ລາວ – ຈີນ ຍົກລະດັບຄວາມຮູ້ດ້ານພະລັງງານ ແລະ ບໍ່ແຮ່

312

ເພື່ອເປັນການຍົກລະດັບຄວາມຮູ້ໃນວຽກງານດ້ານພະລັງງານ ແລະ ບໍ່ແຮ່ ເປັນໄປຕາມທີ່ລັດຖະບານ ລາວ – ຈີນ ວາງໄວ້ໃນຂອບການຮ່ວມມືດ້ານການພັດທະນາຊັບພະຍາກອນມະນຸດ ໃນວັນທີ 3 ກັນຍາ 2019 ທີ່ສູນຝຶກອົບຮົມແນວລາວສ້າງຊາດໄດ້ຈັດພິທີເປີດຊຸດຝຶກອົບຮົມເຕັກນິກການປຸງແຕ່ງແຮ່ທາດລາວ ປະຈໍາປີ 2019 ໂດຍເປັນກຽດເຂົ້າຮ່ວມຂອງ ທ່ານ ແຄນທອງ     ສີສຸວົງ ຮອງປະທານຄະນະກຳມະການຮ່ວມມື ລາວ – ຈີນ ກະຊວງແຜນການ ແລະ ການລົງທຶນ, ທ່ານ ເລ ເຮົ້າ ຮອງຫົວໜ້າສະຖາບັນຝຶກອົບຮົມພະນັກງານການຄ້າສາກົນ, ກະຊວງການຄ້າຈີນ, ຜູ້ຕາງໜ້າຈາກກອງໃຫຍ່ 293 ແຂວງກວາງຕຸງ ສປ ຈີນ ພ້ອມດ້ວຍວິທະຍາກອນ ແລະ ສໍາມະນາກອນຈາກສູນກາງ ແລະ ທ້ອງຖິ່ນເຂົ້າຮ່ວມ.

ທ່ານ ແຄນທອງ ສີສຸວົງ ຮອງປະທານຄະນະກຳມະການຮ່ວມມື ລາວ – ຈີນ ກະຊວງແຜນການ ແລະ ການລົງທຶນ ກ່າວວ່າ: ພາຍໃຕ້ການຊີ້ນໍາຂອງສອງພັກ, ການຮ່ວມມືດ້ານການພັດທະນາຊັບພະຍາກອນມະນຸດເປັນສ່ວນໜຶ່ງທີ່ສໍາຄັນຂອງການຮ່ວມມືສອງຝ່າຍ ໂດຍການປະສານງານກັນຢ່າງໃກ້ຊິດ ລະຫວ່າງ ຄະນະກໍາມະການຮ່ວມມື ລາວ – ຈີນ ແລະ ກະຊວງການຄ້າ ສປ ຈີນ, ສອງຝ່າຍໄດ້ຮ່ວມມືກັນດ້ານການພັດທະນາຊັບພະຍາກອນມະນຸດ ໂດຍຜ່ານຊຸດສໍາມະນາ ແລະ ຝຶກອົບຮົມແບບສອງຝ່າຍ ແລະ ຫຼາຍຝ່າຍ ຫົວຂໍ້ຕ່າງໆສໍາລັບຊຸດສໍາມະນານີ້ແມ່ນເປັນຫົວຂໍ້ທີ່ສໍາຄັນ ດັ່ງທີ່ຮູ້ນຳກັນດີວ່າປັດຈຸບັນ ສປ ຈີນ ໄດ້ກາຍເປັນຜູ້ລົງທຶນຕ່າງປະເທດລາຍໃຫຍ່ອັນດັບໜຶ່ງຂອງລາວ ເຊິ່ງໃນນັ້ນການລົງທຶນດ້ານບໍ່ແຮ່ກວມເອົາອັດຕາສ່ວນໃຫຍ່ຂອງການລົງທຶນທັງໝົດ ເຊິ່ງມັນຮຽກຮ້ອງໃຫ້ພະນັກງານວິຊາການທີ່ກ່ຽວຂ້ອງຂອງລາວຈະຕ້ອງສ້າງ ຄວາມເຂົ້າໃຈ ແລະ ມີຄວາມຮູ້ພື້ນຖານກ່ຽວກັບເຕັກນິກການປຸງແຕ່ງບໍ່ແຮ່.

ຫ້ອງການຄະນະກໍາມະການຮ່ວມມື ລາວ – ຈີນ ຈຶ່ງໄດ້ສະເໜີຈັດຂຶ້ນຢ່າງຕໍ່ເນື່ອງເປັນຄັ້ງທີ 5, ເປົ້າໝາຍກໍເພື່ອໃຫ້ວິຊາການລາວໄດ້ຮຽນຮູ້ເຕັກນິກໃໝ່, ວິທະຍາສາດໃໝ່ ແລະ ນະວັດຕະກໍາໃໝ່ດ້ານການປຸງແຕ່ງຊັບພະຍາກອນແຮ່ທາດຈາກ ສປ ຈີນ ພ້ອມທັງຖືເອົາເວທີນີ້ໃນການປຶກສາຫາລືແລກປ່ຽນຄໍາເຫັນລະຫວ່າງສໍາມະນາກອນລາວກັບຊ່ຽວຊານຄູ – ອາຈານຈາກ ສປ ຈີນ ທີ່ມີຄວາມຊໍານານງານ ແລະ ປະສົບການຢ່າງຫຼວງຫຼາຍ.

ຊຸດຝຶກອົບຮົມດັ່ງກ່າວແມ່ນຈະເລີ່ມແຕ່ວັນທີ 3 – 23 ກັນຍາ 2019 ສຳລັບຫົວຂໍ້ທີ່ຈະລົງເລິກແມ່ນ 1 ວິທີ ແລະ ເຕັກນິກພື້ນຖານຂອງການສຳຫຼວດບໍ່ແຮ່ ແລະ ທາດແຂງ; 2. ຊອກຄົ້ນ, ສຳຫຼວດແຮ່ທາດ ແລະ ປະເມີນປະລິມານສະສົມຊັບພະຍາກອນແຮ່ທາດ; 3. ການສຳຫຼວດທໍລະນີຟີຊິກສາດ; 4. ການແນະນຳກ່ຽວກັບແຮ່ທາດທີ່ຫາຍາກສາມປະເພດ; 5. ບົດບາດໃນເສດຖະກິດແຫ່ງຊາດຂອງການພັດທະນາບໍ່ແຮ່ອະໂລຫະ ແລະ 6. ທັກສະການຫຼອມເງິນ ແລະ ຄຳ ເປັນຕົ້ນ.