ຕຸ້ມລານ ເກັບກ່ຽວເຂົ້ານາປີສຳເລັດແລ້ວ 17%

268

ຊາວກະສິກອນເມືອງຕຸ້ມລານ ແຂວງສາລະວັນ ກຳລັງຂຸ້ນຂ້ຽວເກັບກ່ຽວເຂົ້ານາປີໃຫ້ຖ່ວງທັນກັບລະດູການ ເນື່ອງຈາກໄລຍະຕົ້ນປີໄດ້ຮັບຜົນກະທົບຈາກໄພແຫ້ງແລ້ງ ເຮັດໃຫ້ການປັກດຳເຂົ້ານາປີຊັກຊ້າ ຮອດປັດຈຸບັນສຳເລັດແລ້ວ 17%.

ທ່ານ ກຸ໋ຍນາໄລ ບຸດຕະລາດ ຫົວໜ້າຫ້ອງການກະສິກຳ ແລະ ປ່າໄມ້ ເມືອງຕຸ້ມລານ ໃຫ້ສຳພາດທ້າຍອາທິດຜ່ານມານີ້ວ່າ: ອີງໃສ່ແຜນການສູ້ຊົນຜະລິດເຂົ້ານາປີຂອງເມືອງຕຸ້ມລານ ປີນີ້ເຫັນວ່າຫຼາຍສົມຄວນ ແລະ ເປັນຂະບວນກວ້າງຂວາງ, ມີທັງໝົດ 5.920 ເຮັກຕາ ແຕ່ສາມາດປັກດຳໄດ້ຕົວຈິງ 5.706 ເຮັກຕາ ທຽບໃສ່ແຜນການ ເທົ່າກັບ 96% ເຊິ່ງໄລຍະເບື້ອງຕົ້ນໄດ້ພົບກັບບັນຫາໄພແຫ້ງແລ້ງ ໄດ້ເຮັດໃຫ້ເນື້ອທີ່ການຜະລິດເຂົ້າ 400 ກວ່າເຮັກຕາ ໄດ້ຮັບຜົນກະທົບ ແລະ ເສຍຫາຍ 14,9 ເຮັກຕາ. ຕໍ່ຈາກນັ້ນ, ກໍໄດ້ພົບກັບບັນຫາໄພນ້ຳຖ້ວມອີກຈຳນວນໜຶ່ງ ສາມາດເກັບກຳຂໍ້ມູນຕົວຈິງ ຍັງເຫຼືອ 4.800 ກວ່າເຮັກຕາ, ທັງໄດ້ຕິດຕາມ, ຊຸກຍູ້ຢ່າງເປັນປົກກະຕິ ເປັນຕົ້ນ: ບັນຫາສັດຕູພືດຕ່າງໆ. ພ້ອມນັ້ນ, ຊາວກະສິກອນກໍໄດ້ໃຊ້ແນວພັນເຂົ້າປັບປຸງ ທັງໝົດ 6,26 ໂຕນ ມີຄື: ແນວພັນເຂົ້າກອງທຶນໝູນວຽນໃຫ້ບ້ານເປົ້າໝາຍໂຄງການ. ປັດຈຸບັນນີ້ຊາວກະສິກອນ ໄດ້ເລັ່ງເກັບກ່ຽວເຂົ້ານາປີ ໄດ້ແລ້ວ 17% ແລະ ກຳລັງເປັນຂະບວນຟົດຟື້ນໃນທົ່ວເມືອງ ເຊິ່ງໃນຈຳນວນ 4 ພັນກວ່າເຮັກຕາ ຄາດຄະເນຜົນຜະລິດໄດ້ 16.368 ໂຕນ, ສະເລ່ຍສະມັດຖະພາບທົ່ວເມືອງໄດ້ 3,4 ໂຕນຕໍ່ເຮັກຕາ ແລະ ບັນດາຄອບຄົວຕົວແບບໃຫ້ບັນລຸໄດ້ 3,5 ໂຕນຕໍ່ເຮັກຕາ.

ທ່ານ ກຸ໋ຍນາໄລ ບຸດຕະລາດ ໄດ້ກ່າວອີກວ່າ: ນອກຈາກໄດ້ລົງຊຸກຍູ້ຂະບວນການເກັບກ່ຽວເຂົ້າຂອງປະຊາຊົນຊາວເມືອງຕຸ້ມລານ ໃຫ້ສຳເລັດ, ຖ່ວງທັນ ເນື່ອງຈາກມີແຜນການປູກພືດໃນຈຸດສຸມແຕ່ລະບ້ານໃຫ້ຖ່ວງທັນກັບການກັກເກັບນ້ຳໃນແຫຼ່ງຕ່າງໆ ເພື່ອຈະມາຫົດພືດຜັກຂອງປະຊາຊົນອີກດ້ວຍ; ໃນປີ 2019 ນີ້ ເນື້ອທີ່ຈະຜະລິດພືດຜັກຂອງປະຊາຊົນ ມີ 100 ກວ່າເຮັກຕາ.

ຂ່າວ – ຮູບ: ວິໄລວອນ ສິດທິໄຊ

ທີ່ມາ: ໜັງສືພິມ ເສດຖະກິດ-ການຄ້າ