ນໍ້າຖ້ວມ 6 ແຂວງພາກໃຕ້, ກະທົບ 54.000 ກວ່າຄອບຄົວ, ຍັງຕ້ອງການອາຫານ-ນໍ້າດື່ມ

517

ສະພາບນໍ້າຖ້ວມຢູ່ບັນດາແຂວງ ພາກກາງ ແລະ ພາກໃຕ້ ຂອງສປປ ລາວ ປີນີ້, ຖືວ່າໜັກໜ່ວງກວ່າປີຜ່ານມາ ເນື່ອງຈາກໄດ້ຮັບອິດພົນຈາກພາຍຸໝຸນເຂດຮ້ອນພັດຜ່ານ 2 ຮອບ ໃນໄລຍະເວລາບໍ່ເຖິງອາທິດ ສົ່ງຜົນໃຫ້ປະລິມານນໍ້າໃນບັນດາແມ່ນໍ້າສາຂາ ແລະ ແມ່ນໍ້າຂອງເພີ່ມຂື້ນຢ່າງໄວວາ ໄຫຼເຂົ້າຖ້ວມບ້ານເຮືອນ, ໄຮ່ນາຮົ້ວສວນ ແລະ ສຳນັກງານອົງການຈັດຕັ້ງຕ່າງໆໄດ້ຮັບຄວາມເສຍຫາຍຢ່າງໜັກໜ່ວງ, ປັດຈຸບັນຍັງເຄື່ອງອຸປະໂພກ-ບໍລິໂພກຢ່າງຮີບດ່ວນ.

ອີງຕາມການລາຍງານຂ່າວຂອງກົມສັງຄົມສົງເຄາະກະຊວງແຮງງານ ແລະ ສະຫວັດດີການສັງຄົມ ໄດ້ລາຍງານຕໍ່ລັດຖະບານໃນວັນທີ 5 ກັນຍາ 2019 ວ່າ:ເຫດນ້ຳຖ້ວມໜັກຢູ່ 6 ແຂວງ ພາກກາງ
ຫາ ພາກໃຕ້ນັ້ນ ໄດ້ເຮັດໃຫ້ມີການ ເສຍຊີວິດ 2 ຄົນ, ສູນຫາຍອີກ 2 ຄົນ ແລ 54.207 ຄອບຄົວ ໄດ້ຮັບຜົນກະທົບໜັກຈາກເຫດການດັ່ງກ່າວ.

ຂ່າວຍັງລາຍງານໃຫ້ຮູ້ວ່າ:  ອິດທິພົນຂອງລົມພາຍຸໂພດູ ແລະ ລົມພາຍຸດີເປຼຊັນ ທີ່ພັດຜ່ານເຂົ້າມາ ສປປ ລາວ ໃນຊ່ວງທ້າຍເດືອນສິງຫາ ຫາ ຕົ້ນເດືອນ ກັນຍາ 2019 ເຮັດໃຫ້ມີຝົນຕົກໜັກ ແລະ ເກີດນໍ້າຖ້ວມຢູ່ ແຂວງຄໍາມ່ວນ, ສະຫວັນນະເຂດ, ອັດຕະປື, ສາລະວັນ, ຈໍາປາສັກ ແລະ ແຂວງເຊກອງ ເຊິ່ງສົ່ງຜົນກະທົບໂດຍກົງຕໍ່ປະຊາຊົນໃນ 37 ເມືອງ, 788 ບ້ານ.

ເຫດໄພພິບັດດັ່ງກ່າວໄດ້ເຮັດໃຫ້ມິຜູ້ເສຍຊີວິດ 2 ຄົນຢູ່ ສະຫວັນນະເຂດ ແລະ ຈໍາປາສັກ, ສູນຫາຍອີກ 2 ຄົນ ຢູ່ແຂວງຈໍາປາສັກ. ປະຊາຊົນຖືກຍົກຍ້າຍ 3.400 ກວ່າຄອບຄົວ, ສ້າງຄວາມເສຍຫາຍຕໍ່ບ້ານເຮືອນຂອງປະຊາຊົນ, ເນື້ອທີ່ນາ 130.569 ກວ່າເຮັກຕາ, ຊົນລະປະທານ 26 ແຫ່ງ, ຂົວ 6 ແຫ່ງ, ໂຮງຮຽນ 45 ແຫ່ງ, ສຸກສາລາ 2 ແຫ່ງ ແລະ ອື່ນໆ.

ປັດຈຸບັນ ຄວາມຕ້ອງການອັນຮີບດ່ວນ ແມ່ນ ເຄື່ອງອຸປະໂພກ-ບໍລິໂພກ ເປັນຕົ້ນອາຫານ, ນໍ້າດື່ມ, ເຄື່ອງໃຊ້ຄົວເຮືອນ, ເຄື່ອງນອນ, ເຮືອພ້ອມຄົນຂັບ ແລະ ງົບປະມານຮັບໃຊ້ອື່ນໆ