ພະແນກການເງິນ ແຂວງຫຼວງພະບາງ ສັບຊ້ອນພະນັກງານຫຼາຍຕຳແໜ່ງ

439

ພະແນກການເງິນ ແຂວງຫຼວງພະບາງ ປະກາດສັບຊ້ອນພະນັກງານຫຼັກແຫຼ່ງຫຼາຍຕຳແໜ່ງ ໃນວັນ 6 ກັນຍາ 2019 ໂດຍການເປັນປະທານຮ່ວມຂອງ ທ່ານ ຄຳຂັນ ຈັນທະວີສຸກ ເຈົ້າແຂວງຫຼວງພະບາງ, ທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນ, ມີຫົວໜ້າກົມ, ຫົວໜ້າພະແນກການຂອງແຂວງ, ພ້ອມດ້ວຍພະນັກງານໃນແຕ່ລະຂະແໜງການເຂົ້າຮ່ວມ.

ໃນພິທີຫົວໜ້າກົມຈັດຕັ້ງ – ພະນັກງານກະຊວງການເງິນ ໄດ້ຂຶ້ນຜ່ານຂໍ້ຕົກລົງຂອງທ່ານລັດຖະມົນຕີ ກະຊວງການເງິນ ວ່າດ້ວຍການຍົກຍ້າຍ, ສັບຊ້ອນພະນັກງານຫຼັກແຫຼ່ງໃນຂະແໜງການເງິນຂອງແຂວງຫຼວງພະບາງ ໂດຍຍົກຍ້າຍເອົາ ທ່ານ ສີສຸພັນ ສີສະຫວັດ ກຳມະການພັກແຂວງ ຫົວໜ້າພະແນກການເງິນແຂວງ ໄປຮັບໜ້າທີ່ໃໝ່ຢູ່ພະແນກວິທະຍາສາດ ແລະ ເຕັກໂນໂລຊີແຂວງ, ຍົກຍ້າຍ ທ່ານ ນາງ ບົວຈີນ ຈັນທະພອນ ຫົວໜ້າສ່ວຍສາອາກອນປະຈຳແຂວງ ມາຮັບໜ້າທີ່ໃໝ່ຢູ່ພະແນກການເງິນແຂວງ, ຍົກຍ້າຍ ແລະ ແຕ່ງຕັ້ງ ທ່ານ ຄຳມົນ ຈັນມະວົງ ຮອງຫົວໜ້າພະແນກການເງິນແຂວງ ເປັນຫົວໜ້າສ່ວຍສາອາກອນປະຈຳແຂວງ, ຍົກຍ້າຍ ທ່ານ ພູຄຳ ແສງດາໄລ ຮອງຜູ້ອໍານວຍການວິທະຍາໄລການເງິນພາກເໜືອ ມາຮັບໜ້າທີ່ໃໝ່ຢູ່ພະແນກການເງິນແຂວງ ແລະ ປະກາດແຕ່ງຕັ້ງ ທ່ານ ແກ່ນຈັນ ບຸນເຕີມ ຮອງຫົວໜ້າສະຖາບັນເສດຖະກິດ – ການເງິນ ເປັນຜູ້ອຳນວຍການວິທະຍາໄລການເງິນພາກເໜືອ, ແຕ່ງຕັ້ງ ທ່ານ ໄຊເສດຖາ ໄຊຊະນິດ ຫົວໜ້າພະແນກຈັດຕັ້ງສະຖາບັນເສດຖະກິດ – ການເງິນ ແລະ ທ່ານ ພອນໄຊ ສີອຸດົມພັນ ຫົວໜ້າຂະແໜງວິຊາການເປັນຮອງຜູ້ອຳນວຍການວິທະຍາໄລການເງິນພາກເໜືອ.

