ສ່ວຍສາອາກອນແຂວງບໍລິຄຳໄຊ ອາດເກັບລາຍຮັບບໍ່ບັນລຸແຜນ

273

ປີ 2019 ສ່ວຍສາອາກອນປະຈໍາແຂວງບໍລິຄຳໄຊ ໄດ້ຮັບແຜນການລາຍຮັບ 189,9 ຕື້ກີບ ແຕ່ຜ່ານການປະຕິບັດມາຮອດວັນທີ 27 ສິງຫາ 2019 ປະຕິບັດໄດ້ 115,80 ຕື້ກີບ ເທົ່າກັບ 60,96% ຂອງແຜນການປີ, ທຽບໃສ່ໄລຍະດຽວກັນຫຼຸດລົງ 6,42% ຄາດຄະເນໝົດປີ 2019 ລາຍຮັບອາດບໍ່ບັນລຸຕາມແຜນການ ຍ້ອນວ່າໂຄງການກໍ່ສ້າງຮ່ວງສູນກາງຮັບຊ່ວຍ ( ໜີ້ 3 ແຈ ) ແລະ ໂຄງການກໍ່ສ້າງເຂື່ອນນໍ້າງຽບ 1 ສໍາເລັດແລ້ວ.

ທ່ານ ແສງຈັນ ຄຳປະເສີດ ຮອງຫົວໜ້າສ່ວຍສາອາກອນປະຈໍາແຂວງບໍລິຄຳໄຊ ໃຫ້ຮູ້ວ່າ: ໂດຍລວມແລ້ວການປະຕິບັດວຽກງານຂອງຂະແໜງສ່ວຍສາອາກອນມີອັນພົ້ນເດັ່ນ ເປັນຕົ້ນ: ໄດ້ເອົາໃຈໃສ່ໃນການສຶກສາອົບຮົມການເມືອງ – ແນວຄິດໃຫ້ແກ່ສະມາຊິກພັກ, ພະນັກງານ, ໄດ້ສໍາເລັດການແຕ່ງຕັ້ງ, ປັບປຸງສັບຊ້ອນປະກາດການຈັດຕັ້ງຂອງຂະແໜງສ່ວຍສາອາກອນທົ່ວແຂວງ, ເຜີຍແຜ່, ແນະນໍາກົດໝາຍວ່າດ້ວຍອາກອນມູນຄ່າເພີ່ມ, ໄດ້ຈັດຕັ້ງຜັນຂະຫຍາຍຄຳແນະນຳ ແລະ ເປີດກອງປະຊຸມກັບບັນດາຜູ້ຕາງໜ້າສາຂາທະນາຄານພາຍໃນແຂວງຂະແໜງການທີ່ກ່ຽວຂ້ອງເພື່ອກົນໄກການຊຳລະພາສີທີ່ດິນຜ່ານລະບົບທະນາຄານ, ໄດ້ສຸມໃສ່ຄຸ້ມຄອງຈັດເກັບລາຍຮັບຈາກຖານທີ່ມີແລ້ວ, ແຫຼ່ງລາຍຮັບຫຼັກທີ່ເປັນຍຸດທະສາດຂອງແຂວງ ເປັນຕົ້ນ: ກຸ່ມກໍ່ສ້າງເຂື່ອນໄຟຟ້າ, ໂທລະຄົມມະນາຄົມ, ກຸ່ມໄຟຟ້າ, ນໍ້າມັນເຊື້ອໄຟ, ກຸ່ມກໍ່ສ້າງສ້ອມແປງ ແລະ ກຸ່ມອື່ນໆ.

ຜ່ານການຈັດຕັ້ງປະຕິບັດວຽກງານເກັບລາຍຮັບຕົວຈິງມາຮອດວັນທີ 27 ສິງຫາ 2019 ສາມາດປະຕິບັດໄດ້ 115,80 ຕື້ກີບ ເທົ່າກັບ 60,96% ຂອງແຜນປີ ທຽບໃສ່ໄລຍະດຽວກັນຫຼຸດລົງ 6,42%, ສາເຫດທີ່ພາໃຫ້ຫຼຸດຍ້ອນໂຄງການກໍ່ສ້າງຮ່ວງສູນກາງຮັບຊ່ວຍ ( ໜີ້ 3 ແຈ ) ແລະ ໂຄງການກໍ່ສ້າງເຂື່ອນນໍ້າງຽບ 1 ທີ່ສໍາເລັດ 100% ແລ້ວ ເຊິ່ງກຸ່ມລາຍຮັບຫຼັກໄດ້ມາຈາກການກໍ່ສ້າງເຂື່ອນໄຟຟ້ານໍ້າຕົກປະຕິບັດໄດ້ 26,914 ຕື້ກີບ ກວມເອົາ 23,24% ກຸ່ມໄຟຟ້າປະຕິບັດໄດ້ 16,20 ຕື້ກີບ ກວມເອົາ 13,99%, ກຸ່ມໂທລະຄົມ ປະຕິບັດໄດ້ 15 ຕື້ກີບ ກວມເອົາ 12,95%, ກຸ່ມນ້ຳມັນເຊື້ອໄຟ ປະຕິບັດໄດ້ 8,47 ຕື້ກີບ ກວມເອົາ 7,31%.

ທ່ານ ແສງຈັນ ຄຳປະເສີດ ເນັ້ນຕື່ມອີກວ່າ: ປັດຈຸບັນຫົວໜ່ວຍພື້ນຖານວິສາຫະກິດທົ່ວແຂວງມີຈໍານວນ 5.228 ຫົວໜ່ວຍ. ໃນນີ້, ອອກທະບຽນ 2.744 ຫົວໜ່ວຍ, ອອກບັດ 2.484 ຫົວໜ່ວຍ, ຂັ້ນເມືອງຄຸ້ມຄອງ 4.789 ຫົວໜ່ວຍ. ແນວໃດກໍຕາມ, ໃນການຈັດເກັບລາຍຮັບເຂົ້າງົບປະມານ 4 ເດືອນທ້າຍປີ 2019 ແຜນສູ້ຊົນ 63.613 ຕື້ກີບ ແລະ ຄາດຄະເນປະຕິບັດໄດ້ໝົດປີ 179.420 ຕື້ກີບ ເທົ່າກັບ 94,45% ຂອງແຜນການປີ.

[ ຂ່າວ – ຮູບ: ກະຊວງການເງິນ ]