທອນ ຫົວໜ້າກອງຄຸ້ມຄອງພາສີ II ໃຫ້ສໍາພາດກັບຂ່າວການເງິນ ວ່າ: ການຈັດຕັ້ງປະຕິບັດວຽກງານເກັບລາຍຮັບເຂົ້າງົບປະມານແຫ່ງລັດ ໃນປີ 2019 ກອງຄຸ້ມຄອງພາສີ II ໄດ້ຮັບຕົວເລກແຜນການທັງໝົດ 45 ຕື້ກວ່າກີບ, ແຕ່ຜ່ານການຈັດຕັ້ງປະຕິບັດໃນ 9 ເດືອນປີ 2019 ຜ່ານມາ ປະຕິບັດໄດ້ 52,29 ຕື້ກີບ ເທົ່າກັບ 116,21% ຂອງແຜນການປີ ( ລື່ນແຜນການປີແລ້ວ 16,21% ) ຖ້າທຽບໃສ່ໄລຍະດຽວກັນຂອງປີຜ່ານມາ ເພີ່ມຂຶ້ນ 82,96%. ໃນນັ້ນ, ລາຍຮັບສ່ວນໃຫຍ່ໄດ້ມາຈາກການນຳເຂົ້າສິນຄ້າປະເພດເຄື່ອງອຸປະໂພກ – ບໍລິໂພກ ກວມເອົາ 25,22%, ນໍາເຂົ້າເພື່ອສົ່ງອອກ 23,85%, ພາຫະນະ 18,19%, ເຄື່ອງກໍ່ສ້າງ 10,94%, ຖັດລົງມາແມ່ນເຄື່ອງໄຟຟ້າ, ນໍ້າມັນເຊື້ອໄຟ, ຄ່າຊັກພິເສດ, ຄ່າທຳນຽມ ແລະ ຄ່າປັບໃໝ – ຂາຍເຄື່ອງຮິບ, ຊິ້ນສ່ວນອາໄຫຼ່ ແລະ ອື່ນໆ.

ນອກນັ້ນ, ໃນ 9 ເດືອນປີ 2019 ກອງຄຸ້ມຄອງພາສີ II ສາມາດແກ້ໄຂຄະດີໄດ້ທັງໝົດ 489 ຄະດີ, ສະສາງແລ້ວ 481 ຄະດີ, ຄ້າງສະສາງ 8 ຄະດີ. ໃນນີ້, ພາຫະນະ 441 ຄະດີ, ສະສາງແລ້ວ 435 ຄະດີ, ຄ້າງ 6 ຄະດີ; ນ້ຳມັນເຊື້ອໄຟ 4 ຄະດີ, ສະສາງແລ້ວ 4 ຄະດີ; ສິນຄ້າທົ່ວໄປ 45 ຄະດີ, ສະສາງແລ້ວ 43 ຄະດີ, ຄ້າງ 2 ຄະດີ.

ເຖິງຢ່າງໃດກໍຕາມ, ໃນອີກ 3 ເດືອນທ້າຍປີ 2019 ກອງຄຸ້ມຄອງພາສີ II ຈະສູ້ຊົນຂຸດຄົ້ນແຫຼ່ງລາຍຮັບທີ່ບົ່ມຊ້ອນທີ່ມີຂອງແຂວງ, ເອົາໃຈໃສ່ປັບປຸງກົນໄກວຽກງານຕ້ານ ແລະ ສະກັດກັ້ນການລັກລອບໜີພາສີຢູ່ແຕ່ລະດ່ານພາສີຊາຍແດນ ກອງກວດກາພາສີທີ່ຂຶ້ນກັບກອງພາສີ II ໃຫ້ມີຄວາມເຂັ້ມແຂງ, ສ້າງກົນໄກການຄຸ້ມຄອງການນຳເຂົ້າພາຫະນະຢ້ຽມຢາມ ບໍ 53 ໃຫ້ເຂັ້ມງວດ, ປະສານສົມທົບກັບເຈົ້າໜ້າທີ່ຂະແໜງການກ່ຽວຂ້ອງ ເປັນຕົ້ນແມ່ນເຈົ້າໜ້າ ປກສ, ຍທຂ ເພື່ອນຳໃຊ້ມາດຕະການໃນການແກ້ໄຂພາຫະນະນຳເຂົ້າບໍ່ເສຍພາສີ ໂດຍສະເພາະແມ່ນພາຫະນະບໍ່ມີປ້າຍທີ່ຍັງນຳໃຊ້ຕາມຕົວເມືອງ, ພາຫະນະນຳໃຊ້ປ້າຍທະບຽນປອມ ແລະ ຄຸ້ມຄອງພາຫະນະເຂົ້າ – ອອກຕາມຊາຍແດນ ເພື່ອຈັດເກັບລາຍຮັບເຂົ້າງົບປະມານໃຫ້ໄດ້ຕາມແຜນການທີ່ວາງໄວ້ຈໍານວນ 5 ຕື້ກີບ ແລະ ຄາດຄະເນໝົດປີ 2019 ຈະປະຕິບັດໄດ້ 58 ຕື້ກີບ ເທົ່າກັບ 128,88% ຂອງແຜນການປີ ( ລື່ນແຜນການປີ 28,88% ).

ແຫຼ່ງຂ່າວ: ກະຊວງການເງິນ

ທີ່ມາ: ໜັງສືພິມ ເສດຖະກິດ-ການຄ້າ