ສິນຄ້າກະສິກໍາລາວສົ່ງອອກໄປຈີນ ຕ້ອງໄດ້ຄຸນນະພາບ

418

ກະຊວງກະສິກໍາ ແລະ ປ່າໄມ້ ກັບ ບໍລິສັດ ຢູນນານ ຕ່ຽນຈານ ພັດທະນາກະສິກໍາ ຈໍາກັດ ຂອງ ສປ ຈີນ ຮ່ວມກັນລົງນາມເຊັນສັນຍາ ໂຄງການສ້າງສູນຮ່ວມມືພັດທະນາລະບົບມາດຕະຖານການຜະລິດ ແລະ ການກັກກັນພືດ, ສັດ, ຜະລິດຕະພັນພືດ, ສັດ ເພື່ອເປັນຈຸດກວດສອບສິນຄ້າໃຫ້ໄດ້ຄຸນນະພາບ ແລະ ໄດ້ມາດຕະຖານດ້ານສຸຂະນາໄມກ່ອນສົ່ງອອກໄປ ສປ ຈີນ.

ພິທີເຊັນສັນຍາດັ່ງກ່າວຈັດຂຶ້ນໃນວັນທີ 12 ຕຸລາ 2019 ທີ່ໂຮງແຮມແລນມາກ ໃຫ້ກຽດເຂົ້າຮ່ວມໂດຍ ທ່ານ ລຽນ ທີແກ້ວ ລັດຖະມົນຕີກະຊວງກະສິກໍາ ແລະ ປ່າໄມ້ ( ກປ ) ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ, ສ່ວນການລົງນາມເຊັນສັນຍາຕາງໜ້າຝ່າຍລາວໂດຍ ທ່ານ ຈັນທາ ທິບພະວົງພັນ ຫົວໜ້າກົມປູກຝັງ ກະຊວງ ກປ, ຕາງໜ້າຝ່າຍຈີນໂດຍ ທ່ານ ນາງ ຫຼຽງ ຢ່າລີ່ ປະທານ ບໍລິສັດ ຢູນນານ ຕ່ຽນຈານ ພັດທະນາກະສິກໍາ ຈໍາກັດ.

ທ່ານ ຈັນທາ ທິບພະວົງພັນ ກ່າວວ່າ: ເພື່ອສືບຕໍ່ຈັດຕັ້ງປະຕິບັດຜັນຂະຫຍາຍແຜນພັດທະນາເສດຖະກິດ – ສັງຄົມ    ແຫ່ງຊາດ 5 ປີ ຄັ້ງທີ 8 ( 2016 – 2018 ) ເອົາໃຈໃສ່ຊຸກຍູ້ສົ່ງເສີມການຜະລິດກະສິກໍາໃຫ້ໄດ້ທັງປະລິມານ ແລະ ຄຸນນະພາບ ແນໃສ່ເພື່ອຮັບປະກັນ ຄວາມປອດໄພໃນການສົ່ງອອກ ພືດ ແລະ ສັດ, ຜະລິດຕະພັນພືດ ແລະ ສັດຂອງ ສປປ ລາວ ໄປ       ສປ ຈີນ ແລະ ສາກົນ ໂດຍປະຕິບັດຕາມເງື່ອນໄຂການນໍາເຂົ້າຂອງ ສປ ຈີນ ບົນພື້ນຖານນໍາໃຊ້ມາດຕະຖານສາກົນດ້ານສຸຂະນາໄມທັງພືດ ແລະ ສັດ, ພາຍໃຕ້ສົນທິສັນຍາທີ່ລາວ ແລະ ຈີນ ເປັນພາຄີ ເປັນຕົ້ນແມ່ນສົນທິສັນຍາປ້ອງກັນພືດສາກົນ ( IPPC ), ສົນທິສັນຍາສຸຂະພາບສັດ ( OIE ), ສັນຍາວ່າດ້ວຍສຸຂະນາໄມພືດຂອງອົງການການຄ້າໂລກ ( SPS-WTO Agreement ) ແລະ ການຄ້າຂາຍລະ ຫວ່າງຊາດ ( TBT: ການກີດກັນທາງດ້ານການຄ້າໂດຍໃຊ້ຫຼັກວິຊາການ ) ເຊິ່ງເງື່ອນໄຂດັ່ງກ່າວຮຽກຮ້ອງໃຫ້ມີການເຈລະຈາເງື່ອນໄຂ ສິນຄ້າກະສິກໍາຂອງລາວ ຕ້ອງມີຄຸນນະພາບ ແລະ ໄດ້ມາດຕະຖານຕາມເງື່ອນໄຂທີ່ກໍານົດໄວ້.

