ກວຕ ຈັດກອງປະຊຸມສໍາມະນາວິທະຍາສາດ, ເຕັກໂນໂລຊີ ແລະ ນະວັດຕະກຳໃນຍຸກອຸດສາຫະກຳ 4.0

401

ກະຊວງວິທະຍາສາດ ແລະ ເຕັກໂນໂລຊີ (ກວຕ) ຈັດກອງປະຊຸມສໍາມະນາວິທະຍາສາດ, ເຕັກໂນໂລຊີ ແລະ ນະວັດຕະກຳໃນຍຸກອຸດສາຫະກຳ 4.0 ຈຸດປະສົງກໍ່ເພື່ອເຜີຍແຜ່ນະໂຍບາຍ ແລະ ແຜນພັດທະນາວຽກງານວິທະຍາສາດໃຫ້ສັງຄົມຮັບຮູ້ຢ່າງກວ້າງຂວາງ.

ທ່ານ ປອ. ຈັນແສງ ພິມມະວົງ ຮອງລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ ກ່າວບາງຕອນສໍາຄັນວ່າ: ການປະຕິວັດອຸດສາຫະກຳຍຸກ 4.0 ຈະສົ່ງຜົນເຮັດໃຫ້ການຜະລິດມີຄວາມວ່ອງ ໄວຍິ່ງຂຶ້ນກາຍເປັນເສດຖະກິດພູມປັນຍາ ເຮັດໃຫ້ຜູ້ຊົມໃຊ້ໄດ້ຮັບຄວາມສະດວກສະບາຍ, ສາມາດເຂົ້າເຖິງຜູ້ຊົມໃຊ້ໂດຍກົງ. ສະນັ້ນ, ຈຶ່ງຮຽກຮ້ອງໃຫ້ການຜະລິດສິນຄ້າມີຄຸນນະພາບສູງ ດ້ວຍການນໍາໃຊ້ລະບົບເຕັກໂນໂລຊີທັນສະໄໝເຂົ້າໃນວຽກງານດັ່ງກ່າວ ໂດຍສະເພາະແມ່ນການຜະລິດກະສິກຳຈະຫຼຸດຜ່ອນຕົ້ນທຶນ, ປະຫຍັດເວລາ ແລະ ບໍ່ຈໍາເປັນໃຊ້ແຮງງານກໍາມະກອນຢ່າງຫຼວງຫຼາຍອີກຕໍ່ໄປ.

ກອງປະຊຸມດັ່ງກ່າວ, ຈັດຂຶ້ນໃນຕອນເຊົ້າວັນທີ 15 ຕຸລາ ຜ່ານມາ ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ ພາຍໃຕ້ການເປັນປະທານຂອງ ທ່ານ ປອ. ຈັນແສງ ພິມມະວົງ ຮອງລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ ມີບັນດາຫົວໜ້າກົມ, ສະຖາບັນ, ບັນດາຜູ້ຕາງໜ້າກະຊວງກ່ຽວຂ້ອງ ແລະ ຜູ້ປະກອບການເຂົ້າຮ່ວມ.