ເຕືອນ! ເສບຂ່າວຢ່າງມີສະຕິ ເຂື່ອນເຊເສັດ ແລະ ເຊລະບໍາ ບໍ່ໄດ້ແຕກຢ່າງທີ່ຂ່າວລື

777

ຈາກກໍລະນີ, ພະຍຸດີເປຼເຊິນ ໄດ້ພັດຜ່ານເຂດພາກກາງຂອງລາວເຮັດໃຫ້ເກີດສະພາບນໍ້າຖ້ວມໜັກຢູ່ແຂວງສະຫວັນນະເຂດ, ສາລະວັນ ແລະ ຈໍາປາສັກ ນັບແຕ່ວັນທີ 2 ກັນຍາ 2019 ເປັນຕົ້ນມາ, ຈຶ່ງເຮັດໃຫ້ປະຊາຊົນຖຶກຜົນກະທົບຢ່າງໜັກ. ຂະນະດຽວກັນ, ສື່ສັງຄົມອອນລາຍເຫັນພາບແບບນັ້ນກໍ່ແຕກຕື່ນ ແລະ ຄິດວ່າເຫດການນໍ້າຖ້ວມແມ່ນເກີດມາຈາກເຂື່ອນແຕກ ໂດຍສະເພາະແມ່ນເຂື່ອນໄຟຟ້າເຊເສັດ1, ເຊເສັດ 2 , ເຊເສັດ 3 ແລະ ເຂື່ອນໄຟຟ້າເຊລະບໍາ.

 ຫຼ້າສຸດ, ໃນວັນທີ 4 ກັນຍາ 2019 ຮອງຜູ້ອໍານວຍການເຂື່ອນໄຟຟ້າເຊລະບໍາ ໄດ້ອອກມາຊີ້ແຈງເຖິງສະພາບດັ່ງກ່າວ ເນື່ອງຈາກມີບາງກຸ່ມຄົນທີ່ໄດ້ຂຽນຂ່າວຂອງສື່ອອນລາຍຈໍານວນໜຶ່ງ ໂດຍສະ ເໜີຂ່າວບໍ່ແມ່ນຄວາມຈິງ ອັນເຮັດໃຫ້ປະຊາຊົນຈໍານວນຫຼາຍເຂົ້າໃຈໄປໃນທາງທີ່ບໍ່ຖືກຕ້ອງ ແລະ ເປັນການສ້າງຄວາມເຊື່ອມເສຍໃຫ້ແກ່ເຂື່ອນດັ່ງກ່າວ. ແຕ່ໃນຄວາມເປັນຈິງແລ້ວເຂື່ອນໄຟຟ້າ ທັງ 3 ເຂື່ອນນັ້ນ ເປັນເຂື່ອນຝາຍນໍ້າລົ້ນ ຫຼື Run Off River ເຊິ່ງໂຄງສ້າງຂອງເຂື່ອນໄດ້ຖືກອອກແບບມາໃຫ້ຄ້າຍຄືຝາຍກັັ້ນນໍ້າຕາມສາຍນໍ້າຕ່າງໆເພື່ອເພີ່ມລະດັບນໍ້າຂຶ້ນໃນລະດັບໃດໜຶ່ງ ແຕ່ບໍ່ໄດ້ມີການເກັບກັກນໍ້າແບບອ່າງເກັບນໍ້າ. ເມື່ອເວລາມີນໍ້າໄຫຼຜ່ານນໍ້າດັ່ງກ່າວກໍ່ໄຫຼເປັນປົກກະຕິຕາມຮູບແບບການໄຫຼຂອງທຳມະຊາດ, ຖ້າມີປະລິມານນໍ້າມາຫຼາຍກໍ່ຈະໄຫຼຜ່ານຝາຍຕາມປະລິມານນໍ້າແບບປົກກະຕິລົງຕາມຫ້ວຍ ຫຼື ສາຍນໍ້າເດີມ.

ສະນັ້ນ, ຈິ່ງຮຽກຮ້ອງໃຫ້ ພໍ່ແມ່ປະຊາຊົນລາວທຸກຄົນ ໃຫ້ເສບຂ່າວຢ່າງມີສະຕິ ແລະ ຕິດຕາມການລາຍງານຂ່າວ-ແຈ້ງການຈາກທາງອຳນາດການປົກຄອງທຸກຂັ້ນເພື່ອຄວາມປອດໄພຂອງຕົວທ່ານເອງ. ຂໍໃຫ້ທ່ານລະມັດລະວັງໃນການຕົກເປັນເຄື່ອງມືຂອງຜູ້ບໍ່ຫວັງດີໃນການໃຫ້ຂ່າວທີ່ຜິດພາດເພື່ອຈຸດປະສົງທີ່ເຂົາຈະໄດ້ ຍອດ Like & Share ເທົ່ານັ້ນ.