ມສ ແກ່ນທ້າວ ໄຂສົກຮຽນໃໝ່ ປະຈໍາສົກຮຽນ 2019-2020

389

ພິທີໄຂສົກຮຽນໃໝ່ ປະຈໍາສົກຮຽນ 2019-2020 ຂອງໂຮງຮຽນມັດທະຍົມສົມບູນແກ່ນທ້າວ ເມືອງແກ່ນທ້າວ ແຂວງໄຊຍະບູລີ ໄດ້ຈັດຂຶ້ນໃນວັນທີ 4 ກັນຍາ 2019 ນີ້, ຢູ່ທີ່ໂຮງຮຽນດັ່ງກ່າວ ໂດຍການເປັນກຽດເຂົ້າຮ່ວມຂອງທ່ານ ອໍາຄາ ລັດສະໝີ ວ່າການເຈົ້າເມືອງແກ່ນທ້າວ, ທ່ານ ອ່ອນຕາ ພົມມະຈິດ ຮອງຫົວໜ້າພະແນກສຶກສາທິການ ແລະ ກິລາແຂວງໄຊຍະບູລີ, ທ່ານ ນາງ ຈັນທະສອນ ແສນພັນສິລິ ຄະປະຈໍາພັກເມືອງ, ຜູ້ຊີ້ນໍາຂົງເຂດວັດທະນະທໍາ-ສັງຄົມ, ສະມາຊິກສະພາປະຊາຊົນແຂວງ, ມີຫົວໜ້າ, ຮອງຫົວໜ້າຫ້ອງການທີ່ກ່ຽວຂ້ອງ, ຜູ້ອໍານວຍການໂຮງຮຽນ, ຄູ, ອາຈານໂຮງຮຽນມສ ແກ່ນທ້າວ, ຜູ້ອໍານວຍການໂຮງຮຽນຢູ່ພາຍໃນເມືອງ, ພະນັກງານຫ້ອງການສຶກສາທິການ ແລະ ກິລາເມືອງ, ນາຍບ້ານເທດສະບານ, ສະມາຄົມພໍ່ແມ່ນັກຮຽນ ແລະ ນ້ອງນັກຮຽນພາຍໃນໂຮງຮຽນເຂົ້າຮ່ວມ 800 ກວ່າຄົນ.

