ລັດຖະມົນຕີ ກວຕ ຕ້ອນຮັບທູດຍິປຸ່ນຄົນໃໝ່ ປະຈຳລາວ

371

ໃນວັນທີ 30 ກັນຍາ 2019 ນີ້, ທ່ານ ບັນດິດ ສຈ. ບໍ່ວຽງຄຳ ວົງດາລາ, ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ (ກວຕ)ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງ ທ່ານ Keizo Takewaka, ເອກອັກຄະລັດຖະທູດ ຍີ່ປຸ່ນ ຄົນໃໝ່ ປະຈຳ ສປປ ລາວ ທີ່ຫ້ອງຮັບແຂກຂອງກະຊວງ.

ໂອກາດນີ້, ທ່ານ ລັດຖະມົນຕີໄດ້ກ່າວສະແດງຄວາມຍິນດີຕ້ອນຮັບການເຂົ້າຢ້ຽມຂໍ່ານັບຂອງທ່ານເອກອັກຄະລັດຖະທູດ ຄົນໃໝ່ທີ່ໄດ້ມາດຳລົງຕຳແໜ່ງຢູ່ສປປ ລາວ, ທ່ານກ່າວວ່າ ໄລຍະຜ່ານມາ ການຮ່ວມມືລະຫວ່າງສອງປະເທດຍີ່ປຸ່ນ-ລາວ ລາວ-ຍີ່ປຸ່ນ ມີຫຼາຍອັນທີ່ພົ້ນເດັ່ນ ໃນການປະກອບສ່ວນສຳຄັນເຂົ້າໃນການເສີມຂະຫຍາຍສາຍພົວພັນມິດຕະພາບຮັດແໜ້ນຄວາມສາມັກຄີແລະ ການຮ່ວມມື ລະຫວ່າງສອງປະເທດ ເວົ້າລວມ, ເວົ້າສະເພາະ ກວຕ ແລະ ຍີ່ປຸ່ນ ແມ່ນໂຄງການສ້າງສູນຂໍ້ມູນທີ່ມີປະສິດທິພາບ (DATA Center) ທີ່ໄດ້ຮັບການຊ່ວຍເຫຼືອລ້າຈາກລັດຖະບານຍິປຸ່ນໃນປີ 2015-2017.

ທ່ານຍັງສະແດງຄວາມເຊື່ອໝັ້ນວ່າຍີ່ປຸ່ນຈະສືບຕໍ່ໃຫ້ການຊ່ວຍເຫຼືອສປປ ລາວ ຕື່ມອີກ ໂດຍສະເພາະແມ່ນ ດ້ານການພັດທະນາຊັບພະຍາກອນມະນຸດ, ການຮ່ວມມືໃນການຄົ້ນຄວາມຫຼາກຫຼາຍດ້ານຊີວະນາໆພັນແລະ ອື່ນໆ ເພື່ອແນໃສ່ຍົກສູງສົ່ງເສີມການພົວພັນຮ່ມມືຂອງທັງສອງປະເທດໃຫ້ນັບມື້ນັບສູງຂຶ້ນນຳຜົນປະໂຫຍດສູງສຸດມາສູ່ປະຊາຊົນສອງຊາດ ລາວ-ຍີ່ປຸ່ນ ຍີ່ປຸ່ນ-ລາວ.

ໂອກາດດຽວກັນ, ທ່ານ  ເອກອັກຄະລັດຖະທູດ ໄດ້ສະແດງຄວາມຂອບໃຈຕໍ່ ທ່ານລັດຖະມົນຕີທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະທ່ານຍັງໄດ້ເຊີນທ່ານລັດຖະມົນຕີໄປຢ້ຽມຢາມເພື່ອປຶກສາຫາລືກ່ຽວກັບການຮ່ວມມືກັັນ ແລະພ້ອມຈະສືບຕໍ່ໃຫ້ການສະໜັບສະໜູນ ແລະ ການຊວ່ຍເຫຼືອຫຼາຍດ້ານແກ່ ສປປ ລາວ ກໍຄື ກວຕເປັນແມ່ນແມ່ນການສົ່ງເສີມພັດທະນາຊັບພະຍາກອນມະນຸດ ແລະ ແນໃສ່ຮັດແໜ້ນຄວາມສາມັກຄີລະຫວ່າງສອງປະເທດໃຫ້ມີການເຕີບໃຫຍ່ຂະຫຍາຍຕົວຂຶ້ນເທື່ອລະກ້າວ.

ເວົ້າສະເພາະແມ່ນໃນຂົງເຂດວຽກງານ ວິທະຍາສາດ ແລະ ເຕັກໂນໂລຊີຊຶ່ງລັດຖະບານຂອງທັງສອງປະເທດກໍໄດ້ໃຫ້ຄວາມສຳຄັນເປັນຢ່າງສູງຕໍ່ການພັດທະນາວຽກງານວິທະຍາສາດ ແລະ ເຕັກໂນໂລຊີ.

ໃນຕອນທ້າຍ, ທ່ານລັດຖະມົນຕີ ກວຕ ໄດ້ກ່າວອວຍພອນຕໍ່ທ່ານເອກອັກຄະລັດຖະທູດຈົ່ງປະສົບຜົນສຳເລັດໃນໜ້າທີ່ອັນມີກຽດ ແລະ ສູງສົ່ງຕະຫຼອດໄລຍະການດຳລົງຕໍາແໜ່ງການທູດຢູ່ ສປປ ລາວ.

ຂອບໃຈ ຂ່າວ-ພາບ: ກະຊວງ ກວຕ