ເຖິງຢ່າງໃດກໍຕາມ, ຄວາມອາດສາມາດໃນການພັດທະນາວຽກງານດັ່ງກ່າວຂອງປະເທດລາວ  ໂດຍສະເພາະແມ່ນດ້ານງົບປະມານການລົງທຶນ, ເຕັກນິກວິຊາການທີ່ທັນສະໄໝ, ຄວາມຮູ້ – ຄວາມສາມາດທາງດ້ານວິຊາສະເພາະ ແລະ ວັດຖຸອຸປະກອນທີ່ຈໍາເປັນຍັງບໍ່ມີ ຄວາມພ້ອມເທົ່າທີ່ຄວນ. ດັ່ງນັ້ນ, ຈຶ່ງຕ້ອງຊຸກຍູ້ສົ່ງເສີມການລົງທຶນຂອງເອກະຊົນເຂົ້າມາຊ່ວຍ. ພ້ອມດຽວກັນນັ້ນ, ພາຍຫຼັງສໍາເລັດການເຊັນສັນຍາກໍຈະເລີ່ມຈັດຕັ້ງປະຕິບັດໃຫ້ສໍາເລັດ ເປັນຕົ້ນການກໍ່ສ້າງຕຶກອາຄານຫ້ອງການ, ຫ້ອງວິໄຈມາດຕະຖານ, ຫ້ອງວິໄຈສຸຂະນາໄມພືດ ແລະ ສັດ, ສູນຝຶກອົບຮົມຄົບວົງຈອນ, ສູນວາງສະແດງສິນຄ້າກະສິກໍາ, ສະຖານທີ່ຄົ້ນຄວ້າທົດສອບພາກສະໜາມ ພ້ອມທັງສ້າງຄວາມເຂັ້ມແຂງໃຫ້ແກ່ພະນັກງານວິຊາການລາວ ພ້ອມຊຸກຍູ້ສົ່ງເສີມການຜະລິດຕິດພັນກັບການຕະຫຼາດໃຫ້ຂະຫຍາຍຕົວ ໂດຍກໍານົດໄລຍະເວລາການຮ່ວມມື 50 ປີ ແບ່ງອອກເປັນ 2 ໄລຍະ ຄື: ໄລຍະທີ 1 ( 2020 – 2021 ) ແລະ ໄລຍະທີ 2 ( 2022 – 2069 ) ໂດຍກໍານົດເນື້ອທີ່ສ້າງທໍາອິດຢູ່ສູນປ້ອງກັນພືດ ກົມປູກຝັງ ຈໍານວນ 7,8 ເຮັກຕາ, ທ່ານ ຈັນທາ ທິບພະວົງພັນ ກ່າວເພີ່ມຕື່ມ.

ທ່ານ ນາງ ຫຼຽງ ຢ່າລີ່ ໃຫ້ຮູ້ວ່າ: ເປົ້າໝາຍຂອງໂຄງການນີ້ແມ່ນເພື່ອສ້າງຕັ້ງສູນກະສິກໍາ ແບບປອດສານພິດ, ຍົກລະດັບມາດຕະຖານການຜະລິດກະສິກໍາໃນປັດຈຸບັນ ແລະ ຕໍ່ໜ້າໃຫ້ດີຂຶ້ນກວ່າເກົ່າ ໂດຍງົບປະມານກໍ່ສ້າງ 94 ລ້ານກວ່າໂດລາ ໃນເນື້ອທີ່ 33 ເຮັກຕາ, ມີລະບົບການຈັດຕັ້ງທີ່ມີແບບແຜນຕາມມາດຕະຖານຂອງ ສປ ຈີນ ເພື່ອການຮ່ວມມືທຸລະກິດທີ່ຍາວນານ ເຊິ່ງຫວັງວ່າຈະໄດ້ຮ່ວມມືກັບລາວອີກໃນຫຼາຍໆດ້ານ. ທັງນີ້, ກໍເພື່ອເປັນການດຶງດູດນັກລົງທຶນຕ່າງປະເທດເຂົ້າມາໃນລາວ ພ້ອມໄດ້ຮັບຄວາມຊ່ວຍເຫຼືອໃຫ້ຫຼາຍຂຶ້ນ ແນໃສ່ພັດທະນາເສດຖະກິດໃຫ້ນັບມື້ດີຂຶ້ນເລື້ອຍໆ.

( ຂ່າວ: ເອຢິບ, ຮູບ: ສຸກສະຫວັນ )

ທີ່ມາ: ຂ່າວເສດຖະກິດ-ການຄ້າ