ຈາກນັ້ນ, ຕາງໜ້າຄະນະຈັດຕັ້ງແຂວງ ໄດ້ຂຶ້ນຜ່ານຂໍ້ຕົກລົງຂອງທ່ານເຈົ້າແຂວງ ຫຼວງພະບາງ ວ່າດ້ວຍການແຕ່ງຕັ້ງ, ຍົກຍ້າຍສັບຊ້ອນບ່ອນປະຈຳການໃນຂະແໜງການເງິນແຂວງ ໂດຍຍົກຍ້າຍເອົາ ທ່ານ ສີສຸພັນ ສີສະຫວັດ ກຳມະການພັກແຂວງ ຫົວໜ້າພະແນກການເງິນແຂວງ ໄປປະຈຳການຢູ່ພະແນກວິທະຍາສາດ ແລະ ເຕັກໂນໂລຊີແຂວງ, ປະກາດແຕ່ງຕັ້ງເອົາ ທ່ານ ຄິນຄຳ ເລັ່ງສະຫວັດ ຮອງຫົວໜ້າພະແນກການເງິນແຂວງ ຂຶ້ນເປັນຮັກສາການເລຂາຄະນະພັກຮາກຖານ, ຫົວໜ້າພະແນກການເງິນແຂວງ ແລະ ປະກາດແຕ່ງຕັ້ງ ທ່ານ ນາງ ບົວຈີນ ຈັນທະພອນ ແລະ ທ່ານ ພູຄຳ ແສງດາໄລ ເປັນຮອງຫົວໜ້າພະແນກການເງິນແຂວງ.

ຕອນທ້າຍ ທ່ານ ຄຳຂັນ ຈັນທະວີສຸກ ເຈົ້າແຂວງຫຼວງພະບາງ ໄດ້ມີຄຳເຫັນໂອ້ລົມ ເຊິ່ງທ່ານໄດ້ເນັ້ນໃຫ້ພະນັກງານທີ່ຖືກແຕ່ງຕັ້ງ ແລະ ຍົກຍ້າຍ ຕ້ອງໄດ້ສືບຕໍ່ເພີ່ມທະວີ ຄວາມຮັບຜິດຊອບຕໍ່ໜ້າທີ່ການເມືອງໃຫ້ສູງຂຶ້ນຕື່ມໃນການຊີ້ນຳໆພາ, ເປັນເຈົ້າການຝຶກຝົນຫຼໍ່ຫຼອມຕົນເອງທາງດ້ານການເມືອງ – ແນວຄິດ ຄຸນສົມບັດສິນທຳປະຕິວັດໃຫ້ມີ ຄວາມໜັກແໜ້ນເຂັ້ມແຂງ, ເອົາໃຈໃສ່ປັບປຸງແບບແຜນນຳພາແບບແຜນວິທີເຮັດວຽກໃຫ້ສອດຄ່ອງ ແລະ ແທດເໝາະກັບສະພາບຕົວຈິງ, ເພີ່ມທະວີຄວາມສາມັກຄີເປັນເອກະພາບ ເຮັດວຽກເປັນໝູ່ຄະນະ ລວມສູນປະຊາທິປະໄຕ ມີການແບ່ງງານຄືນໃໝ່ໃຫ້ບຸກຄົນຮັບຜິດຊອບຢ່າງລະອຽດ.

ສືບຕໍ່ເປັນເຈົ້າການປະຕິບັດລະບຽບ – ກົດໝາຍຢ່າງເຂັ້ມງວດ, ເອົາໃຈໃສ່ແກ້ໄຂປາກົດການຫຍໍ້ທໍ້ຕ່າງໆໃນຂົງເຂດທີ່ຕົນເອງຮັບຜິດຊອບໃຫ້ຫຼຸດລົງເທື່ອລະກ້າວ, ສືບຕໍ່ສູ້ຊົນຮັບປະກັນເຮັດໃຫ້ການເກັບລາຍຮັບຂອງແຂວງໄດ້ຕາມແຜນ, ຄຸ້ມຄອງລາຍຈ່າຍ ແລະ ອັດຊ່ອງວ່າງຂອງການຮົ່ວໄຫຼ ໂດຍຖືເອົາຫຼັກການປະຢັດ. ສໍາລັບການປັບປຸງສັບຊ້ອນຈັດວາງຕໍາແໜ່ງພະນັກງານຫຼັກແຫຼ່ງ ໃນຂະແໜງການເງິນແຂວງຄັ້ງນີ້ຖືວ່າເປັນເລື່ອງປົກກະຕິ ເພື່ອແນໃສ່ເຮັດໃຫ້ການຮັບໃຊ້ໜ້າທີ່ການເມືອງ ສອດຄ່ອງຕາມແນວທາງນະໂຍບາຍຂອງພັກ – ລັດ ແລະ ເປັນການກະກຽມບຸກຄະລາກອນໃຫ້ແກ່ການດຳເນີນກອງປະຊຸມໃຫຍ່ຂອງແຂວງ ເພື່ອຮັບປະກັນເຮັດໃຫ້ແຂວງຫຼວງພະບາງ ມີການພັດທະນາດີຂຶ້ນກວ່າເກົ່າ.