ເອດີບີ ຄາດເສດຖະກິດລາວ ຢູ່ໃນລະດັບ 6,2%.

482

ທະນາຄານພັດທະນາອາຊີ ຫຼື (ADB) ຄາດວ່າເສດຖະກິດລາວໃນປີ 2019 ຈະຢູ່ໃນລະດັບ 6,2% ເຊິ່ງເປັນການຫຼຸດລົງຈາກທີ່ຄາດໄວ້ເມື່ອເດືອນເມສາຜ່ານມາຢູ່ທີ່ 6,5% ທັງນີ້ກໍ່ຍ້ອນຂະແໜງອຸດສາຫະກຳ ແລະ ການບໍລິການອ່ອນໂຕລົງໃນເຄິ່ງປີ ລວມທັງການຜະລິດໃນຂະແໜງກະສິກຳ, ການສົ່ງອອກໄຟຟ້າ ແລະ ນັກທ່ອງທ່ຽວສາກົນເຂົ້າມາລາວຫຼຸດລົງ.

      ທ່ານ ສຸລິນທອງ ເຮືອງຄຳສິງ ນັກເສດຖະສາດອາວຸໂສ ປະຈໍາທະນາຄານພັດທະນາອາຊີ ກ່າວວ່າ: ອິງຕາມບົດລາຍງານສະບັບໃໝ່ຫຼ້າສຸດປະຈໍາປີ 2019 ນີ້ ເຫັນວ່າອັດຕາການຂະຫຍາຍຕົວຂອງເສດ ຖະກິດລາວຈະຢູ່ໃນ 6,2% ເທົ່ານັ້ນ ເຊິ່ງຫຼຸດລົງ 0,3% ຫາກທຽບໃສ່ແຜນຄາດຄະເນເມື່ອເດືອນເມສາຜ່ານມາຢູ່ທີ່ 6,5%.

ເຫດຜົນກໍ່ມີຫຼາຍປັດໃຈ ໂດຍສະເພາະແມ່ນຂະແໜງກະສິກຳໃນພາກກາງ ແລະ ພາກໃຕ້ ເຊິ່ງເປັນແຫຼ່ງຜະລິດເຂົ້າທີ່ສໍາຄັນຂອງປະເທດໄດ້ຮັບຜົນກະທົບຈາກໄພທໍາມະຊາດ; ການສົ່ງອອກໄຟຟ້າໃນ 6 ເດືອນຕົ້ນປີ 2019 ຕໍ່າກວ່າໄລຍະດຽວກັນຂອງປີ 2018; ການສົ່ງອອກແຮ່ທາດຫຼຸດລົງ, ສ່ວນການທ່ອງທ່ຽວຍັງບໍ່ຄຶກຄັກປານໃດ? ເພາະນັກທ່ອງທ່ຽວສາກົນເຂົ້າມາລາວໜ້ອຍ ເຊິ່ງໃນ 6 ເດືອນຕົ້ນປີນີ້ເຕີບໂຕໄດ້ພຽງ 5% ຫາກທຽບໃສ່ກັບໄລຍະດຽວກັນຂອງປີ 2018 ນັກທ່ອງທ່ຽວເພີ່ມຂຶ້ນ 6,1%.

ໂອກາດນີ້, ທ່ານ ລັດຕະນະໄຕ ຫຼວງລາດບັນດິດ ຜູ້ຊ່ຽວຊານດ້ານການປົກຄອງບໍລິຫານ ປະຈໍາທະນາຄານພັດທະນາອາຊີ ຍັງໄດ້ອະທິບາຍຕື່ມອີກວ່າ: ຕາມການວິເຄາະພົບວ່າການການສົ່ງອອກສິນຄ້າຂອງລາວໄປຍັງຕ່າງປະເທດມີການຂະຫຍາຍຕົວເພີ່ມຂຶ້ນຢູ່ທີ່ 5% ແລະ ການນໍາເຂົ້າຫຼຸດລົງປະມານ 2,5% ຖືເປັນຜົນດີຕໍ່ການຜະລິດພາຍໃນເຮັດໃຫ້ສັງຄົມຫັນມາຊົມໃຊ້ສິນຄ້າທີ່ເຮົາຜະລິດໄດ້ຫຼາຍຂຶ້ນ.

ສ່ວນການອ່ອນຄ່າຂອງເງິນກີບທຽບໃສ່ສະກຸນເງິນບາດ ແລະ ໂດລາ ຜ່ານມາອັດຕາແລກປ່ຽນຢູ່ທະ ນາຄານທຸລະກິດກັບຂ້າງນອກຍັງຫຼຸດໂຕນກັນຫຼາຍ ຄາດວ່າເງິນກີບຍັງສືບຕໍ່ອ່ອນລົງແຕ່ນີ້ຫາທ້າຍປີ ແຕ່ຈະບໍ່ອ່ອນຄ່າຫຼາຍປານໃດ.

ກອງປະຊຸມເຜີຍແຜ່ບົດລາຍງານ ການຄາດຄະເນການພັດທະນາໃນອາຊີປະຈໍາປີ 2019 ສະບັບ ໃໝ່ຫຼ້າສຸດ ຈັດຂຶ້ນໃນວັນທີ 25 ກັນຍາ 2019 ຜ່ານມາ ທີ່ສໍານັກງານທະນາຄານພັດທະນາອາຊີ ປະຈໍາລາວ ພາຍໃຕ້ການລາຍງານຂອງທ່ານ ລັດຕະນະໄຕ ຫຼວງລາດບັນດິດ ຜູ້ຊ່ຽວຊານດ້ານການປົກຄອງບໍລິຫານ ປະຈໍາທະນາຄານພັດທະນາອາຊີ, ທ່ານ ສຸລິນທອງ ເຮືອງຄຳສິງ ນັກເສດຖະສາດອາວຸໂສ ປະຈໍາທະນາຄານພັດທະນາອາຊີ ພ້ອມດ້ວຍແຂກຖຶກເຊີນຈາກກະຊວງ ແລະ ສະຖາບັນຄົ້ນຄວ້າຕ່າງໆເຂົ້າຮ່ວມ.

ທີ່ມາ: ຫນັງສືພິມ ເສດຖະກິດ-ການຄ້າ