ສປປ ລາວ ແລະ ສ ເກົາຫລີ ລົງນາມເອກະສານຮ່ວມມື 4 ສະບັບ

440

ວັນທີ 5 ກັນຍາ 2019 ນີ້, ທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ ແລະ ທ່ານ ມູນ ແຈອິນ

ປະທານາທິບໍດີ ແຫ່ງ ສ ເກົາຫລີ ໄດ້ເຂົ້າຮ່ວມເປັນສັກຂີພິຍານ ໃນພິທີລົງນາມເອກະສານຮ່ວມມື ລະຫວ່າງ ສປປ ລາວ ແລະ ສ ເກົາຫລີ ຈຳນວນ 4 ສະບັບ ໃນຂົງ ເຂດການພັດທະນາເສດຖະກິດ, ກະສິກຳ ອຸດສາຫະກຳ ແລະ ການຄ້າ, ຂໍ້ມູນຂ່າວສານ, ການສື່ສານ ແລະ ເຕັກໂນໂລຊີ(ICT).

ອກະສານທີ່ສອງຝ່າຍຮ່ວມລົງນາມໃນຄັ້ງນີ້, ປະກອບມີ ສັນຍາຂອບການຮ່ວມມືລະຫວ່າງ ສປປ ລາວ ແລະ ສ ເກົາຫລີ ວ່າດ້ວຍທຶນຮ່ວມມື ເພື່ອການພັດທະນາເສດຖະກິດຂອງ ສ ເກົາຫລີ ໄລຍະປີ 2020-2023 ໂດຍການລົງນາມລະຫວ່າງທ່ານ ສະເຫລີມໄຊ ກົມມະສິດ ລັດຖະມົນຕີກະ ຊວງການຕ່າງປະເທດ ແຫ່ງ ສປປ ລາວ ກັບທ່ານນາງ ກັງ ກຽງ ຮວາ ລັດຖະມົນຕີກະຊວງການຕ່າງປະເທດ ສ ເກົາຫລີ; ບົດບັນທຶກຄວາມເຂົ້າໃຈ ວ່າດ້ວຍການຮ່ວມມືດ້ານກະສິກຳ ລົງນາມໂດຍ ທ່ານ ພວງປະຣີສັກ ປຣະວົງວຽງຄຳ ຮອງລັດຖະມົນຕີກະຊວງກະສິກຳ ແລະ ປ່າໄມ້ ແຫ່ງ ສປປ ລາວ ກັບທ່ານ ຊິນ ຊອງ ຊຸນ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສ ເກົາຫລີ ປະຈຳ ລາວ.

ສ່ວນບົດບັນທຶກຄວາມເຂົ້າໃຈ ວ່າດ້ວຍການຮ່ວມມືດ້ານ ການປະກອບການທຸລະກິດໃໝ່ ແລະ ນະວັດຕະກຳ ລົງນາມໂດຍທ່ານ ສົມຈິດ ອິນທະມິດ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ແຫ່ງ ສປປ ລາວ ກັບທ່ານ ຊິນ ຊອງ ຊຸນ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສ ເກົາຫລີ ປະຈຳລາວ ແລະ ບົດບັນທຶກຄວາມເຂົ້າໃຈວ່າດ້ວຍການຮ່ວມມືດ້ານຂໍ້ມູນຂ່າວສານ, ການສື່ສານ ແລະ ເຕັກໂນໂລຊີ ລົງນາມໂດຍ ທ່ານ ບຸນສະເຫລີມໄຊ ເຄນນາວົງ ຮອງລັດຖະມົນຕີກະຊວງໄປສະນີ ໂທລະຄົມມະນາຄົມ ແລະ ການສື່ສານ ກັບທ່ານ ຊິນ ຊອງ ຊຸນ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສ ເກົາຫລີ ປະຈຳລາວ.

ຂໍ້ມູນ ຂປລ