ເມືອງອຸທຸມພອນ ສະເຫຼີມສະຫຼອງວັນຄູແຫ່ງຊາດ ຄົບຮອບ 25 ປີ

351

ພິທີສະເຫຼີມສະຫຼອງ ວັນຄູແຫ່ງຊາດ 7 ຕຸລາ  ຄົບຮອບ 25 ປີ (1994-2019) ຂອງເມືອງອຸທຸມພອນ ຈັດຂຶ້ນຢ່າງເປັນທາງການ ໃນຕອນເຊົ້າຂອງວັນທີ 7 ຕຸລາ 2019 ຢູ່ທີ່ສະໂມສອນສຶກສາ ສາມັກຄີ ໂດຍການເຂົ້າຮ່ວມຂອງທ່ານ ປະສົງສິນ ຈະເລີນສຸກ ເລຂາຄະນະບໍລິຫານງານພັກເມືອງ ເຈົ້າເມືອງອຸທຸມພອນ, ທ່ານ ຖາວອນ ອິນສີຊຽງໃໝ່ ຮອງຫົວໜ້າພະແນກສຶກສາທິການ-ກິລາແຂວງ, ມີບັນດາຫົວໜ້າຫ້ອງການ, ຄະນະຫ້ອງການ, ພະນັກງານ-ຄູອາຈານ ຕະຫຼອດຮອດນັກຮຽນຮູ້ ປັນຍາຊົນພາຍໃນເມືອງເຂົ້າຮ່ວມ.

ໃນພິທີ ທ່ານ ປະສົງສິນ ຈະເລີນສຸກ ໄດ້ຂຶ້ນຜ່ານບົດປາໄສ ເນື່ອງໃນໂອກາດສະເຫຼີມສະຫຼອງ ວັນຄູແຫ່ງຊາດ ຄົບຮອບ 25 ປີ ມີບາງຕອນກ່າວວ່າ: ການພັດທະນາເສດຖະກິດ-ສັງຄົມຂອງຊາດໜຶ່ງ ທີ່ມີຄວາມຈະເລີນຮຸ່ງເຮືອງ ນັ້ນມັນຂຶ້ນກັບຫຼາຍປັດໃຈ, ແຕ່ປັດໃຈທີ່ມີລັກສະນະຕັດສິນກວ່າໝູ່ແມ່ນ ປັດໃຈກ່ຽວກັບຄົນ ເຊິ່ງຄົນນັ້ນປະກອບດ້ວຍຄວາມຮູ້ຄວາມສາມາດ, ແນວຄິດຄຸນສົມບັດ ແລະ ສຸຂະພາບແຂງແຮງດີ .

ໂອກາດດຽວກັນ ທ່ານເຈົ້າເມືອງອຸທຸມພອນ ກໍ່ຍັງໄດ້ສະແດງຄວາມສາມັກຄີຮັກແພງ ແລະ ຝາກຄວາມຢ້ຽມຢາມຖາມຂ່າວອັນອົບອຸ່ນ ມາຍັງຜູ່ບໍລິຫານການສຶກສາ, ຄູ-ອາຈານ ທັງພາກລັດ ແລະ ເອກະຊົນ ທົ່ວເມືອງ ພ້ອມທັງອວຍພອນໃຫ້ ຄູ-ອາຈານ ທຸກໆທ່ານ ຈົ່ງມີພະລານາໄມສົມບູນ ປາສະຈາກພະຍາດໂລຄາ ມີສຸຂະພາບແຂງແຮງ ແລະ ປະສົບຜົນສຳເລັດໃນໜ້າທີ່ການ ທັງສ່ວນລວມ ແລະ ສ່ວນຕົວທຸກປະການ.

ນອກຈາກນີ້ ໃນພິທີ ຍັງໄດ້ມີການມອບຂອງຂວັນ ແລະ ໃບຍ້ອງຍໍຂັ້ນຕ່າງໆ ໃຫ້ກັບບຸກຄົນທີ່ມີຜົນງານດີເດັ່ນ ໃນການປະກອບສ່ວນ, ເຄື່ອນໄຫວ ແລະ ຈັດຕັ້ງປະຕິບັດ ວຽກງານການສຶກສາໃນໄລຍະ 01 ປີທີ່ຜ່ານມາຕື່ມອີກ.