ລັດຖະມົນຕີ ຮສສ ມອບເຄື່ອງຊ່ວຍເຫຼືອຜູ້ປະສົບໄພພິບັດ ແຂວງໄຊຍະ ແລະ ວຽງຈັນ ມູນຄ່າ 2 ຕື້ກວ່າ

479

ໃນ ປີ 2019 ນີ້ ກະຊວງແຮງງານ ແລະ ສະຫວັດດີການສັງຄົມ (ຮສສ) ໄດ້ຮັບການອະນຸມັດຈາກ ລັດຖະບານ ແຫ່ງ ສປປ ລາວ ແລະ ລັດຖະບານຍີ່ປຸ່ນ ໃນການຈັດຕັ້ງປະຕິບັດໂຄງການຄັງແຮເຂົ້າຊ່ວຍເຫລືອຜູ້ປະສົບໄພພິບັດ ປີ 2018 ໃນຂອບເຂດທົ່ວປະເທດ ພາຍໃຕ້ກອງທຶນເພື່ອຮ່ວມງານ KR1, ສະນັ້ນ, ໃນໂອກາດລົງເຄື່ນໄຫວວຽກງານແຮງງານ ແລະ ສະຫວັດດີການສັງຄົມ ຢູ່ບັນດາແຂວງພາກ ເໜືອ, ພາກກາງ ແລະ ພາກໃຕ້.

ໃນລະຫວ່າງວັນທີ 26 – 28 ສິງຫາ 2019ນີ້ ທີ່ພະແນກແຮງງານ ແລະ ສະຫວັດດີການແຂວງ ເນື່ອງໃນໂອກາດ ທ່ານ ປອ ຄຳແພງ ໄຊສົມແພງ ລັດຖະມົນຕີ ກະຊວງ ຮສສ ພ້ອມຄະນະ ໄດ້ລົງຊຸກຍູ້ຕິດຕາມວຽກງານຂະແໜງ ຮສສ ໄດ້ຕາງໜ້າລັດຖະບານມອບເຄື່ອງຊ່ວຍເຫລືອໃຫ້ແກ່ປະຊາຊົນຜູ້ປະສົບໄພພິບັດ ຢູ ່ແຂວງໄຊຍະບູລີ ແລະ ແຂວງວຽງຈັນ ລວມມູນຄ່າ 2 ຕື້ ກວ່າກີບ ເຊິ່ງຕາງໜ້າຮັບໂດຍ ຮອງເຈົ້າແຂວງທັງ 2 ແຂວງດັ່ງກ່າວ ພ້ອມຄະນະ ພະແນກແຮງງານ ຮສສ ແຂວງ.

ພ້ອມນັ້ນ, ທ່ານລັດຖະມົນຕີ ໄດ້ດ້ຮັບຟັງການສະຫຼຸບລາຍງານສະພາບການໂດຍຫຍໍ້ ຈາກ ຄະນະພະແນກ ຮສສ ແຂວງ, ພ້ອມທັງໃຫ້ກຽດໂອ້ລົມ ແລະ ເນັ້ນໜັກໃຫ້ ພະແນກແຮງງານ ແລະ ສະຫວັດດີການສັງຄົມ (ຮສສ) ທັງສອງ ແຂວງ ໄຊຍະບູລີ ແລະ ແຂວງວຽງຈັນ ພ້ອມກັນເພີ່ມທະວີຄວາມເອົາໃຈໃສ່ຍົກສູງບົດບາດນຳພາ ແລະ ຄວາມສາມາດນຳໜ້າໃນການກໍ່ສ້າງ ແລະ ປັບປຸງການຈັດຕັ້ງໃຫ້ມີຄວາມເຂັ້ມແຂງ ແລະ ໜັກແໜ້ນ ໂດຍໃຫ້ຖືເອົາການສຶກສາອົບຮົມການເມືອງ ນຳພາແນວຄິດ ຢ່າງເປັນປົກກະຕິຕໍ່ເນື່ອງ ເພື່ອແນໃສ່ຈຳກັດ ແລະ ແກ້ໄຂບັນດາຊ່ອງວ່າງຂອງປະກົດການຫຍໍ້ທໍ້ ທີ່ຈະເກີດຂຶ້ນໃນຕໍ່ໜ້າຈາກການປະຕິບັດໜ້າທີ່ ຂອງຖັນແຖວສະມາຊິກພັກ,ພະນັກງານ-ລັດຖະກອນພາຍໃນ, ຈັດຕັ້ງປະຕິບັດບັນດາໂຄງການຈຸດສຸມ ທີ່ຕິດພັນກັບຂະແໜງ ຮສສ ນັບທັງສູນກາງ ແລະ ທ້ອງຖິ່ນ. ລວມທັງການເກັບລາຍຮັບ ແລະການຄຸ້ມຄອງລາຍຈ່າຍ ສະຫຼຸບລາຍງານເປັນປະຈຳແຂວງ ແນໃສ່ສະກັດກັ້ນຕ້ານການໃຊ້ຈ່າຍເກີນແຜນ, ຈ່າຍບໍ່ຖືກເປົ້າໝາຍ ຫຼື ຈ່າຍບໍ່ແທດກັບຕົວຈິງ.

