ຊ່ວງເຮືອນໍ້າເຫືອງ ເມືອງແກ່ນທ້າວ ຈະຈັດຂຶ້ນໃນວັນທີ 13-14 ກັນຍາ 2019 ນີ້

385

ຕາມແຈ້ງຂ່າວບຸນຂອງຫ້ອງວ່າການເມືອງແກ່ນທ້າວ ສະບັບເລກທີ 473 ລົງວັນທີ 30 ສິງຫາ 2019 ໃຫ້ຮູ້ວ່າ: ເມືອງແກ່ນທ້າວ ຈະຈັດການແຂ່ງຂັນເຮືອຊ່ວງຂຶ້ນ ໃນວັນທີ 13-14 ກັນຍາ ນີ້, ຢູ່ທີ່ນໍ້າເຫືອງຈຸດທ່າວັດສີພູມ ໂດຍມອບໃຫ້ບ້ານທ້າວແກ່ນ ເປັນເຈົ້າພາບ ເຊິ່ງເປັນບຸນຫໍ່ເຂົ້າສະຫຼາກ ທີ່ຊາວເມືອງແກ່ນທ້າວ ໄດ້ສືບທອດຈັດຕັ້ງປະຕິບັດກັນມາທຸກໆປີ. ກໍານົດການແຂ່ງຂັນ 2 ວັນ ຄື: ວັນທີ 13 ກັນຍາ 2019 ແມ່ນການແຂ່ງຂັນເຮືອຊ່ວງຍິງ ແລະ ວັນທີ 14 ກັນຍາ 2019 ແມ່ນການແຂ່ງຂັນເຮືອຊ່ວງຊາຍ.

ສະເພາະປີນີ້ ປະທານຄະນະຈັດງານບຸນ ແລະ ຄະນະກໍາມະການແຂ່ງຂັນ ຍັງໃຫ້ຮູ້ຕື່ມວ່າ: ການແຂ່ງຂັນເຮືອຊ່ວງນໍ້າເຫືອງປີນີ້ ຈະເປີດກວ້າງ ແລະ ໃຫ້ທຸກພາກສ່ວນເຂົ້າຮ່ວມ ໂດຍສະເພາະສໍານັກງານ, ອົງການ, ກຸ່ມບ້ານ ແລະ ບ້ານໃນທົ່ວເມືອງ ທີ່ມີເງື່ອນໄຂນໍາເຮືອຂອງຕົນ ເຂົ້າຮ່ວມຊິງລາງວັນໃນງານຄັ້ງນີ້ ໂດຍບໍ່ກໍານົດປະເພດຂອງເຮືອ ແລະ ສີພາຍ ແຕ່ບໍ່ໃຫ້ເກີນ 35 ສີພາຍ.
ຂໍເຊີນຊວນທຸກໆທ່ານ ເຂົ້າຮ່ວມຮັບຊົມ ແລະ ເຊຍເຮືອທີ່ຕົນມັກ ໃຫ້ໄດ້ໄຊຊະນະ ແລະ ຢູ່ໃນງານຍັງມີຫຼາຍກິດຈະກໍາ ທີ່ຈະສ້າງຄວາມເບີກບານມ່ວນຊື່ນຕະຫຼອດງານ.