ເສຍຊີວິດ 2, ສູນຫາຍ 2 ແລະ 54.000 ກ່ວາຄອບຄົວ ຖືກຜົນກະທົບຈາກໄພນໍ້າຖ້ວມ

350

ກົມສັງຄົມສົງເຄາະ ກະຊວງແຮງງານ ແລະ ສະຫວັດດີການສັງຄົມ ໄດ້ລາຍງານຕໍ່ລັດຖະບານ ໃນຕອນເຊົ້າຂອງວັັນທີ 05/09/2019 ນີ້ວ່າ: ຜົນກະທົບຈາກໄພນ້ຳຖ້ວມໜັກຢູ່ 6 ແຂວງ ພາກກາງ ຫາ ພາກໃຕ້ ນັ້ນໄດ້ເຮັດໃຫ້ມີການ ເສຍຊີວິດ 2 ຄົນ, ສູນຫາຍ 2 ຄົນ ແລະ 54.207 ຄອບຄົວ ໄດ້ຮັບຜົນກະທົບໜັກ ຈາກເຫດການນ້ຳຖ້ວມໃນຄັ້ງນີ້.

ກົມດັ່ງກ່າວໄດ້ລາຍງານຕື່ມອີກວ່າ: ອົດທິພົນ ຂອງລົມພະຍຸໝຸນເຂດຮ້ອນໂພດູ ແລະ ລົມພາຍຸ ດີເປຣຊັນ ທີ່ພັດຜ່ານເຂົ້າມາ ສປປ ລາວ ໃນທ້າຍ ເດືອນສິງຫາ ຫາ ຕົ້ນເດືອນ ກັນຍາ 2019 ເຮັດໃຫ້ ມີຝົນຕົກໜັກ ແລະ ເກີດນໍ້າຖ້ວມຢູ່ ແຂວງຄໍາມ່ວນ, ສະຫວັນນະເຂດ, ຈໍາປາສັກ, ສາລະວັນ, ອັດຕະປື ແລະ ແຂວງເຊກອງ, ເຊິ່ງສົ່ງຜົນກະທົບໂດຍກົງ ຕໍ່ປະຊາຊົນ ໃນ 37 ເມືອງ, 788 ບ້ານ. ປະຊາ ຊົນຍົກຍ້າຍ 3.400 ກວ່າຄອບຄົວ, ສ້າງຄວາມ ເສຍຫາຍຕໍ່ບ້ານເຮືອນຂອງປະຊາຊົນ, ເນື້ອທີ່ນາ 130.569 ກວ່າເຮັກຕາ, ຊົນລະປະທານ 26 ແຫ່ງ, ຂົວ 6 ແຫ່ງ, ໂຮງຮຽນ 45 ແຫ່ງ, ສຸກສາລາ 2 ແຫ່ງ.

ປັດຈຸບັນ ຄວາມຕ້ອງການອັນຮີບດ່ວນ ແມ່ນ ເຄື່ອງອຸປະໂພກ-ບໍລິໂພກ ເປັນຕົ້ນ ອາຫານ, ນໍ້າດື່ມ, ເຄື່ອງໃຊ້ຄົວເຮືອນ, ເຄື່ອງນອນ, ເຮືອພ້ອມຄົນຂັບ ແລະ ງົບປະມານຮັບໃຊ້ອື່ນໆ.

ຂອບໃຈຂໍ້ມູນຈາກວຽງຈັນທາຍ ຂ່າວ: ສຸກນີລັນດອນ ພາບ: ແຂວງສາລະວັນ