ເຈົ້າແຂວງໄຊສົມບູນ ເນັ້ນໃຫ້ພະແນກການເອົາໃຈໃສ່ວຽກສໍາຄັນ

975

<

ກອງປະຊຸມອົງການປົກຄອງແຂວງໄຊສົມບູນປະຈຳໄຕມາດ III ແລະ ທິດທາງແຜນການ 3 ເດືອນທ້າຍປີ 2019ໄດ້ດຳເນີນມາເປັນເວລາ 2 ວັນ ແລະ ສຳເລັດລົງໃນຕອນແລງຂອງວັນທີ 24 ກັນຍາ 2019 ທີ່ສະໂມສອນເມືອງອະນຸວົງໂດຍການເປັນປະທານ ຂອງທ່ານ ພົນຕີ ຄຳລຽງ ອຸທະໄກສອນ ເຈົ້າແຂວງໄຊສົມບູນ, ມີທ່ານຮອງເຈົ້າແຂວງ,ຄະນະປະຈຳສະພາປະຊາຊົນແຂວງ, ຫົວໜ້າພະແນກການ, ອົງການ, ກົມກອງອ້ອມຂ້າງແຂວງ ພ້ອມດ້ວຍເຈົ້າເມືອງ5 ເມືອງເຂົ້າຮ່ວມ.

ຕະຫລອດໄລຍະເວລາ 2 ວັນທີ່ຜ່ານມາ ຜູ້ແທນກອງປະຊຸມໄດ້ຜັດປ່ຽນກັນລາຍງານ ແລະ ປະກອບຄຳຄິດຄຳເຫັນ ແລະ ເຈາະຈິ້ມ ດ້ວຍຄວາມຮັບຜິດຊອບສູງ, ກົບໄປກົງມາກ່ຽວກັບການຊຸກຍູ້ສົ່ງເສີມການຜະລິດເປັນສິນຄ້າຂອງປະຊາຊົນ ໂດຍສະເພາະແມ່ນການປູກຝັງ-ລຽງສັດ; ວຽກງານການພັດທະນາຊົນນະບົດ ແລະ ລຶບລ້າງຄວາມທຸກຍາກຕິດພັນກັບການຈັດສັນພູມລຳເນົາອາຊີບຄົງທີໃຫ້ແກ່ປະຊາຊົນ; ຄົ້ນຄວ້າປຶກສາຫາລືການຄຸ້ມຄອງການສຳຫຼວດ ແລະ ຂຸດຄົ້ນແຮ່ທີ່ບໍ່ຖືກຕ້ອງ; ການໄກ່ເກ່ຍແກ້ໄຂຊົດເຊີຍໂຄງການກໍ່ສ້າງທາງເບຕົງ 3 ເສັ້ນ; ໂຄງການກໍ່ສ້າງຕ້ານຕາຝັງເຈື່ອນ ແລະ ພັດທະນາແຄມນ້ຳຈັ້ງຊ້ວງ 2; ການຈັດຕັ້ງປະຕິບັດໂຄງການຈຸດສຸມຜາລະແວກ; ການຄຸ້ມຄອງ ແລະ ແກ້ໄຂສະ ພາບການບຸກລຸກຈັບຈ່ອງທີ່ດິນ; ການຖາງປ່າເຮັດໄຮ່ຊະຊາຍຢູ່ໃນເຂດປ່າສະຫງວນແຫ່ງຊາດ ລວມໄປເຖິງການຄຸ້ມຄອງ ແລະ ແກ້ໄຂສະພາບການຍົກຍາຍພົນລະເມືອງທີ່ບໍ່ຖືກຕ້ອງ.

ທັງໝົດນີ້, ໄດ້ສ່ອງແສງໃຫ້ເຫັນເຖິງຄວາມເປັນຈິງດ້ານດີ, ດ້ານອ່ອນ ແລະ ຂໍ້ຄົງຄ້າງໃນການ ຈັດຕັ້ງປະຕິບັດໄລຍະຜ່ານມາ ເພື່ອພ້ອມກັນຄົ້ນຄວ້າຕີລາຄາຄືນ, ການຈັດຕັ້ງປະຕິບັດວຽກງານອົງການປົກຄອງແຂວງປະຈຳໄຕມາດ 3 ແລະ ກຳນົດທິດທາງ, ມາດຕະການແກ້ໄຂບັນຫາຂໍ້ຄົງຄ້າງໃຫ້ສຳເລັດຕາມຄາດໝາຍທີ່ວາງໄວ້.

ໃນຕອນທ້າຍຂອງກອງປະຊຸມ, ທ່ານ ພົນຕີ ຄຳລຽງ ອຸທະໄກສອນ ໄດ້ມີຄຳເຫັນຕໍ່ພິທີເຊິ່ງທ່ານ ສະເໜີໃຫ້ສືບຕໍ່ດັດແປງແກ້ໄຂບັນຫາທີ່ເປັນຈຸດອ່ອນຂໍ້ຄົງຄ້າງໃຫ້ສອດຄ່ອງກັບສະພາບຕົວຈິງເພື່ອພ້ອມກັນສືບຕໍ່ຈັດຕັ້ງປະຕິບັດບັນດາວຽກງານຈຸດສຸມ ແລະ ທິດທາງແຜນການ 3 ເດືອນ. ນອກນັ້ນ, ທ່ານຍັງໄດ້ເນັ້ນໜັກໃຫ້ເອົາໃຈໃສ່ສຶກສາອົບຮົມການເມືອງ, ນຳພາແນວຄິດໃຫ້ລັດຖະກອນ ແລະ ປະຊາຊົນຢ່າງເປັນປົກກະຕິ, ສືບຕໍ່ສຸມໃສ່ແກ້ໄຂບັນຫາຄວາມບໍ່ສະຫງົບປະກົດການຫຍໍ້ທໍ້ຕ່າງໆໃນສັງຄົມ, ຈັດຕັ້ງແຜນພັດທະນາເສດຖະກິດ-ສັງຄົມຂອງປີ 2019 ໃຫ້ບັນລຸຕາມແຜນທີ່ວາງໄວ້.

ພິເສດແມ່ນໃຫ້ສືບຕໍ່ເອົາໃຈໃສ່ຈັດຕັ້ງປະຕິບັດເປົ້າໝາຍການພັດທະນາແບບຍືນຍົງໃຫ້ແຂງແຮງກວ່າເກົ່າ
ຄຽງຄູ່ກັບການພົວພັນຮ່ວມມືກັບຕ່າງປະເທດ ແລະ ພ້ອມກັນນຳໄປຄົ້ນຄວ້າ, ຈັດຕັ້ງຜັນຂະ ຫຍາຍຢູ່ໃນຂະແໜງການ,ກົມກອງຂອງຕົນໃຫ້ປະກົດຜົນເປັນຈິງ ເພື່ອເຮັດໃຫ້ແຜນພັດທະນາເສດຖະ ກິດສັງຄົມ ປະຈຳປີ 2019 ຂອງແຂວງໄຊສົມບູນບັນລຸຕາມຄາດໝາຍທີ່ວາງໄວ້.

[ຂ່າວ-ພາບ: ວຽງໃຈ]