ເມືອງຊະນະສົມບູນ ຖ້ວມໝັກ 23 ບ້ານ, ຖືກກະທົບພັນກວ່າຄອບຄົວ

429

ຕາມການລາຍງານຂອງຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນເມືອງໃຫ້ຮູ້ວ່າ: ເລີ່ມແຕ່ວັນທີ 29 ສິງຫາ 2019 ຈົນເຖິງ ວັນທີ 4 ກັນຍາ 2019 ສະພາບນ້ຳຖ້ວມທົ່ວເມືອງຊະນະສົມບູນ, ແຂວງຈຳປາສັກ ຍັງສຶບຕໍ່ເພີ່ມທະວີຄວາມຮຸນແຮງ ຍ້ອນມີຝົນຕົກລິນບໍ່ຢຸດ ແລະ ຕົກສະສົມຕິດຢ່າງຕໍ່ເນື່ອງ ຈຶ່ງເຮັດໃຫ້ແຫຼ່ງນ້ຳຕ່າງໆມີປະລິມານເພີ່ມຂຶ້ນຢ່າງໄວວາ ແລະ ໄຫຼອັ່ງລົ້ນແຕກແກ່ງເຂົ້າຖ້ວມເຮືອນຊານ, ບ້ານເຮືອນ, ໄຮນາ, ຮົ້ວສ່ວນຂອງພໍ່ແມ່ປະຊາຊົນ ໂດຍສະເພາະບາງກຸ່ມບ້ານ ທີ່ອາໃສຢູ່ລຽບຕາມແຄມແມ່ນ້ຳຂອງ ແລະ ແມ່ນ້ຳເຊໂດນ ໄດ້ຮັບຜົນກະທົບຈາກນ້ຳຖ້ວມແລ້ວ ຈຳນວນ 23 ບ້ານ.

ໃນນັ້ນ, ປະຊາຊົນໄດ້ຮັບຜົນກະທົບ 1.000 ກວ່າຄອບຄົວ, ເນື້ອທີ່ນາຖືກນ້ຳຖວ້ມແລ້ວ 3.000 ກວ່າເຮັກຕາ ແລະ ເຮັດໃຫ້ປະຊາຊົນຈຳນວນ 13 ບ້ານ ລວມ 3.251 ຄອບຄົວ ຄື: ບ້ານແກ້ງໄມ້ເຮ້ຍ, ບ້ານນາພູຄຳ, ບ້ານນາຂາມ, ບ້ານຄີລີ, ບ້ານແຊລະບຳ, ບ້ານດອນແຊ, ບ້ານໂສໂລໃຫ່ຍ, ບ້ານໂສໂລນ້ອຍ, ບ້ານເດື່ອ, ບ້ານງົວແດງ, ບ້ານປາກຊອນ, ບ້ານງີ້ວ, ບ້ານໂຢງ ຕ່າງກໍ່ໄດ້ເຄື່ອນຍ້າຍຄອບຄົວ, ວັດຖຸ, ສິງຂອງ, ສັດລ້ຽງປະເພດຕ່າງໆຂື້ນ ໄປຢູ່ທີ່ສະຖານທີ່ປອດໄພ. ນອກຈາກນັ້ນ, ກະແສນ້ຳທີ່ໄຫຼ່ມາຈາກແມ່ນໍ້າເຊໂດນ ຍັງໄດ້ແຕກແກ່ງໄຫຼເຂົ້າຖ້ວມເຮືອນຂອງພໍ່ແມ່ປະຊາຊົນ ແລະ ອັ່ງຖ້ວມເສັ້ນທາງຫຼວງເລກທີ່ 13 ໃຕ້ ບໍລິເວນເຂດບ້ານສີວິໄລ ມີຄວາມຍາວເຖິງ 700-800 ແມັດ ແລະ ມີລະດັບນ້ຳໄຫຼແຮງສູງເຖິງ 1 ແມັດ ສົ່ງຜົນເຮັດໃຫ້ການສັນຈອນໄປມາຂອງນັກທ່ອງທ່ຽວ,ຜູ້ໂດຍສານ ລວມທັງພໍ່ແມ່ປະຊາຊົນທີ່ຈະເດີນທາງຂຶ້ນເໜືອລົງໃຕ້ ບໍ່ສາມາດສັນຈອນ

ທັງນີ້, ປັດຈຸບັນທາງອົງການຈັດຕັ້ງພັກ-ລັດ ຂອງແຂວງ ແລະ ເມືອງ ແລະ ອ້າຍ-ນ້ອງກຳລັງ ປ້ອງກັນຊາດ, ປ້ອງກັນຄວາມສະຫງົບ ພວມກຳລັງຂຸ້ນຂຽວອຳນວຍຄວາມສະດວກດ້ານຕ່າງໆໃຫ້ກັບພໍ່ແມ່ປະຊາຊົນ ແລະ ສ່ວນຕົວເລກຜົນເສຍຫາຍຕ່າງໆ ທາງຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນເມືອງ ຍັງຢູ່ໃນຂັ້ນຕອນການລົງເກັບກຳຂໍ້ມູນຢ່າງລະອຽດ.

ຂ່າວ ແລະ ພາບ:​ ແຫລມ ສິນໄຊ ຖວທ ເມືອງຊະນະສົມບູນ