ໃນພິທີໄດ້ເລີ່ມດ້ວຍການສະແດງສິລະປະ-ວັນນະຄະດີ ຂອງນ້ອງນັກຮຽນຢ່າງເບີກບານມ່ວນຊື່ນ. ຈາກນັ້ນ, ທ່ານ ອາຈານ ສຸລິຍາສັກ ລັດຖະຫວັນ ຜູ້ອໍານວຍການໂຮງຮຽນມັດທະຍົມສົມບູນແກ່ນທ້າວ ໄດ້ລາຍງານການກະກຽມໄຂສົກຮຽນໃໝ່ ປະຈໍາສົກຮຽນ 2019-2020 ໃຫ້ຜູ້ເຂົ້າຮ່ວມໄດ້ຮັບຮູ້. ຈາກນັ້ນ ທ່ານ ອໍາຄາ ລັດສະໝີ ວ່າການເຈົ້າເມືອງແກ່ນທ້າວ ໄດ້ກ່າວໄຂສົກຮຽນໃໝ່ຢ່າງເປັນທາງການ ແລະ ຮຽກຮ້ອງໃຫ້ການຈັດຕັ້ງພັກ-ລັດ, ອົງການຈັດຕັ້ງມະຫາຊົນ, ບັນດາຂະແໜງການ, ຄູສອນ, ພໍ່ແມ່ຜູ້ປົກຄອງເດັກ ແລະ ທຸກພາກສ່ວນໃນສັງຄົມທົ່ວເມືອງ ສືບຕໍ່ເອົາໃຈໃສ່ເພີ່ມທະວີການສຶກສາອົບຮົມການເມືອງແນວຄິດໃຫ້ພະນັກງານຄູສອນ ແລະ ນ້ອງນັກຮຽນໃຫ້ເລິກເຊິ່ງ, ທົ່ວເຖິງ ແລະ ຕໍ່ເນື່ອງ, ເອົາໃຈໃສ່ຄົ້ນຄວ້າກໍາແໜ້ນ 15 ຄາດໝາຍທີ່ກວມເອົາເປົ້າໝາຍທີ 4 ຂອງການພັດທະນາແບບຍືນຍົງ (SDG4) ທີ່ສະພາແຫ່ງຊາດ ແລະ ສະພາປະຊາຊົນແຂວງຮັບຮອງຮອດປີ 2020 ສໍາລັບ ມສ ແກ່ນທ້າວ ຕ້ອງໄດ້ເພີ່ມຄວາມເອົາໃຈໃສ່ 1 ຄາດໝາຍທີ່ຍັງບໍ່ທັນບັນລຸເປັນຕົ້ນແມ່ນ ຄາດໝາຍທີ 8 ອັດຕາເຂົ້າຮຽນລວມຊັ້ນມັດທະຍົມຕອນຕົ້ນ ທີ່ປະຕິບັດໄດ້ 87,5 ຍັງຕໍ່າ ແລະ ບໍ່ທັນບັນລຸ 1.5, ເພີ່ມຄວາມເອົາໃຈໃສ່ເປັນພິເສດໃນການຈັດຕັ້ງປະຕິບັດຄໍາແນະນໍາຂອງທ່ານເຈົ້າແຂວງໄຊຍະບູລີ ສະບັບເລກທີ 018/ຈຂ.ຊຍ, ລົງວັນທີ 7 ກຸມພາ 2018 ກ່ຽວກັບການເພີ່ມທະວີການແກ້ໄຂການປະລະການຮຽນຂອງນັກຮຽນ ແລະ ຊຸກຍູ້ການຈັດຕັ້ງປະຕິບັດຂໍ້ແຂງຂັນຂອງຂະແໜງການສຶກສາ ແລະ ກິລາ, ປະຕິບັດຄໍາແນະນໍາຂອງພະແນກສຶກສາທິການ ແລະ ກິລາແຂວງໄຊຍະບູລີ ສະບັບເລກທີ 7915/ສກຂ.ຊຍ, ລົງວັນທີ 12 ສິງຫາ 2019 ວ່າດ້ວຍການຟື້ນຟູການຜະລິດກະສິກໍາໃນສະຖາບັນການສຶກສາໃຫ້ເປັນຮູບປະທໍາ, ເພີ່ມທະວີຄວາມເອົາໃຈໃສ່ເປັນພິເສດ ໃນການຈັດຕັ້ງປະຕິບັດການແຂ່ງຂັນສອນດີ-ຮຽນເກັ່ງ ໃນຖັນແຖວຄູສອນໃຫ້ເປັນຂະບວນຟົດຟື້ນ, ສົມທົບກັບຄະນະພັກຮາກຖານກຸ່ມບ້ານ, ບໍລິເວນບ້ານ, ອົງການປົກຄອງບ້ານ ແລະ ຄະນະພັດທະນາການສຶກສາຂັ້ນບ້ານ ກະກຽມອາຄານສະຖານທີ່ ແລະ ອຸປະກອນການຮຽນ-ການສອນ, ເອົາໃຈໃສ່ວຽກງານຄຸ້ມຄອງງົບປະມານການເງິນ ໃຫ້ຖືກຕາມລະບຽບຫຼັກການການເງິນຕາມທິດປະຢັດມັດທະຍັດ ເພື່ອຮອງຮັບໃນການກວດສອບພາຍໃນ ແລະ ພາຍນອກ. ທ່ານຍັງໄດ້ຮຽກຮ້ອງມາຍັງຜູ້ບໍລິຫານການສຶກສາ ແລະ ກິລາທຸກຂັ້ນ, ຄູສອນທຸກຄົນ ຈົ່ງເພີ່ມທະວີຄວາມຮັບຜິດຊອບ ຕໍ່ໜ້າທີ່ການເມືອງອັນສູງສົ່ງຂອງຕົນໃຫ້ສູງຂຶ້ນ, ເຄົາລົບ, ນັບຖື ແລະ ປະຕິບັດລະບຽບກົດໝາຍໃຫ້ເຂັ້ມງວດ ແລະ ເພີ່ມທະວີຄວາມສາມັກຄີພາຍໃນໃຫ້ໜັກແໜ້ນ, ຕ້ານ ແລະ ສະກັດກັ້ນປະກົດການຫຍໍ້ທໍ້ໃນຂະແໜງການສຶກສາ ແລະ ກິລາ, ຜ່ານຜ່າຄວາມຫຍຸ້ງຍາກ ເພື່ອສໍາເລັດໜ້າທີ່ທີ່ໄດ້ຮັບມອບໝາຍ, ນ້ອງນັກຮຽນຈົ່ງພັດທະນາຕົນເອງ ແລະ ຕັ້ງໃຈຄົ້ນຄວ້າຮໍ່າຮຽນດ້ວຍຕົນເອງ ໃຫ້ຫຼາຍຂຶ້ນ, ຮຽນໃຫ້ມີຄວາມຮູ້, ຄວາມສາມາດ ແລະ ຮຽນໃຫ້ມີວິຊາຊີບໃດໜຶ່ງທີ່ໝັ້ນຄົງ,ຝຶກຝົນຫຼໍ່ຫຼອມຕົນເອງ ໃຫ້ກາຍເປັນນັກຮຽນດີ, ນັກຮຽນເກັ່ງ ແລະ ເປັນພົນລະເມືອງທີ່ດີຂອງຊາດ, ຄອບຄົວ, ພໍ່ແມ່ຜູ້ປົກຄອງນັກຮຽນ ຈົ່ງສືບຕໍ່ສຶກສາອົບຮົມລູກຫຼານຂອງຕົນໃຫ້ເປັນຄົນດີຂອງສັງຄົມ, ຮູ້ຄຸນຄ່າຂອງການຮຽນ, ນໍາພາລູກຫຼານຂອງຕົນໃນເກນອາຍຸເຂົ້າຮຽນໄປໂຮງຮຽນ ແລະ ຮຽນຕໍ່ໃຫ້ສູງຂຶ້ນຕາມຄວາມອາດສາມາດຂອງເຂົາເຈົ້າ, ບັນຫາສໍາຄັນແມ່ນຮຽນຈົບແລ້ວໃຫ້ມີວິຊາຊີບ, ມີວຽກເຮັດງານທໍາ, ມີລາຍຮັບໃຫ້ແກ່ຕົນເອງ ແລະ ຄອບຄົວ, ອົງການຈັດຕັ້ງທຸກພາກສ່ວນທັງພາກລັດ ແລະ ເອກະຊົນ ຈົ່ງສືບຕໍ່ໃຫ້ການສະໜັບສະໜູນຊ່ວຍເຫຼືອການສຶກສາ ແລະ ກິລາ ຢູ່ແຕ່ລະທ້ອງຖິ່ນ ຖືເອົາການສຶກສາ ແລະ ກິລາ ເປັນໜ້າທີ່ ແລະ ຄວາມຮັບຜິດຊອບຂອງໝົດທຸກຄົນໃນທົ່ວສັງຄົມ.