10 ຕົວເມືອງເຝົ້າລະວັງ!! ລະດັບນໍ້າຂອງປາກເຊຂຶ້ນຮອດເຂດເຕືອນໄພແລ້ວ

398

ລະດັບນໍ້າຂອງຢູ່ປາກເຊຍື່ງຂຶ້ນຮອດຫຼັກເຂດເຕືອນໄພ ປັດຈຸບັນຢູ່ລະດັບ 11,42 ແມັດ  ຂະນະທີ່ທາງການແຂວງຈຳປາສັກອອກແຈ້ງການ 10 ຕົວເມືອງເຝົ້າລະວັງໄພນໍ້າຖ້ວມ.

ເພື່ອເປັນການປ້ອງກັນໄພພິບັດນໍ້າຖ້ວມທີ່ອາດຈະເກີດຂຶ້ນ, ຄະນະກຳມະການປ້ອງກັນ ແລະ ຄວບຄຸມໄພພິບັດແຂວງ ຈຳປາສັກ ຈຶ່ງໄດ້ແຈ້ງການເຖິງບັນດາ 10 ຕົວເມືອງ ແລະ ປະຊາຊົນທີ່ອາໄສຢູ່ເຂດຕໍ່າລຽບຕາມນໍ້າຂອງ ຈົ່ງມີສະຕິ ແລະ ເຝົ້າລະວັງໄພ ເນື່ອງຈາກລະດັບນໍ້າຂອງຢູ່ຈຸດປາກເຊ ຂຶ້ນຮອດເຂດເຕືອນໄພແລ້ວມືນີ້. ດັ່ງນັ້ນ, ຈຶ່ງຮຽກຮ້ອງມາຍັງພໍ່ແມ່ປະຊາຊົນ ແລະ ອຳນາດການປົກຄອງທ້ອງຖິ່ນ ຈົ່ງມີສະຕິ ແລະ ກຽມພ້ອມຮັບມື ພ້ອມທັງຍົກຍ້າຍສິ່ງຂອງໄປໄວ້ບ່ອນສູງ ແລະ ປອດໄພ ເພື່ອບໍ່ໃຫ້ເກີດຄວາມເສຍຫາຍ.

ຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນແຂວງ, ແຂວງຈຳປາສັກ ໄດ້ອອກແຈ້ງການສະບັບເລກທີ 015/ຈຂ.ຈສ ລົງວັນທີ 2 ກັນຍາ 2019 ເຖິງທ່ານຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນແຂວງ; ຄະນະກຳມະການປ້ອງກັນ ແລະ ຄວບຄຸມໄພພິບັດນະຄອນປາກເຊ ແລະ 9 ຕົວເມືອງ; ຫົວໜ້າພະແນກການ, ກົມກອງອ້ອມຂ້າງ, ກໍາລັງ ປກຊ-ປກສແຂວງ ພ້ອມດ້ວຍບັນດາບໍລິສັດ, ວິສາຫະກິດ, ຫ້າງຮ້ານ, ໂຮງຈັກໂຮງງານ, ຜູ້ປະກອບການຕ່າງໆ ຕະຫຼອດຮອດພໍ່ແມ່ປະຊາຊົນທົ່ວແຂວງຈຳປາສັກ ໃຫ້ເຝົ້າລະວັງ, ກະກຽມປ້ອງກັນ ແລະ ຊ່ວຍເຫຼືອໄພນໍ້າຖ້ວມໃນທົ່ວແຂວງ ຈຳປາສັກ.

ທ່ານ ບົວລິນ ວົງພະຈັນ ປະທານຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນແຂວງຂໍແຈ້ງມາຍັງທ່ານຊາບວ່າ: ປັດຈຸບັນພາຍຸດີເປຼຊັນ ໄດ້ເພີ່ມກຳລັງຂຶ້ນເປັນພາຍຸໝູນເຂດຮ້ອນ ແລະ ຈະພັດຜ່ານບັນດາແຂວງພາກກາງ ແລະ ພາກໃຕ້ ໃນຕອນເຊົ້າຂອງວັນທີ 3 ກັນຍາ 2019 ນີ້ ຕາມການແຈ້ງເຕືອນຂອງກົມອຸຕຸນິຍົມ ແລະ ອຸທົກກະສາດ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ສະບັບເລກທີ 1227/ກອຕທ ລົງວັນທີ 2 ກັນຍາ 2019 ແລະ ສົມທົບກັບລະດັບນໍ້າຂອງ (ປາກເຊ) ປັດຈຸບັນ 11,42 ແມັດ ໃນເວລາ 16:00 ໂມງ ຂອງວັນທີ 2 ກັນຍາ 2019, ເຂດລະວັງໄພແມ່ນ 11 ແມັດ ແລະ ເຂດອັນຕະລາຍແມ່ນ 12 ແມັດ ເຊິ່ງຍັງຈະມີທ່າອ່ຽງເພີ່ມຂຶ້ນອີກ.

ສະນັ້ນ, ເພື່ອເປັນການຕອບໂຕ້ສະພາບການດັ່ງກ່າວ ຈຶ່ງແຈ້ງເຕືອນມາຍັງອຳນາດການປົກຄອງທຸກພາກສ່ວນ ແລະ ພໍ່ແມ່ປະຊາຊົນຊາວແຂວງ ຈຳປາສັກ ຕ້ອງເປັນເຈົ້າການຕິດຕາມສະພາບໄພພິບັດ (ນໍ້າຖ້ວມ) ທີ່ອາດຈະເກີດຂຶ້ນ ແລະ ກຽມຮັບມືໄດ້ຢ່າງທັນການ. ພ້ອມນັ້ນ, ກໍ່ຂໍໃຫ້ກວດກາສະພາບການໄພພິບັດ (ຜູ້ປະສົບໄພ ແລະ ຜົນເສຍຫາຍ) ທີ່ເກີດຂຶ້ນ ລາຍງານຕໍ່ກອງເລຂາຂັ້ນແຂວງ ເພື່ອສັງລວມລາຍງານຂັ້ນເທິງພິຈາລະນາຊ່ວຍເຫຼືອຢ່າງທັນການ.

ດັ່ງນັ້ນ, ຈິ່ງຂໍໃຫ້ອຳນາດການປົກຄອງ ແລະ ພໍ່ແມ່ປະຊາຊົນ ໂດຍສະເພາະຜູ້ທີ່ອາໄສຢູ່ໃນບໍລິເວນພື້ນທີ່ຕ່ຳໃຫ້ມີສະຕິລະວັງຕົວ ແລະ ຂໍໃຫ້ຕິດຕາມການລາຍງານສະພາບອາກາດຈາກສື່ຕ່າງໆຢ່າງໃກ້ຊິດ. ປັດຈຸບັນ, ບາງເສັ້ນທາງຢູ່ນະຄອນປາກເຊ ກໍ່ມີນ້ຳໄຫຼເຂົ້າຖ້ວມ ຈິ່ງຂໍໃຫ້ຜູ້ທີ່ໃຊ້ລົດໃຊ້ຖະໜົນ ຈົ່ງມີສະຕິລະມັດລະວັງຕົວຕື່ມອີກເພາະຝົນຕົກເສັ້ນທາງໝື່ນ.