ວຽກແຮງງານ: ໄດ້ສ້າງກົນການພັດທະນາສີມືແຮງງານ ຮ່ວມກັບບັນດາຂະແໜງການທີ່ກ່ຽວຂ້ອງ ແລະ ພາກເອກະຊົນ, ສ້າງລະບົບການຈັດຫາວຽກເຮັດງານທໍາ, ປົກປ້ອງສິດຜົນປະໂຫຍດຂອງຜູ້ອອກແຮງງານລາວ ແລະ ຜູ້ອອກແຮງງານຕ່າງປະເທດ; ວຽກງານສະຫວັດດີການສັງຄົມ: ຂະຫຍາຍອັດຕາການປົກຫຸ້ມປະກັນສັງຄົມຫຼາຍຂຶ້ນ, ປະຕິບັດການອຸດໜູນປະເພດຕ່າງໆ ແລະ ຄຸ້ມຄອງບໍລິຫານກອງທຶນປະກັນສັງຄົມແຫ່ງຊາດ ຢ່າງມີປະສິດທິຜົນດີຂຶ້ນ

ວຽກງານແກ້ໄຂໄພພິບັດ: ໄດ້ໃຫ້ທຶນການຊ່ວຍເຫຼືອແກ້ໄຂສຸກເສີນ ໃຫ້ແກ່ຜູ້ທີ່ໄດ້ຮັບຜົນກະທົບຈາກໄພພິບັດ, ໄດ້ຈັດຕັ້ງລະດົມການຊ່ວຍເຫຼືອຈາກທົ່ວສັງຄົມ ແລະ ຮັບເອົາການຊ່ວຍເຫຼືອຈາກສາກົນ ເພື່ອຈັດສົ່ງໃຫ້ຜູ້ປະສົບໄພພິບັດຢູ່ ແຂວງ, ເມືອງ ແລະ ບ້ານທີ່ຖືກຜົນກະທົບ ໃຫ້ທົ່ວເຖິງ

ວຽກງານເກັບກູ້ລະເບີດບໍ່ທັນແຕກທີ່ຕົກຄ້າງ: ໄດ້ມີການສໍາຫຼວດຕາມຈຸດຫຼັກຖານລະເບີດບໍ່ທັນແຕກ ສາມາດກໍານົດເປັນເຂດສະເພາະ ແລະ ເກັບກູ້ລະເບີດບໍ່ທັນແຕກອອກຈາກພື້ນທີ່ ພ້ອມທັງ ມີການທໍາລາຍເປັນຢ່າງດີ

ວຽກງານກາແດງ: ໄດ້ເຄື່ອນໄຫວຮັບບໍລິຈາກເລືອດ ແລະ ເບີກຈ່າຍໃຫ້ບັນດາໂຮງໝໍຕ່າງໆ, ຊ່ວຍເຫຼືອຜູ້ປະສົບອຸບັດຕິເຫດຕາມທ້ອງຖະໜົນ

ວຽກງານການສ້າງນິຕິກໍາ: ໄດ້ຄົ້ນຄວ້າສ້າງກົດໝາຍ ແລະ ລະບຽບການຕ່າງໆ ທີ່ເປັນເຄື່ອງມືສໍາຄັນ ໃນການຄຸ້ມຄອງບໍລິຫານວຽກງານ ແລະ ການຈັດຕັ້ງປະຕິບັດຢ່າງກວ້າງຂວາງ ແລະ ມີຄວາມສັກສິດກວ່າເກົ່າ.

ໂອກາດດຽວກັນນີ້, ຍັງໄດ້ມອບເຄື່ອງຊ່ວຍເຫລືອທີ່ນຳມາມອບໃນຄັ້ງນີ້ ປະກອບມີ: ມອບໃຫ້ປະຊາຊົນແຂວງໄຊຍະບູລີ ເຂົ້າສານໜ່ຽວ ຈາກກອງທຶນເພື່ອນຮ່ວມງານ KR1 ຈຳນວນ 147.876 ກິໂລ ລວມມູນຄ່າ 1.190 ຕື້ກວ່າກີບ ; ເຄື່ອງນຸ່ງຫົມ ແລະ ເກີບ ຈາກ ສ.ເກົາຫຼີ ຈຳນວນ 100 ແກັດ ມູນຄ່າ 150 ລ້ານກີບ ແລະ ເງີນເພື່ອຈັກຊື້ສັງກະສີ ແລະ ເຫຼັກຕະປູ ຈຳນວນ 158 ລ້ານກວ່າກີບ ແລະ ແຂວງວຽງຈັນ ເຂົ້າສານໜ່ຽວ 141.612 ກິໂລ ມູນຄ່າ 1.290 ຕື້ກວ່າກີບ ແລະ ເຄື່ອງນຸ່ງຫົ່ມ ແລະ ເກີບ 100 ແກັດ ມູນຄາ 150 ລ້ານກີບ.

ໂອກາດດັ່ງກ່າວ ທ່ານ ປອ ຄຳແພງ ໄຊສົມແພງ ຍັງໄດ້ເຂົ້າຮວ່ມພິທີ ມອບ-ຮັບ ໂຄງການກໍ່ສ້າງອາຄານສູນບໍລິການປະກັນສັງຄົມແຫ່ງຊາດ ແຂວງໄຊຍະບູລີ ແລະ ໃນວັນຕໍ່ມາຍັງໄດ້ຢຽມຢາມ ໂຮງງານ ລາວຊິຊິນ ຜະລິດເປົາ ແລະ ເມັດຢາງ ສົ່ງອອກພາຍໃນ ແລະ ຕ່າງປະເທດ ຢູ່ແຂວງວຽງຈັນ ນຳອີກ.

(ຂ່າວ-ພາບ ຮຮສ)