ເບື້ອງຕົ້ນມີຜູ້ເສຍຊີວິດ 1 ຄົນ, ບາດເຈັບສົມຄວນ 23 ຄົນ ຍິງ 5 ຄົນ.

312

ອິງຕາມບົດລາຍງານຂອງແຂວງຫຼວງພະບາງໃຫ້ຮູ້ວ່າ: ໃນຕອນບ່າຍຂອງວັນທີ 5 ກັນຍາ 2019 ຜ່ານມາ ເວລາ 17:00 ໂມງ ໄດ້ມີການລະເບີດຫີນຢູ່ໃກ້ກັບໂຮງງານຊີມັງຫຼວງພະບາງ ເຂດບ້ານໂພນມະນີ ເມືອງນໍ້າບາກ ແຂວງຫຼວງພະບາງ ທີ່ເປັນເຫດໃຫ້ເກີດຄວາມເສຍຫາຍຕໍ່ຊີວິດ ແລະ ຊັບສິນຂອງປະຊາຊົນເຂດໃກ້ຄຽງນັ້ນ.

ຜ່ານການລົງຕິດຕາມ-ເກັບກໍາຂໍ້ມູນຕົວຈິງ ພົບວ່າ: ທ້າວ ລາວເຈົ່າ ເຊິ່ງເຄີຍເປັນຜູ້ຮັບເໝົາຂຸດຄົ້ນ ແລະ ສະໜອງຫີນປູນໃຫ້ແກ່ໂຮງງານຊີມັງຫຼວງພະບາງໄດ້ມາສະເໜີເພື່ອຂໍສືບຕໍ່ສັນຍາ, ແຕ່ທາງໂຮງງານໄດ້ປະຕິເສດ ເພາະໂຮງງານມີແຜນຈະພັດທະນາ ແລະ ຂຸດຄົ້ນບໍ່ຫີນດັ່ງກ່າວເອງເພື່ອຫຼຸດຜ່ອນຕົ້ນທຶນການຜະລິດ.

ແຕ່ເນື່ອງຈາກທ້າວ ລາວເຈົ່າ ຍັງມີທາດລະເບີດຢູ່ໃນຄອບຄອງ. ສະນັ້ນ, ເຈົ້າເມືອງນໍ້າບາກຈຶ່ງໄດ້ແຕ່ງຕັ້ງຄະນະກໍາມະການແກ້ໄຂຂໍ້ຂັດແຍ່ງເພື່ອແກ້ໄຂບັນຫາດັ່ງກ່າວ ເຊິ່ງໄດ້ນໍາເອົາທາດລະເບີດຈໍານວນ 14 ກິໂລ ເກັບມ້ຽນໄວ້ຢູ່ສາງກອງບັນຊາການທະຫານເມືອງນໍ້າບາກ ແລະ ກໍານົດເວລາຈູດທໍາລາຍທາດລະເບີດທີ່ໄດ້ບັນຈຸໄວ້ໃນຫີນ 4 ຈຸດ ຈໍານວນ 12 ໂຕນ ໃນວັນທີ 5 ຕຸລາ 2019 ເວລາ 16:00 ໂມງ ຫາ 17:00 ໂມງ.

ຜ່ານການລະເບີດຕົວຈິງເຫັນວ່າເກີດຄວາມຜິດພາດ, ບໍ່ຮັບປະກັນທາງດ້ານເຕັກນິກຂອງການວາງ ແລະ ຈຸດລະເບີດ ອັນເປັນຜົນເຮັດໃຫ້ແຮງດັນລະເບີດນໍາເອົາຫີນຈໍານວນຫຼາຍອອກຈາກນອກພື້ນທີ່ ເຊິ່ງຄວາມເສຍຫາຍເບື້ອງຕົ້ນມີຜູ້ເສຍຊີວິດ 1 ຄົນ, ບາດເຈັບສົມຄວນ 23 ຄົນ ຍິງ 5 ຄົນ. ໃນນັ້ນ, ບາດເຈັບສາຫັດ 8 ຄົນ ຍິງ 1 ຄົນ ແລະ ເປັນຄົນຈີນ 1 ຄົນ; ເຮືອນເປ່ເພ 81 ຫຼັງ, ເສຍຫາຍຢ່າງໜັກ 2 ຫຼັງ; ລົດໃຫຍ່-ລົດຈັກເສຍຫາຍຫຼາຍຄັນ.

ສ່ວນເຕົາເຜົາຊີມັງ ແລະ ອາຄານຈໍານວນໜຶ່ງຂອງໂຮງງານໄດ້ຮັບຄວາມເສຍຫາຍ ແລະ ໄດ້ຢຸດການຜະລິດເພື່ອປະເມີນຄວາມເສຍຫາຍ.

ໂອກາດນີ້, ໂຮງງານຊີມັງຫຼວງພະບາງໄດ້ມອບເງິນຊ່ວຍເຫຼືອຜູ້ຖຶກເຄາະຮ້າຍເບື້ອງຕົ້ນ 10 ລ້ານກີບ, ສ່ວນຄອບຄົວຂອງທ່ານ ລາວເຈົ່າ (ທີ່ເປັນເຈົ້າຂອງລະເບີດ ແລະ ເປັນຜູ້ລະເບີດ) ເຈົ້າໜ້າທີ່ໄດ້ກັກຕົວໄວ້ກອງບັນຊາການ ປກສ ເມືອງເພື່ອດໍາເນີນຄະດີ.