ສາລະວັນອະນາໄມຄອງເໝືອງ ກຽມຜະລິດລະດູແລ້ງ

459

ວັນທີ 2 ຕຸລາ 2019 ພໍ່ແມ່ປະຊາຊົນ ບ້ານນາໂພເລີນ ເມືອງແຂວງສາລະວັນ ສ້າງຂະບວນການອະນາໄມຄອງຊົນລະປະທານ ກຽມສູ່ການຜະລິດລະດູແລ້ງ ໃຫ້ທ່ວງທັນຕາມລະດູການ, ໂດຍການນຳພາຂອງ ທ່ານ ຄຳແຝງ ທຳມະວົງ ຫົວໜ້າໜ່ວຍງານຊົນລະປະທານ ຫ້ອງການກະລິກຳ-ປ່າໄມ້ເມືອງສາລະວັນ ແລະ ຄາດວ່າຈະໃຫ້ໄດ້ຕົກກ້າ ໃນກາງເດືອນຕຸລານີ້.

ທ່ານ ຄຳແຝງ ທຳມະວົງ ໄດ້ໃຫ້ສຳພາດວ່າ: ການສ້າງຂະບວນອອກແຮງງານອະນາໄມຄອງຊົນລະປະທານຄັ້ງນີ້ ເພື່ອກຽມການຜະລິດເຂົ້ານາແຊງ ຂອງປະຊາຊົນທ່ວງທັນກັບລະດູການ, ທັງ ເປັນການຟື້ນຟູຫລັງນ້ຳຖ້ວມ. ສຳລັບການແບ່ງຄວາມຮັບຜິດຊອບອະນາໄມຄອງຊົນລະປະທານຂອງປະຊາຊົນເຂດບ້ານນາໂພເລີນ ແມ່ນອະນາໄມຄອງແມ່(ຄອງໃຫຍ່) 2 ກິໂລແມັດ ແລະ ຄອງຊອຍເຂົ້າບ້ານ 4ກິໂລແມັດ

ມີປະຊາຊົນເຂົ້າຮ່ວມ 150 ຄົນ ແລະ ໄດ້ແບ່ງຂະບວນອະນາໄມອອກເປັນ 8 ຈຸ ເປັນຕົ້ນຖາງຫຍ້າ, ອະນາໄມເສດໄມ້ຕ່າງໆທີ່ຄ້າງຕາມຄອງ ເຮັດໃຫ້ນ້ຳໄຫລສະດວກ ທັງນີ້ ກໍເພື່ອຮັບປະກັນການສະໜອງນ້ຳເຂົ້ານາໃຫ້ປະຊາຊົນຢ່າງພຽງພໍ ແລະ ທົ່ວເຖິງ. ບ້ານນາໂພເລີນ ເມືອງສາລະວັນ ມີພົນລະເມືອງທັງໝົດ 847 ຄົນ, ຍິງ 436 ຄົນ, ມີ 117 ຫລັງຄາເຮືອນ 136 ຄອບຄົວ, ປະຊາຊົນສ່ວນໃຫຍ່ແມ່ນມີອາຊີບປູກຝັງ ເຊິ່ງບ້ານດັ່ງກ່າວ ມີເນື້ອທີ່ທຳການຜະລິດທັງໝົດ 200 ກວ່າເຮັກຕາ.