ເຮືອບ້ານດົງເກາະໂລງ ຄວ້າແຊັມເຮືອປະເພນີ ໃນງານບຸນຊ່ວງເຮືອນະຄອນປາກເຊ

292

ການແຂ່ງຂັນຊ່ວງເຮືອເນື່ອງໃນໂອກາດບຸນອອກພັນສາປະວໍລະນາທີ່ນະຄອນປາກເຊ ແຂວງຈໍາປາສັກ ໄດ້ສຳເລັດລົງຢ່າງຈົບງາມພາຍຫລັງທີ່ດຳເນີນມາແຕ່ຕອນເຊົ້າຂອງວັນທີ 14 ຕຸລາ 2019 ທີ່ປາກແມ່ນ້ຳເຊໂດນ ການແຂ່ງຂັນຊ່ວງເຮືອປີນີ້ດຳເນີນໄປດ້ວຍບັນຍາກາດຄຶກຄື້ນມ່ວນຊື່ນ ທ່າມກາງສຽງເຊຍຈາກຜູ້ເຂົ້າເບິ່ງເຂົ້າຊົມຢ່າງຄັບຄາໜາແໜ້ນທັງສອງຟາກຝັ່ງແມ່ນໍ້າເຊໂດນ.

ຜົນການແຂ່ງຂັນແຕ່ລະປະເພດມີດັ່ງນີ້: ເຮືອປະເພດເຮືອ 24 ສີພາຍຊາຍ ມີ ເຂົ້າແຂ່ງຂັນ 7 ລຳ ເຊິ່ງອັນດັບທີ 1 ເຮືອກອງພົນທີ 5 ; ທີ 2  ແມ່ນເຮືອບ້ານດອນເຂາະ ແລະ ທີ 3 ແມ່ນເຮືອບ້ານແກ້ງຊັນ.

ເຮືອປະເພດ 33 ສີພາຍຊາຍເຮືອສູດແຂ່ງຂັນທັງໝົດ 8 ລຳ ເຊິ່ງອັນດັບທີ 1 ໄດ້ແກ່ ເຮືອປ້ອງກັນຄວາມສະຫງົບແຂວງ; ທີ 2 ແມ່ນເຮືອເມືອງໂພນທອງ ແລະ ທີ3 ແມ່ນເຮືອທະຫານແຂວງ. ສ່ວນເຮືອ 33 ສີພາຍເຮືອປະເພນີ (ຍິງ) ເຂົ້າແຂ່ງຂັນທັງໝົດ 5 ລຳ ເຊິ່ງອັນດັບທີ 1 ໄດ້ແກ່ເຮືອບ້ານດົງເກາະໂລງ; ທີ 2 ແມ່ນເຮືອບ້ານເວີນໄຊນ້ອຍ ແລະ ທີ 3 ແມ່ນເຮືອບ້ານດອນເຂາະ.

ສຳລັບເຮືອປະເພດ 33 ສີພາຍປະເພນີ (ຊາຍ) ມີເຂົ້າແຂ່ງຂັນ 8 ລຳ ເຊິ່ງອັນດັບທີ 1 ໄດ້ແກ່ຮືອ ບ້ານດົງເກາະໂລງ; ທີ 2 ແມ່ນເຮືອເມືອງໂຂງ ແລະ ທີ 3 ເຮືອຂອງທະຫານແຂວງ. ສ່ວນເຮືອປະເພດ 55 ສີພາຍເພດຊາຍມີເຂົ້າແຂ່ງຂັນ 2 ລຳ ເຊິ່ງອັນດັບທີ1 ໄດ້ແກ່ເຮືອບ້ານເມືອງໂພນທອງ; ທີ 2 ເຮືອປ້ອງກັນຄວາມສະຫງົບແຂວງ.

ພາຍຫຼັງການແຂ່ງຂັນໄດ້ສຳເລັດລົງກ່ໍໄດ້ມີການມອບຂັນລາງວັນ ແລະ ເງິນສົດໃຫ້ແກ່ຄະນະສີພາຍເຮືອຊ່ວງທີ່ໄດ້ລາງວັນຊະນະເລີດ,ຮອງຊະນະເລີດ,ລາງວັນຊົມເຊີຍຕາມລຳດັບ.

ໃນນັ້ນລາງວັນຊະນະເລີດ ເຮືອ 55 ສີພາຍແມ່ນຂັນເງິນ 1 ກິໂລ 1 ໝ່ວຍພ້ອມເງິນຈຳນວນ 8 ລ້ານກີບ.  ຈາກນີ້, ກ່ໍໄດ້ມອບລາງວັນອື່ນໆຕາມລຳດັບໂດຍການໃຫ້ກຽດມອບຂອງທ່ານ ບົວລິນ ວົງພະຈັນຮອງເຈົ້າແຂວງໆຈຳປາສັກ ປະທານຄະນະກຳມະການຈັດການບຸນອອກພັນສາຊ່ວງເຮືອ, ທ່ານ ສຸລິວັນ ສະຫວັດທະສິນ ເຈົ້ານະຄອນປາກເຊ,ບັນດາທ່ານໃນຄະນະປະຈຳພັກແຂວງ,ຄະນະກຳມະການຈັດງານ,ຄະນະສີພາຍເຮືອຊ່ວງຕະຫລອດຮອດມວນຊົນເຂົ້າຮ່ວມ.