ເມືອງສິງ ພົບພະຍາດອະຫິວາໝູອາຟຣິກາລະບາດຢູ່ 2 ບ້ານ

322

ອີງຕາມການເປີດເຜີຍຂອງທ່ານ ສົມລິດ ພອນປະເສີດ ຫົວໜ້າຫ້ອງການກະສິກໍາ ແລະ ປ່າໄມ້ເມືອງສິງ ໃຫ້ຮູ້ໃນວັນທີ 28 ສິງຫາ 2019 ວ່າ: ໃນວັນທີ 24 ກໍລະກົດ 2019 ທາງຫ້ອງການກະສິກໍາ ແລະ ປ່າໄມ້ເມືອງສິງ ແຂວງ ຫຼວງນໍ້າທາ ໄດ້ຮັບການລາຍງານຈາກປະຊາຊົນບ້ານນາໃໝ່ວ່າມີໝູຢູ່ພາຍໃນບ້ານຕາຍ.

ຈາກນັ້ນ, ໄດ້ສົ່ງພະນັກງານລົງເກັບກໍາຕົວຢ່າງໄປວິໄຈ ມາຮອດວັນທີ 26 ກໍລະກົດ ໄດ້ຮັບແຈ້ງຈາກສູນວິໄຈວ່າພົບເຊື້ອພະຍາດອະຫິວາໝູອາຟຣິກາ, ໃນເບື້ອງຕົ້ນແມ່ນພົບການລະບາດຢູ່ບ້ານນາໃໝ່ ຫຼັງຈາກນັ້ນ ກໍ່ໄດ້ແຜ່ລະບາດໄປຫາບ້ານຈອມ ມາຮອດປັດຈຸບັນທັງ 2 ບ້ານມີໝູຕິດເຊື້ອທັງໝົດ 166 ໂຕ, ລວມມູນຄ່າເສຍຫາຍ 248 ລ້ານກີບ.

ພາຍຫຼັງທີ່ໄດ້ຮັບແຈ້ງຈາກສູນວິໄຈພະຍາດສັດ ວ່າພົບເຊື້ອພະຍາດອະຫິວາໝູອາຟຣິກາ ຢູ່ບ້ານນາໃໝ່ ແລະ ບ້ານຈອມ ທາງຫ້ອງການກະສິກໍາ ແລະ ປ່າໄມ້ເມືອງສິງ ໄດ້ສົມທົບກັບຂະແໜງການທີ່ກ່ຽວຂ້ອງລົງຈັດຕັ້ງປະຕິບັດຕາມຂັ້ນຕອນຕ່າງໆລົງສໍາຫຼວດ ແລະ ກໍານົດພື້ນທີ່ ທີ່ມີການເກີດໂຣກລະບາດຕາມຫຼັກວິຊາການ.

ທ່ານ ສົມລິດ ພອນປະເສີດ ກ່າວຕື່ມວ່າ: ນັບຕັ້ງແຕ່ພົບການລະບາດເຊື້ອພະຍາດອະຫິວາໝູອາຟຣິກາຢູ່ເມືອງສິງ ເຊິ່ງທາງເມືອງກໍ່ຄືພາກສ່ວນທີ່ກ່ຽວຂ້ອງໄດ້ເອົາໃຈໃສ່ລົງກວດກາ ແລະ ຕິດຕາມຢ່າງໃກ້ຊິດ ແລະ ໄດ້ງົດການຂາຍຊີ້ນໝູຢູ່ຕາມທ້ອງຕະຫຼາດ ເພື່ອຮັບປະກັນການບໍລິໂພກຂອງຄົນເຮົາ ທັງເປັນການປ້ອງກັນບໍ່ໃຫ້ມີການລະບາດຂອງອະຫິວາໝູອອກໄປເຂດອື່ນອີກ.