ກະທົງເຂີນນໍ້າ ເນື່ອງຈາກນໍ້າມີໜ້ອຍ

755

ບຸນອອກພັນສາປະວໍລະນາໃນປີ ພສ 2562 ຄສ 2019 ແມ່ນກົງກັບວັນອາທິດ ທີ 13 ຕຸລາ 2019  ເຊິ່ງມີຫຼາກຫຼາຍກິດຈະກໍາ ທີ່ຊາວພຸດໄດ້ຮ່ວມກັບປະຕິບັດສືບທອດກັນມາແຕ່ບູຮານນະການເປັນຕົ້ນແມ່ນ ລອຍກະທົງ

ຄຳວ່າ ອອກພັນສາ ແມ່ນການອະນຸຍາດໃຫ້ພະພິກຂຸສົງອອກຈາກເຂດຈຳກັດ ຫຼັງຈາກການເຂົ້າຈຳພັນສາຄົບ 3 ເດືອນ ເພື່ອອອກໄປປະຕິບັດໜ້າທີ່ຢູ່ບ່ອນອື່ນໄດ້ເອີ້ນອີກຢ່າງໜຶ່ງວ່າ: ການອອກຈາກລະດູຝົນ. ເມື່ອເຖິງມື້ຂຶ້ນ 15 ຄໍ່າ ເດືອນ 11 ມື້ອອກພັນສາ ຊາວພຸດທັງຫຼາຍພາກັນຈັດຫາວັດຖຸທານຕ່າງໆມາໄວ້ຖວາຍທານຕາມກຳລັງສັດທາຂອງຕົນ. ໃນຕອນເຊົ້າມວນຊົນຊາວພຸດກໍມາເຕົ້າໂຮມກັນຖວາຍຂອງທານທີ່ໄດ້ກະກຽມໄວ້ດ້ວຍການຕັກບາດຢູ່ໃນວັດ ພ້ອມທັງຖວາຍຜ້າຈີວອນ ຫຼື ຜ້າຈຳນຳພັນສາໃຫ້ແກ່ພະພິກຂຸສົງ.

ຕາມປະເພນີລາວແຕ່ກ່ອນເວລາໃກ້ຈະຮອດວັນບຸນອອກພັນສາ ຊາວບ້ານໄດ້ກະກຽມເຮັດໝາກກະໂພກ ແລະ ບັ້ງໄຟດອກ ໂດຍນຳໃຊ້ຂີ້ໝື້ ແລະ ຂີ້ເຈຍມາຕຳປະສົມກັນໃຫ້ເປັນເຊື້ອເພີງຈຶ່ງນຳມາຫໍ່ດ້ວຍໃບລານແຫ້ງ. ພໍຕົກຄໍ່າໃນມື້ເພັງຊາວບ້ານກໍພາກັນມາເຕົ້າໂຮມກັນຢູ່ວັດເພື່ອພ້ອມກັນສ້າງເຮືອໄຟໂຄກ, ວຽນທຽນ, ຈູດໝາກກະໂພກ, ຈູດບັ້ງໄຟດອກ, ໄຕ້ໄຟບູຊາຄຸນພະພຸດພະທຳ ແລະ ພະສົງ.

ນອກນີ້, ແຕ່ລະຄອບຄົວຍັງໄດ້ສ້າງເຮືອໄຟໂຄກຢູ່ທີ່ເຮືອນຂອງໃຜລາວເພື່ອບູຊາຄຸນພະພຸດພະທຳ ແລະ ພະສົງ ຊາວບ້ານໄດ້ກະກຽມເຮືອໄຟນໍ້າບາງບ້ານກໍເຮັດແບບງ່າຍດາຍຈາກຕົ້ນກ້ວຍປະດັບປະດາດ້ວຍດອກໄມ້ຕາມໃຈມັກ ພ້ອມດ້ວຍທູບ ແລະ ທຽນ. ເມື່ອນໍາໄປລອຍນໍ້າກໍອະທິຖານຂໍໃຫ້ຊີວິດມີຄວາມສຸກ, ປັດສະຈາກໂລກໄພໄຂ້ເຈັບ, ປະສົບຜົນສຳເລັດໃນໜ້າທີ່ການງານ, ຂໍໃຫ້ໝົດທຸກ, ຂໍໃຫ້ມີໂຊກມີໄຊ ແລະ ອື່ນໆ ຈຶ່ງປ່ອຍອອກສູ່ແລວນໍ້າເພິ່ນເອີ້ນວ່າ: “ການໄຫຼເຮືອໄຟ”.

ພໍຮອດມື້ຕໍ່ມາຄືມື້ແຮມ 1 ຄ່ຳ ເດືອນ 11 ກໍມີການຈັດຊ່ວງເຮືອລະຫວ່າງຊຸມຊົນຕ່າງໆ ແລະ ຄົບງັນກັນຕາມປະເພນີຕະຫຼອດທັງຄືນ. ຈຸດປະສົງຂອງການຊ່ວງເຮືອ ແລະ ການໄຫຼເຮືອໄຟແມ່ນເພື່ອສົມມາຄາລະວະ ພ້ອມທັງບວງສວງຂໍໂຊກຂໍລາບຈາກພະຍານາກ ແລະ ເທວະດາອົງທີ່ໄດ້ປົກປັກຮັກສາແມ່ນໍ້າລຳເຊຕະຫຼອດຮອດຫ້ວຍຮ່ອງຄອງບຶງບ່ອນທີ່ຊາວພຸດທັງຫຼາຍໄດ້ທຳມາຫາກິນຢ່າງສະຫງົບສຸກ.

ສະເພາະຢູ່ນະຄອນຫຼວງວຽງຈັນກໍ່ມີວັດຫຼາຍແຫ່ງທີ່ຈັດກິດຈະກຳໄຕ້ໂຄມໄຟ ຫຼື ທຽນໄຟ ເປັນຕົ້ນແມ່ນຢູ່ວັດອົງຕື້ມະຫາວິຫານ ລອຍກະທົງຢູ່ແຄມນໍ້າຂອງໜ້າວັດຈັນ ເຊິ່ງຢ່າງໃດກໍ່ຕາມ ນໍ້າຂອງປີນີ້ຖືວ່າແຫ້ງລົງຫຼາຍ ຈົນເຮັດໃຫ້ການຊ່ວງເຮືອໄດ້ຈັດຢູ່ 2 ຈຸດ ສ່ວນການລອຍກະທົງ ຫຼາຍທ່ານກໍ່ຢາກລອຍທີ່ໜ້າວັດຈັນ ເຊິ່ງເປັນດັ່ງພາບລຸ່ມນີ້

width=

ປລ. ຢ່າປ່ອຍໃຫ້ເລື່ອງພວກນີ້ເປັນພຽງແຕ່ວຽກຂອງທາງພາກລັດເລີຍ ອັນໃດຄິດໄດ້ເຮັດໄດ້ກະເຮັດຊະ

ຂອບໃຈຮູບພາບຈາກ ໂນ້ ຈັນທະວີສຸກ